Автор И, Мухlамадов. Февраль 2022 сон.

9 февралалда райадминистрациялда тlобитlана налогал ракlариязул бицараб данделъи. Гьелда гlахьаллъи гьабуна районалъул нухмалъиялъ, РОВДялъул начальник Мухlамадхlажи Сайбулаевас, районазда гьоркьосеб налоговияб инспекциялъул вакилзабаз, райадминистрациялъул хlалтlухъабаз ва цогидалги иш тlаде кколел хlалтlухъабаз. 

Районалда араб соналъ налогал ракlариялъул хlакъалъулъ бицана районалъул бетlерасул заместитель Асадгlали Гlабдуразакъовас. Гьес абуна налогал ракlариялъул комиссиялъул председательлъун живго вукlаниги, араб соналъ комиссиялъ гьабураб хlалтlудаса жив рази гьечlилан. Мисалалъе, 2021 соналъ районалда бакlаризе кколеб букlараб 63 млн гъурщил транспорталъул налогалъул бакlарун буго гlицlго 15 млн. Гьединго районалда ругел гlемерисел даран-базаралъул точкаби росун рагlуларо налоговияб учеталде. Районалъул бетlер Нурмухlамад Задиевги рази гьечlоан налогал ракlариялда хурхун гьабулеб бугеб хlалтlудаса.

Автор Н. Гlалиева. Февраль 2022 сон.

Гьал къоязда районалъул лъай кьеялъул отделалда т1обит1ана «Дагъистаналъул хъвадарухъабазул асарал жиде-жидер мац1алда бищунго лъик1 рик1к1унев» абураб республикаялъулаб конкурсалъул муниципалияб бут1а.
Гьелъул мурад бук1ана миллатазул мац1ал церет1езари ва гьел ц1уни, г1агараб рахьдал мац1 лъазаби, г1олохъанал пагьму-гьунар бугел ц1алдохъаби т1аса рищи, авар мац1алде гьезул рокьи бижизаби.

Конкурсалда г1ахьаллъизе ах1ун рук1ана г1аммаб лъай кьеялъул школазул 11 классазул ц1алдохъаби.
Т1оцебе конкурс рагьарай районалъул лъай кьеялъул отделалъул информациялъулгун методикияб централъул директор Мух1амадова Умагьани Х1ажиевнаялъ г1одорч1аразе баян гьабуна конкурсалъул  мурад ва гьелда г1ахьаллъизе рач1арал 13 школалъул ц1алдохъабазе раг1и кьуна иргадал цере рахъине. Рек1елъе рортулел раг1абаздалъун нилъер маг1арулазул тарихги г1амалги, г1адатги, ях1-намусги наслабаз наслабазухъе кьун ц1унулеб авар  мац1алъул х1акъалъулъ бицунелъул, бихьулеб бук1ана жийго Умагьани Х1ажиевнаялъулги гьеб мац1алъухъ рокьи ккун бук1ин.
Гьале иргадал цере рахъана Г1ахьалч1и, Х1ариколо, Буц1ра, Хунзахъ №1, №2, Харахьи, Хунзахъ школа-интернат, Бакьагьеч1и, Гьоц1алъ, Хьиндахъ, Т1агьада, Моч1охъ, Т1ануси гьоркьохъел школазул ц1алдохъаби.
Цояздаса цояз берцинго гьез ц1алулел руго нилъер аваразул шаг1ирал: Фазу Г1алиевалъул, Залму Батировалъул, Расул Х1амзатовасул асарал. Унго маг1арул мац1алъул берцинлъи, З. Батировалъ абухъего, гьелъул г1ажаибаб гьац1улаб чвахи, чияр мац1алъухъищ гьеб хисизе бугеб.
Залалда г1одор ч1арал киналго балагьарал г1адин, цере рахъунезухъ к1вар кьун балагьун буго жюри. Гьез х1исабалде босулеб буго кеч1 рик1к1унелъул гьеб рик1к1ине бугеб махщел, мух1канаб дикция, (гьеб бук1ине ккани г1емерго т1ад х1алт1изе кколеб), каламалъул техника, рик1к1ине асар балагьизе лъай, авторас ургъараб къаг1идаялда асаралъул маг1на балагьаразухъе кьезе бажари.

Автор И. Мухlамадов. Январь 2022 сон.

