19 январалда райадминистрациялда тlобитlана районалъул терроризмалда данде чlараб комиссиялъул (АТК) иргадулаб данделъи. Гьелда гlахьаллъи гьабуна районалъул бетlерасул заместителаз, ихтиярал цlуниялъулгун къуваталъулал ва рухlиял идарабазул вакилзабаз, АТКялъул членаз, райадминистрациялъул хlалтlухъабаз ва цогидазги.
Данделъиялда гьоркьор лъурал суалаздасан рукlана районалъул АТКялъ 2021 соналъ гьабураб хlалтlул хlасилал гьари, 2019-2023 соназда терроризмалъул идеологиялде данде къеркьеялъул комплексалъулаб планалъул тадбирал тlуразари, районалда ругел мажгитазул документал хlадури ва диниял учреждениязул паспортизация гьабиялда хурхарал суалал.
Тlоцебесеб суалалда хурхун баян кьуна районалъул бетlерасул заместитель, АТКялъул секретарь Хlамид Гьитlиновас. Гьабсагlаталда районалда бугеб ахlвал-хlалалда рекъон аслияб хlинкъи рагlула ихтияр гьечlого яргъид гlуцlарал бандазул (НВФ) гlахьалчагlи тlадруссун районалде рачlине рес букlиналъул ва цо-цо росабалъ вагьабиязул рахъ кколел чагlи камун гьечlолъиялъул. Полициялъул баяназда рекъон араб соналъ районалда терроризмалда хурхараб цониги такъсир ккун гьечlо. Гьединго кlвар бугеблъун хутlулеб буго "кьижарал ячейкаби" тlатинариялъул суалги. Терроризмалъул профилактика гьабиялъул мурадалда тlобитlун буго 4 данделъи, гьениб гьоркьоб лъун буго 18 суал. АТКялъул хlукмаби тlуразариялъул мурадалда районалъул 86 лъай кьеялъул гlуцlиялъул паспортизация гьабун буго. Маданияталъул объектазул паспортизация гьабиги рагlалде бахъунеб буго. Амма диниял учреждениязул паспортизация гьабиялъул хlалтlи хадуб бехъерхъун хутlун буго. Киналго лъай кьеялъул гlуцlабазда лъун руго видеокамераби, тревогаялъулал кнопкаби ва металлодетекторал. Экстремизмалдегун терроризмалде данде къеркьеялъул бутlаялда тlадаб даражаялда федералияб закон тlубазабичlолъиялдалъун бадибчlваял гьаруна 42 лъай кьеялъул гlуцlабазул нухмалъулезе. Профилактика гьабиялъул мурадалда районалъул киналго лъай кьеялъул учреждениязда диниялгун жамгlиял гlуцlабазул вакилзабиги гlахьал гьарун, тlоритlун руго цlалдолел мекъаб идеологиялде данде чlезе ахlарал тадбирал. Гlаммаб къагlидаялъ 2021 соналда жаниб тlобитlун буго 52 профилактикияб гара-чlвари. Профилактикаялъул киналго субъектаз лъай кьеялъул гlуцlабазул цlалдолелгун тlобитlун буго 76 дандчlвай. Интернеталда ва телевидениялдасан бихьизабун буго 64 материал. Районалъул газеталда щибаб кварталалда рахъун руго терроризмалдагун экстремизмалде данде чlезе ахlарал материалал. Бакlалъулаб телевилениялдаса кидаго къватlире риччала экстремизмалде данде чlеялъул бицунел передачаби. Районалъул нухмалъи, цlар рагlарал спортсменал, жамгlиял хlаракатчагlи, рухlиял церехъаби ва цогидалги машгьурал гlадамал гlолилал мекъаб нухде ккечlого рукlине вагlза-насихlатгун цере рахъуна. Араб соналъ бищунго лъикlаб даражаялда рехсараб хlалтlи гlуцlун букlана бакlалъулаб телевидениялъул, райадминистрациялъул лъай кьеялъул, гlолилазулгун спорталъул, ва ДРялъул Муфтияталъул нилъер районалда бугеб пропагандаялъул отделалъ.
Районалъул мажгитазул документал ва диниял учреждениязул паспортизация гьабиялъул бицана районалъул имамасул заместитель Бацlалов Мухlамадица. Жакъа къоялде жеги цонигиялъул документал тlубанго хlадурун гьечlо.
Щибаб суалалда хурхун гьарурал кlалъаязухъги гlенеккун, АТКялъул членаз къабул гьаруна рекъон кколел хlукмабиги.
И. Мухlамадов.
|
