Тlолабго удкаялдаго гlадин бигьаяб букlинчlо 2021 сон нилъер районалъеги. Жеги тlубанго лъугlун гьечlеб коронавирусалъулаб инфекциялъ хlинцлъизабуна районалъул цебетlей. Амма кин букlаниги, дандчlварал захlмалъабиги къинарулаго, цо хасаб къадаралъул хlалтlи гьабуна исана муниципалитеталда. 2021 соналъ районалъ гlахьаллъи гьабуна 9 пачалихъияб программабаздагун проектазда. Гьезул гlемерисел гьабсагlаталдаги гlумруялде рахъинарулел руго. 
Социалиябгун-экономикияб цебетlей.  2020 соналда жаниб районалда гьабураб даран-базар ва бича-хиси бахана 2,3 млрд гъурщиде, 2,3 млрд гъурщиде т1уразарун руго хъулухъал, цебесеб соналде данде ккун гьеб кколеб буго г1ага-шагарго 106% ва 105%.  Бакlалъулаб нухмалъиялъул хlалтlул рахъи кьеялъе кьураб къиматалда рекъон 2020 соналъ мугlрузул районазда гьоркьоб Хунзахъ районалъе щвана кlиабилеб бакl. 
Инвестициял. Районалда унеб буго районалъул экономикаялде жанисел ва къватlисел инвестициял рачlинариялъе мурадалда хасаб хlалтlи. 
Республикаялъулаб инвестиционнияб программаялда рекъон Гlараниб балеб буго 308 цlалдохъанасе бакl бугеб школа, сметаялда рекъон гьелъул багьа буго 352 , 1 млн гъурущ. 73,3 млн гъурущги харж гьабун 150 лъимералъе бакl бугеб школа балеб буго Гlобода росулъ. Гьединго Гlарани росулъ унеб буго 27, 5 млн гъурщиде цlиял лъел мухъал рачиналда ва канализация гьабиялда хурхун хlалтlаби. "Жилье и городская среда" проекталъул "Формирование комфортной городской среды" абураб программаялда рекъон 1,8 млн гъурущги харж гьабун Харахьи бана 1300 кв м гlатlилъи бугеб парк, Буцlра росулъ 1,6 млн гъурщиде бана 800 кв м гlатlилъи бугеб парк. "100 школа" проекталда рекъон 4,4 млн гъурщиде капиталияб ремонт гьабуна Хунзахъ гьоркьохъеб тlоцебесеб школалда. Районалда гlатlидго гlумруялде бахъинабулеб буго "Местные инициативы" программа. Гьелда рекъон рагlалде рахъунел руго 5,6 млн гъурщиде Гьитlинаб Гьоцlалъ садикалда, 4,3 млн гъурщиде Хъахlикlкlалахъ росдал клубалда ва 2,7 млн гъурщиде Тlагьада библиотекаялъул минаялда капиталиял ремонтал. Гьединго 2,5 млн гъурщиде къачlалеб буго Гьоцlалъ паркалъулаб зонаялда сверухълъи. Ремонт гьабулеб буго Гиничукь халкъияб лъел мухъда. "Дир дагъистан - Дир нухал" регионалияб проекталда рекъон 14 млн гъурщиде 2 км манзилалда хъил тlуна Гьацlалухъ росулъе. 2021 соналъ рагlалде рахъана 57,8 млн гъурщиде 6 км манзилалда Гlарани-Гlобода нух къачlаялда хурхун хlалтlаби. "Комплексное развитие сельских территорий" программаялда рекъон Хlариколо 2,7 млн гъурщиде бана паркалъулаб зона. Бакlалъулаб бюджеталъул сурсатазде гlаммаб къагlидаялъ 1,3 км манзилалда хъил тlуна хъил тlуна Хунзахъ, Гьоцlалъ ва Гlобода росабалъ ругел нухазде. 1000 цlикlкlун кв м гlатlилъиялда хъил тlуна цlа свинабиялъулгун хвасар гьариялъул часталъул ва Гlарани автостанциялъул территориязде. 500 метрадул манзилалда бетон тlуна Цlелмес росулъе унеб нухде, гьединго къачlана Гlочlло росулъ нух. Тlануси 620 метрадул манзилалда цадахъго тротуарги гьабун, хъилги тlун къачlана нух. Лъагlилухъ ва Текитlа росабалъ гъоркьан къадалги гьарун щула гьаруна нухал.
Ремонт гьабуна Бакьагьечlиб садикалда, Загlиб садикалда тlадеги бана цоги мина. Рагlалде бахъунеб буго харахьи садикалде тlадеги балеб бугеб мина.  
Росдал магlишат.  Районалъул росдал маг1ишаталде гъорлъе уна 114 предприятие, 33 КФХ ва 7659 ЛПХ. Аслияб къаг1идаялъ гьез г1езабула могьолал культураби, овощал, гьан, рахь ва квас. 2020 соналъул 11 моц1ида жаниб районалда г1аммаб къаг1идаялъ г1езабураб росдал маг1ишаталъул продукциялъул багьа бахана 2 млрд гъурщиде. Гьеб ккола цебесеб соналдаса 6% цlикlкlун. Районалда буго 340 гектар пихъ кьолел ахазул. Киналго тайпабазул магlишатазда буго 25100 бетlер чlегlербоцlул, гьездасан 13900 гlака, 235000 цlикlкlун бетlер гlи-цlцlаназул, гьездасан 50000 бетlер тайпадулаб гlиял. Г1езабун буго 8160 т могьолал культурабазул,  6589 т картошкадул, 2550 т овощазул, плоды и ягоды - 755т, 3664 т гьанал, 25300 тонна рахьдал.