 Гьаб анкьалда байбихьана районалъул бегавулзабазул хlисаб кьеял. Исана ункъабилеб сон буго бегавулзабазул хlисаб кьеял тlоритlулел ругелдаса, гьединаб къагlида байбихьана районалъул бетlерлъуде Нурмухlамад Задиев вачlаралдаса нахъе. Гъоркьисалагогlадин, исанаги хlисаб кьеял байбихьана Уздалросулъан. Гьелда гlахьаллъи гьабуна райадминистрациялъул гlуцlарухъанлъиялъулгун правовояб отделалъул начальник Шамил Валиевас, росдал бегавул Гlумар Гlисаевас, росдал жамагlаталъ ва цогидазги.

Республикаялдаго, цадахъго районалдаги жеги захlматаб эпидемиологияб ахlвал-хlалги бугелъул, данделъи тlобитlун букlана дагьабго къадар гlадамазулги ахlун. Советалде гъорлъе унеб лъабабго росулъ буго 632 цlараки, 409 мина, гlумру гьабун буго 2091 чияс. Буго 2 ясли-ах, 2 школа, 1 библиотека, 3 ФАП ва 2 культураялъул рукъ. Араб соналъул бюджет букlун буго 2, 690 млн гъурущ. Буго 350 бетlер чlегlербоцlул, 202 бетlер гlи-цlцlаназул. Советалъул гlаммаб ракь буго 1147 гектар ракьул, гьелдасан 765 гектар буго росдал магlишаталъул ракьал. Гlаммаб къагlидаялъ советалъул ракьалда ругел нухазул халалъи буго 54 км, гьездасан 4,1 км хъил тlурал. 
Араб соналъ къачlан буго 3,8 км чабхил нухлул, 310 кв м гlатlилъиялда цlидасан гьарун руго нух щула гьабизе къадал. Лъим жанисан чвахизе, 99 метрадул манзилалда лъуна 33 лоток. Уздалросулъ бугеб нухлул рагlалда бетонги тlун хlадурун буго 1350 метрадул манзилалда лъим чвахулеб рахъ. Гьабсагlаталда росдал къватlахъ 30 чирахъ хисулеб буго бакъудасан хlалтlулездалъун. Росулъе тlаде щолеб буго тlабигlияб газ. Лъун буго 5 газ бикьулеб шкафчик. Исана яги тlасияб соналде гlадамазул рукъзабахъе хъахlилаб цlатари щвезе ракlалда бугилан бицана бегавулас. 100 гlанасеб гlарза битlун рагlула рукъзабахъе газ бачинеги. “Местные инициативы” проекталда гlахьаллъиги гьабун, 2,2 млн гъурщиде капиталиял ремонталги гьарун къачlалеб буго Тlагьада росдал библиотека ва 4,2 млн гъурщиде Хъахlикlкlалахъ росдал клуб.

Автор Н. Гlалиева. Январь 2022 сон.

 20 январалда районалъул Культураялъул к1алг1аялда т1обит1ана «Хунзахский район» муниципалияб г1уц1иялъул бет1ер Нурмух1амад Махсут1х1ажиевич Задиевас 2021 соналъ гьабураб х1алт1ул х1исаб кьей. 
Данделъиялда г1ахьаллъана райсобраниялъул депутатал, росабазул бегавулзаби, жамг1иял церехъаби, цо-цо г1уц1абазул вакилзаби, лъай кьеялъул педагогал, СМИялъул х1алт1ухъаби ва г1емерал цогидалги. 

Х1исаб кьей байбихьана Н. Задиевас т1олабго Россиялъул халкъалъего г1адин, 2020-2021 сонал, пандемия сабаблъун, нилъер районалъеги зах1матал рук1анилан бициналдасан. Гьел сонал лъугьана унго-унгояб х1албихьилъун, хасго сахлъи ц1униялъул х1алт1ухъабазе. Амма нилъеда к1ванилан абуна гьес,-лъугьун бук1араб ах1вал-х1алалъе кьуч1аб къиматги кьун, коронавирусалъул карачелалдаса бергьине. 
Кин бук1аниги, жакъа къоялдаги Хунзахъ централияб больницаялда регизарун руго 30-35 коронавирусалъ унтарал. Гьединлъидал прививка гьаби кколила нилъгоги, нилъерго г1агарал чаг1иги зах1матаб Covid-алдаса рорч1иялъе сабаблъун. Коронавирус т1ибит1иялъул динамикаялъухъ хал гьабуни, гьеб цо къоялъ цебе щваниги, хадуб щваниги щвеч1ого хут1улеб гьеч1о, гьединлъидал лъик1аб бугила цебеккунго нилъерго черх гьелде х1адур гьабизе. Араб соналда Covidалъ унтун вуго 3472 чи. Вакцина гьабурал 11167 чиясдасан г1иц1го 9 чи гурого унтун гьеч1о, гьелги бигьаяб къаг1идаялда.

