1998 соналдаса нахъе щибаб соналъул ноябрь моц1алъул ахирисеб гьат1ан къоялда нилъер улкаялда к1одо гьабула Эбелалъул къо.
Исанаги рохалилаб ах1вал-х1алалда к1одо гьабуна гьеб гьайбатаб байрам нилъер районалъул маданияталъулгин х1ухьбахъиялъул централда. Гьелде ах1ун рук1ана лъимал г1емерал улбул, бесдалал хьихьарал, жалго г1ажизго хут1арал улбул.
Улбузда рохалилаб байрамги баркун данделъи рагьана ва ахиралде щвезег1ан эбелалъул х1акъалъулъ цояздаса цоял берцинал раг1абиги абун гьеб берцинго бачана районалъул администрациялъул культураялъул отделалъул заведующая Жавгьарат Хъайитмазовалъ.
Эбел-ккола нилъер г1умруялъул мат1у, нилъее г1умру кьурай, нилъ г1езаюрай, лъик1аб-квешаб малъун нилъ г1умруялъул бит1араб нухде ячуней г1адан. Нилъер районалъул администрациялъги ц1ик1к1араб к1вар кьолин эбеллъи ва лъимерлъи ц1униялде, хъизанал церет1езариялде,-ян абуна Ж. Хъайитмазовалъ. 
Эбел-ккола нилъер г1умруялъул мат1у, нилъее г1умру кьурай, нилъ г1езаюрай, лъик1аб-квешаб малъун нилъ г1умруялъул бит1араб нухде ячуней г1адан. Нилъер районалъул администрациялъги ц1ик1к1араб к1вар кьолин эбеллъи ва лъимерлъи ц1униялде, хъиназал церет1езариялде,- ян абуна Ж. Хъайитмазовалъ. Хадуб баркиялъулаб к1алъай гьабизе раг1и кьуна живго Нурмух1амад Махсут1х1ажиевичасеги. Нурмух1амадица нилъер улбузе к1удияб къиматги кьун, бич1ч1изабуна пачалихъиял х1алт1абазда цадахъго, рукъалъул маг1ишат бачуней, лъималазе тарбия-лъай кьеялъулъ ц1ик1к1унисеб бак1 кколей, районалъул социалиябгун экономикияб бут1а цебет1езабиялъулъ к1удияб бут1а лъолей ч1ужуг1аданалъул к1вар. Гьес нилъер бах1арчиял, зах1мат хириял, нилъер рокьулел улбузда гьезул гьайбатаб байрамги баркун, раг1и кьуна хадубккунги нилъер улбузул ва лъималазул г1умру т1егьазабиялъе жиндасан бач1арабщинаб кумек гьабизе. 
Рек1елъе рортулел хинал раг1абаздалъун улбузда рохалилаб байрамги баркун, районалъул руччабазул Советалъул председатель Пат1имат Набиевалъ улбузде бугеб жиндирго х1асратаб рокьиги загьир гьабун абуна, эбел цо къоялъ гурейги, лъаг1алил щибаб къоялъ к1одо гьайизеги, къимат-къадру гьабизеги мустах1икъай йигила, эбелалъул борч т1убазабун, нилъер обществалъул бук1инесеб-лъимал г1езарулей йик1иналъ гуребги, жамг1ияб г1умруялъул киналго бут1абазда х1алт1улей йик1иналъги, дунялалда рекъел щулалъизабиялъеги, гьелъ лъолеб к1удияб бут1аялъги. 
Нилъер районалда йиго 8-азаргоялдаса ц1ик1к1ун эбел. Гьей щияй к1удияб адабалъе мустах1икъай йик1аниги, жакъа байрамалде ах1ун руго эбелги хун 5-6 лъимер хьихьарал, бищун гьит1инаб лъимералъул 3 сон гурого гьеч1ониги, т1алаб гьабун гьел г1езарулел улбул.
«Улбул ц1уне, улбузул адаб рехуге»,-ян абураб ах1иялда гъоркь улбузда гьезул гьайбатаб байрам баркараб к1алъай бук1ана «Бесдалал гьеч1еб Дагъистан» жамг1ияб г1уц1иялъул нухмалъулей, Дагъистаналъул бесдалазул бабалъун жийго рик1к1уней Раисат Г1усмановалъул. Гьелъ т1оцебе жиндирго ц1аралдасан, хадуб Дагъистаналъул руччабазул Советалъул председатель Интизар…., Дагъистаналъул жамг1ияб палатаялъул вакилзабазул рахъалдасан районалъул руччабазда баркана гьезул х1урматияб байрам. Жиндица нухмалъи гьабулеб г1уц1иялдаян абуна Раисатица,-1100-ялдасаги ц1ик1к1араб лъимер бугила, «Баба»,-ян ах1ун жал аск1оре ине чи гьеч1ел. Киг1анго жидер г1уц1иялъ гьезул к1удияб т1алаб-агъаз гьабулеб бук1аниги, жий гурх1улила эбел гьеч1ого хут1арал лъималазда. Нилъер улбуз кидаго нилъеда аск1ор хут1уларелъул, гьелъ хит1аб гьабуна улбул ч1агого рук1аго ц1унеян.
К1алъазе рахъарал Дагъистаналъул Халкъияб Собраниялъул депутат Хочбар Хочбаровас, райсобраниялъул председатель Мух1амад Мух1амадовас, улбузул рахъалдасан к1алъарай Сабигат Гунашевалъ улбузул х1акъалъулъ абурал берцинал, гьезде бугеб рокьи загьир гьабурал раг1абазги, бит1ахъе, асир гьарун рук1ана улбул.
Рек1ее ц1акъго к1удияб асар гьабулеблъун бук1ана щияй т1аде ах1арай эбелалъе районалъул нухмалъулес, райсобраниялъул председателас т1угьдулгун сайигъат кьолеб лах1затги.
Лъималазе тарбия кьеялъулъ лъураб к1вах1 лъалареб зах1маталъе, хъизан щула гьабиялъе г1оло к1одо гьаюна районалдаса чанго ч1ужуг1адан-эбел. Гьединго Москваялдаса «Нуц1би рагьулаго рак1ал рагьулел» абураб программаялда рекъон, улкаялъул бат1и-бат1иял регионазда г1адамазул г1умру-яшав лъазабизелъун сапарал т1орит1улел делегациялъул вакилзабазе лъик1аб гьоболлъи г1уц1арал руччабазеги.
Байрам берцин гьабун бук1ана улбузе куч1дул ах1ун, кьурдаби гьарун гьезул рак1ал рохизарурал Хунзахъ №1, №3 лъималазул ахазул гьит1ичаз, Хунзахъ №1 гьоркьохъеб школалъул ц1алдохъабаз, Хунзахъ ва Болъихъ районазул культураялъул рукъалъул х1алт1ухъабаз ва г1емерал цогидазги.
Байрам ана рохалилаб ах1вал-х1алалда. Улбуз рак1-рак1алъулаб баркала кьолеб бук1ана жидее г1уц1араб лъик1аб х1ухьбахъиялъулъ ва сайигъатазухъ районалъул нухмалъулев Нурмух1амад Махсут1х1ажиевичасе, руччабазул советалъул председатель П. Набиевалъе.

Н. Г1алиева.