3 декабралда рагlалде бахъана Челябинск шагьаралда тlобитlараб боксалъул рахъалъ Россиялъул чемпионат. 8 къоялъ халатбахъараб турниралда гlахьаллъи гьабуна улкаялъул 48 батlияб регионаздаса 180 спортсменкаялъ. Дагъистанлъул тlаса бищараб командаялда гъорлъ 66 килограмм цlайиялда чемпионаталда гlахьаллъана нилъер ракьцояй Сагlадат Тlалхlатоваги. Гьей рингалде яхъана лъабго нухалъ ва щибаб нухалда бергьенлъиги босун иргадулаб нухалда яхъана улкаялъул чемпионкалъун. Гьеб ккола Сагlадатил Россиялъул чемпионаталъул анкьабилеб меседил медаль. Финалалда Сагlадатица 5-0 хlисабгун ракlчlараб бергьенлъи босана Москваялда боксер Анастасия Эсманида тlад.
"Узухъда дида ургъел чlван букlана турнир байбихьилелде. Щайгурелъул, гьеб букlана 66 килограмм цlайиялда дир тlоцебесеб турнир, гьанжелъагlан дун цее яхъунаан 69 килограмм цlайидул категориялда ва хlинкъи букlана цlияб категория дие данде ккеларилан. Амма гьеб гlададисеб ургъел букlун буго. Кутакалда рекъон ккана дие цlайидул гьеб категорие. Гьелда абула кlиабилеб гьоркьохъеб категорие абун. Цебе 69 килограмм цlайиялда цее яхъунеб мехалъ гlезегlан захlматго букlана дие. Щайгурелъул, рингалда дида данде рахъунел спортсменкаби лага-черхалъ гlезегlан дидаса чlахlиял рукlиндал, гьединлъидал цlикlкlун хlалги кколаан. Гьанжейин гlемерго бигьалъана дие. Исанасеб турнир гlуцlун букlана тlадегlанаб даражаялда, тlолабго шагьаралда киса-кирго чlван рукlана афишаби. Тlоцебесеб нухалда букlана руччабазул чемпионаталда бергьарал ясазе автомобилал сайгъат гьарулел. Гьединго тlоцересел бакlал ккуразе кьуна чемпионлъиялъул поясал, медалал ва гlарцулал сертификатал. 5-0 хlисабгун бергьенлъи босизе кlваниги, бищунго захlматаблъун дие букlана финалалда къеркьезе. Щайгурелъул, дида данде йикlана гlезегlан махщел бугей, лъикlай спорстменка. Ниж чанго нухалъ сборазда цадахъ ккун рукlана ва цоцада лъикl лъалаан”, - ян бицана нижее Сагlадатица. 
Баркула нилъер спортсменкаялда улкаялъул чемпионаталда босараб иргадулаб бергьенлъи, гьарула щулияб сахлъи ва жеги чlахlиял бергьенлъаби! 

И. Мухlамадов