Автор И. Мухlамадов. Январь 2022 сон.

 19 январалда райадминистрациялда тlобитlана районалъул терроризмалда данде чlараб комиссиялъул (АТК) иргадулаб данделъи. Гьелда гlахьаллъи гьабуна районалъул бетlерасул заместителаз, ихтиярал цlуниялъулгун къуваталъулал ва рухlиял идарабазул вакилзабаз, АТКялъул членаз, райадминистрациялъул хlалтlухъабаз ва цогидазги. 

Данделъиялда гьоркьор лъурал суалаздасан рукlана районалъул АТКялъ 2021 соналъ гьабураб хlалтlул хlасилал гьари, 2019-2023 соназда терроризмалъул идеологиялде данде къеркьеялъул комплексалъулаб планалъул тадбирал тlуразари, районалда ругел мажгитазул документал хlадури ва диниял учреждениязул паспортизация гьабиялда хурхарал суалал. 
Тlоцебесеб суалалда хурхун баян кьуна районалъул бетlерасул заместитель, АТКялъул секретарь Хlамид Гьитlиновас. Гьабсагlаталда районалда бугеб ахlвал-хlалалда рекъон аслияб хlинкъи рагlула ихтияр гьечlого яргъид гlуцlарал бандазул (НВФ) гlахьалчагlи тlадруссун районалде рачlине рес букlиналъул ва цо-цо росабалъ вагьабиязул рахъ кколел чагlи камун гьечlолъиялъул. Полициялъул баяназда рекъон араб соналъ районалда терроризмалда хурхараб цониги такъсир ккун гьечlо. Гьединго кlвар бугеблъун хутlулеб буго "кьижарал ячейкаби" тlатинариялъул суалги. Терроризмалъул профилактика гьабиялъул мурадалда тlобитlун буго 4 данделъи, гьениб гьоркьоб лъун буго 18 суал. АТКялъул хlукмаби тlуразариялъул мурадалда районалъул 86 лъай кьеялъул гlуцlиялъул паспортизация гьабун буго. Маданияталъул объектазул паспортизация гьабиги рагlалде бахъунеб буго.

Автор Н. Гlалиева. Январь 2022 сон.

Киса-кибго информациялъул алатаздасан нилъеда рагIулеб буго 2022 соналъул 1 январалдасан тIадагьал автомашинаби ругез гьезул техосмотр гьабичIониги бегьулилан. Гьелъул хIакъикъат жеги мухIканго лъазелъун жакъа дун дандчIвана ОМВДялъул ОГИБДДялъул ДПСалъул инспектор полициялъул лейтенант МуртазагIалиев Муслим СайгидулбатIаловичгун. Гьесдаги дидаги гьоркьоб ккана гьадинаб гара-чIвари.

-Муслим СайгидулбатIалович, Россиялда тIадаб къагIидаялда гьабизе кколеб букIараб, гьабичIони автомашинаялъул бетIергьанасда тIад штрафал къотIулеб букIараб техосмотр ЦIияб соналдасан гьабичIониги бегьулеб букIиналда бан цIалдолезда ричIчIизелъун цодагьал баянал кьеларищ нижее?

-202I соналъул 30 декабралда Россиялъул президент Владимир Путиница гьарурал хисизариязда рекъон жалго бетIергьанал тIадагьал автомобилал ва мотоциклал ругез техосмотр гьабичIониги бегьулеб буго. Гьел гIумруялде рахъуна официалияб къагIидаялда печаталда рахъун хадуб.

Автор И. Мухlамадов. Декабрь 2021 сон.

Тlолабго удкаялдаго гlадин бигьаяб букlинчlо 2021 сон нилъер районалъеги. Жеги тlубанго лъугlун гьечlеб коронавирусалъулаб инфекциялъ хlинцлъизабуна районалъул цебетlей. Амма кин букlаниги, дандчlварал захlмалъабиги къинарулаго, цо хасаб къадаралъул хlалтlи гьабуна исана муниципалитеталда. 2021 соналъ районалъ гlахьаллъи гьабуна 9 пачалихъияб программабаздагун проектазда. Гьезул гlемерисел гьабсагlаталдаги гlумруялде рахъинарулел руго. 

Автор И. Мухlамадов. Декабрь 2021 сон. 

 16 декабралда райадминистрациялда тlобитlана райсобраниялъул депутатазул иргадулаб сессия. Гьелда гlахьаллъи гьабуна районалъул нухмалъиялъ, депутатаз, администрациялъул хlалтlухъабаз, прокурор Рамазан Гlумаровас ва цо-цо бегавулзабаз.
Данделъаразе саламги кьун сессия рагьана оайсобраниялъул председатель Мухlамад Мухlамадовас. Сессиялъул повесткаялда букlана 10 суал. Гьездасан аслияллъун рукlана “Хунзахъ район” МРаллъул 2022 ва планалъулал 2023, 2024 соназул бюджетазул проекталъул хlакъалъулъ, 2021 сонил 9 моцlил бюджет тlубазабиялъул хlакъалъулъ, росдал магlишаталъул отделалъ 2021 соналъ гьабураб хlалтlул хlакъалъулъ суалал. Жидецаго исана гьабураб хlалтlул хlакъалъулъ бицана росдал магlишаталъул отделалъул начальник Мухlамад Гlалиевас. Гьесул рагlабазда рекъон районалда хlалтlулеб буго 7659 ЛПХ, 113 батlи-батlиял гlуцlиялъулгун правовоял къагlидабазул предприятие, гьездасан 80 юридикияб предприятие ва 33 КФХ. Кинабниги росдал магlишаталъул бутlаялда хlалтlулел руго районалъул 10000 чи, гьезул гlемерисел руго ЛПХязда. 

Автор Н. Гlалиева. Декабрь 2021 сон. 

1998 соналдаса нахъе щибаб соналъул ноябрь моц1алъул ахирисеб гьат1ан къоялда нилъер улкаялда к1одо гьабула Эбелалъул къо.
Исанаги рохалилаб ах1вал-х1алалда к1одо гьабуна гьеб гьайбатаб байрам нилъер районалъул маданияталъулгин х1ухьбахъиялъул централда. Гьелде ах1ун рук1ана лъимал г1емерал улбул, бесдалал хьихьарал, жалго г1ажизго хут1арал улбул.
Улбузда рохалилаб байрамги баркун данделъи рагьана ва ахиралде щвезег1ан эбелалъул х1акъалъулъ цояздаса цоял берцинал раг1абиги абун гьеб берцинго бачана районалъул администрациялъул культураялъул отделалъул заведующая Жавгьарат Хъайитмазовалъ.
Эбел-ккола нилъер г1умруялъул мат1у, нилъее г1умру кьурай, нилъ г1езаюрай, лъик1аб-квешаб малъун нилъ г1умруялъул бит1араб нухде ячуней г1адан. Нилъер районалъул администрациялъги ц1ик1к1араб к1вар кьолин эбеллъи ва лъимерлъи ц1униялде, хъизанал церет1езариялде,-ян абуна Ж. Хъайитмазовалъ. 
Эбел-ккола нилъер г1умруялъул мат1у, нилъее г1умру кьурай, нилъ г1езаюрай, лъик1аб-квешаб малъун нилъ г1умруялъул бит1араб нухде ячуней г1адан. Нилъер районалъул администрациялъги ц1ик1к1араб к1вар кьолин эбеллъи ва лъимерлъи ц1униялде, хъиназал церет1езариялде,- ян абуна Ж. Хъайитмазовалъ. 

Автор Хъазамбиева Х. Декабрь 2021 сон. 

Араб г1асруялда жаниб, щибаб росдалги, районалъулги, Дагъистаналъулги, гьеб  тун къват1ибехунги  жиндирго  лъалк1ги, накъищги, к1варги, тарихги тана аза-азар чияс. Щибаб заманаялъул рук1ана жиндирго зах1малъабиги, лъугьа - бахъиналги, рагъ-кьалалги, инкъилабиги, жидерго бах1арзалги, хилиплъаралги, бет1ергьабиги. Гьединаздасан  гьоркьоса  цоялъул х1акъалъулъ хъвазе бокьун буго, киг1ан мукъсанго гурони дида лъазе к1вечlониги. 
Хъазамбиева Хамиз гьаюна 1888 соналъ Бакьагьеч1иб росулъ батракасул  хъизамалда. Гьелъул г1умру ккола историялда жаниб к1вар бугебщинаб заманаялде, октябралъул инкъилаб, гьелдаса  хадуб хъачагъазде данде партизаназул рагъ, ц1ияб х1укумат маг1ишат-яшав г1уц1и, палх1асил, к1иялго дунялалъул рагъал ва гьездасан хадуб биххараб х1укумат г1уц1и.
Зах1матал рук1ана дол революциялъулал къоял. Дагъистаналъул халкъалъул къисматин абуни доб мехалъ ц1акъ кьог1аб ва бец1аб букlана, г1адамазул яшав язихъаб, мискинаб ва т1олабго г1умру  бук1ана  къваридаб къисалъун.
Ц1акъго кьог1аблъун  бук1ана нек1сиял маг1арул руччабазул къисмат. Г1иц1го напсияб ихтияралдаса шариг1аталъ мах1рум гьариялда цадахъго, бец1аб ва язихъаб бук1ана маг1арулазул г1умруги. Амма Аврораялъул гьаркьица маг1арулалъул гьурмадаса ч1ег1ераб пардав бахъана. Гьелдаго цадахъ ч1ужуг1аданалъул эркенлъиялде г1ищкъуги ц1ик1к1ана.

Автор И. Мухlамадов. Декабрь 2021 сон. 

3 декабралда рагlалде бахъана Челябинск шагьаралда тlобитlараб боксалъул рахъалъ Россиялъул чемпионат. 8 къоялъ халатбахъараб турниралда гlахьаллъи гьабуна улкаялъул 48 батlияб регионаздаса 180 спортсменкаялъ. Дагъистанлъул тlаса бищараб командаялда гъорлъ 66 килограмм цlайиялда чемпионаталда гlахьаллъана нилъер ракьцояй Сагlадат Тlалхlатоваги. Гьей рингалде яхъана лъабго нухалъ ва щибаб нухалда бергьенлъиги босун иргадулаб нухалда яхъана улкаялъул чемпионкалъун. Гьеб ккола Сагlадатил Россиялъул чемпионаталъул анкьабилеб меседил медаль. Финалалда Сагlадатица 5-0 хlисабгун ракlчlараб бергьенлъи босана Москваялда боксер Анастасия Эсманида тlад.

Автор Н .Гlалиева. Декабрь 2021 сон. 

Гьал къоязда Ц1адаса Х1амзатил ц1аралда бугеб Авар театралда т1обит1ана Дагъистаналъул халкъияй поэтесса, маг1арулазул машгьурай шаг1ир ва драматург Батирова Залму Мух1амадовна гьаюралдаса 80 сон т1убаялъул х1урматалда юбилеялъулаб вечер. 
Гьеб х1урматияб дандеруссиналде рак1арун рук1ана Дагъистан Республикаялъул культураялъул Министерствоялъул, хъвадарухъабазул Союзалъул вакилзаби, Залму Мух1амадовнаялъул творчество бокьулел ва гьелъие къимат кьолел хъвадарухъабигун поэтал, пишацоял, гьелъул росуцоял, хъизан-лъимал.
Нилъер районалъул ц1аралдасан халкъияй поэтессаялда баркиялъулаб к1алъай гьабизе вахъун вук1ана райадминистрациялъул бет1ерасул заместитель Асадг1али Г1абдуразакъов.
Нилъер район бечедаб бугин,-ян абуна гьес машгьурал хъвадарухъабаздалъунги шаг1ирзабаздалъунги. -Гьезда гьоркьоб бихьулеб бак1 ккола Залму Батировалъ. Гьелъул Ват1аналде хъварал асараз щивав чиясул рек1елъ гъваридал лъалк1ал тола, г1акъилал насих1аталги, малъа-хъваялги киналго г1елазе г1акълулъун ч1ола. 
К1алъазе рахъарал Дагъистаналъул культураялъул Министрасул заместитель Мурад Х1ажиевас, РАНалъул ДНЦялъул ИЯЛИялъул бет1ерав г1елмияв х1алт1ухъан Мух1амадов Мух1амад Ибрагьимовичас, Пачалихъияб Думаялъул депутат Сайгидпаша Г1умахановас, Сириялдаса поэт Ибрагьим Стамбульскияс ва г1емерал цогидазги к1удияб къимат кьуна Залму Батировалъул творчествалъе. Гьезул церерахъиназдасан бич1ч1улеб бук1ана залму Мух1амадовнаялъул асаразде гьезул бугеб рокьи.
 

Автор И. Мухlамадов. Декабрь 2021 сон. 

Гьал къоязда райадминистрациялда тlобитlана нилъер районалдаса регбисткабазулгун дандчlвай. Гьелъие гlиллалъун ккана гьез лъикlал хlасилал рихьизарулел рукlин. Гьедин Гlахьалчlиса Патlимат Мухlамадова ккола руччабазул тlаса бищараб командаялъул аслияй игрок, Россиялъул чемпионка ва улкаялъул кубокалъул меседил медалистка. Гьединго Патlимат ккола нилъер районалдаса цого цо йигей регбиялъул рахъал спорталъул мастерги. Дандчlваялда гlахьаллъи гьабуна Россиялъул гlолилазул первенствоялъул лъабабилей призер Жамилат Хlосеновалъги. Россиялъул тlаса бищараб командаялда гъорлъ гьелъ гlахьаллъи гьабизе буго кватlичlого тlобитlизе бугеб регбиялъул рахъалъ Европаялъул первенствоялда. Спортсменкабазда цадахъ районалъул нухмалъигун дандчlвазе рачlун рукlана Дагъистаналъул регбиялъул федерациялъул президент ва республикаялъул аслияв тренер Мухlамад Хlажимухlамадов ва ДРялъул спорталъул хlаязулал тайпабазул школалъул регбиялъул рахъалъ кlудияв тренер Давуд Мухlамадовги.    

Автор Н .Гlалиева. Декабрь 2021 сон. 

Россиялъул тарих бечедаб буго кирго цIар рагIарал лъугьа-бахъиназдалъун, рагъаздалъун, гьезда бихьизабураб бахIарчилъиялдалъун, къо хIехьеялдалъун, бихьинчилъиялдалъун. Кинаб заман босун хал гьабуниги, Россиялъул гуч, гьелъул ярагъ ва яргъилал къуватал рукIана нилъер пачалихъалъул кIудияб чIухIилъун ва тIей гьечIеб бутIалъун. Руго лъугьа-бахъинал, жидеца Россиялъул тарихалда мустахIикъаб бутIа лъурал. Гьел халкъалъул рекIелъ даималлъун гьариялъе, ВатIан цIунулаго хваразул цIарал мустахIикъаб къагIидаялда кIодо гьариялъул мурадалда 1995 соналдаса нахъе Россиялда кIодо гьарулел руго рагъулаб реццалъул къоял. Гьал гIагарал къоязда нилъеца кIодо гьабизе буго Советиял аскараз Москваялда гъоркь тушманасда дандечIей гьабиялъул хIурматалда кIодо гьабулеб къо.

Автор. Н. Гlалиева. Ноябрь 2021 сон.  

Гьал къоязда гIумруялъул 80 сон тIубалеб буго Хунзахъ росдал жамгIияй хIаракатчIужу, гIун бачIунеб гIелалъе лъайгин-тарбия кьеялъе тIубараб гIумруго кьурай Ахъбердиева Умужат Иманшапиевнаялъ. Умужат ккола рагъул соназул лъимер. Лъабго сон барав васги, жеги эбелалъул ургьийго йигей ясги тун уна гьелъул эмен Ахъбердиев Иманшапи КIудияб ВатIанияб рагъде ва гьениса тIокIав тIадги вуссунаро. Бищунго захIматал рагъул соназ гIагараб ВатIан цIунизе арав бетIергьанчиги тIад вуссинчIого, бесдал лъималазул тIалаб-агъаз тIаде ккола гьелъул эбел Ахъбердиева ПатIиматиде. Гьелъ лъимал гIезарула намус бацIцIадаллъун, захIмат хирияллъун, магIарул гIадатги, гIаданлъи нухги цIунараллъун. Кьуна гьезие тIадегIанаб лъайги. ТIалхIат Иманшапиевич ккола тIадегIанаб категориялъул терапевт, Дагъистаналъул мустахIикъав врач, Умужат Шапиевна махщел камилай педагог.