Районалъул магlишатазда хасаб къадаралъул хlалтlи гьабуна гlи-боцlуда хасел тlамизабиялде хlадурлъиялъе. Жамгlияб секторалъул магlишатазда хlадурун буго 45 000 т хъачlаб рагlи-хералъул, гьелдасан 4400 т бакъвараб харил, 1000 т соломадул. Росдал магlишаталъул отделалъ гочинабун гlи-боцlи хьихьулел ракьал рахъи кьоледухъ хlалтlизарулел ругищали халгьабиялъул мурадалда тlобитlана мониторинг ва къимат кьуна щибаб магlишаталъ жидерго рекьулел ракьал хlалтlизарулел ругеб къагlидаялъе. Гьедин рекьулел ракьал дагьабго къадаралда гурони хlалтlизарулел гьечlо  "Гьамиштlа", "Гьамущи", "Кlахъ", "Гlебутlа", "Цlияб гlумру", "Мочlохъ", "Байикь", "Гиничукь" ва Тельманил цlаралда ругел СПКязда. Гьединго районалъул кlиго магlишатаз - "Стела" ва "Машгьурал гlадамал" СПКяз гlахьаллъи гьабуна Минеральные воды шагьаралда тlобитlараб тlолгороссиялъул тайпадулаб гlи-цlцlаназул выставкаялда ва тlоцересел бакlал ккуна.
Лъай кьей. Районалъул нухмалъиялъ хасаб кlвар кьолеб буго лъималазе лъай кьеялда, лъимералъул физическияб, интеллектуалияб, рухlиябгун моралияб ва социалияб цебетlей щвезе бугеб ихтияр щула гьабиялъулъ бугеб социалияб политикаялъул принципал гlумруялде рахъинариялде. 
Гьабсагlаталда районалда хlалтlулеб буго 1712 лъимералъе бакl бугеб 42 школалда цебесеб лъай кьеялъул учреждение, гьездасан гочинабун гlи-боцlи хъихьулел ракьазда буго 4 учреждение. Районалъул школазул 99,7% хlалтlулел руго тlоцебесеб сменаялда. 11 классазул 19 выпускниказе щвана "За особые успехи в учении" медалал. Гьоцlалъ гьоркьохъеб школалъул цlалдохъан Тlалхlатова Айизмеседоца бергьенлъи босана тlолгороссиялъул "Кlудияб перемена" конкурсалда. Лъай кьеялдъул бутlаялда бугеб аслияб гlунгутlилъун ккола цо-цо садиказда киналго лъималазе гlурал бакlал гьечlолъи. Хlажат буго Хунзахъ, Гlорутlа, Гьамущи ва Накlкlикь росабалъ цlиял лъималазул ахал разе. "Лъай кьей" абураб нацпроекталда рекъон районалъ гlахьаллъи гьабулеб буго кlиго регионалияб проекталда. "Современная школа" проекталда рекъон исана Харахьи, Мочlохъ, Тlагьада ва Хунзахъ кlиабилеб школазда рагьана "Точки ростаялъул" 4 центр. Октябралда Хунзахъ тlоцебесеб ва цlияб Буцlра школазе щвана цlиял транспортал. 
Физкультура ва спорт. Районалда хlалтlулеб буго 52 спортивияб сооружение, гьездасан 8 мини-футболалъулаб площадка ва 11239 кв м гlаммаб гlатlилъи бугеб 23 спортивияб зал. 
Районалъул спорстменаз жигараб гlахьаллъи гьабула гlемерисел районазда гьокьосел, республикаялъулал, СКФОялъул ва тlолгороссиялъулал турниразда ва призалъулал бакlал ккола. Токиоялда тlоритlарал Олимпиялъул хlаязда гlахьаллъи гьабуна районалдаса лъабго спортсменаз- Айзанат Муртазаевалъ ( фехтование). Сагlадат Тlалхlатовалъ (бокс) ва Канадаялъе цеве вахъунев Руслан Гъазиевас (лъим ххай).   
Эркенаб гугариялъул рахъалъ 2007-2008 соназ гьарурал гlолилазда гьоркьосеб турниралда районалдаса лъабго спорстменасе щвана призалъулал бакlал - Исламудин Нурмухlамадов (2 бакl), Мухlамад Гlабдусаламов (3 бакl) ва Мухlамад Дадаев (3 бакl). Спорталъул гьебго тайпаялда Бахlрейналъе цеве вахъунев Гlалибег Гlалибегов 62 кг цlайидул категориялда вахъана гlолилазда гьоркьосеб  дунялалъул чемпионаталда лъабабалиев призерлъун. Журарал единоборствабазул рахъалъ Европаялъул чемпионлъун вахъана Рамазан Гьитlинов. Кlиабилеб бакl ккуна Шамил Гlалихановас. 21 ноябралда Таллин шагьаралда тlобитlараб дунялалъул Кубокалда Россиялъул тlаса бищараб командаялда гъорлъ меседил медаль щвана нилъер ракьцояй Айзанат Муртазаевалъе. Анкьабилеб нухалдаги улкаялъул чемпионкалъун яхъана нилъер чlухlи Сагlадат Тlалхlатова. Регбиялъул рахъалъ 2008-2010 соназ гьарурал гlолилазда гьоркьосеб республикаялъул чемпионаталда ва первенствоялда тlоцебесеб ва лъабабилеб бакlал росана районалъул командабаз. 2005-2006 соназ гьарурал гlолилазда гьоркьоб тlобитlараб волейболалъул рахъалъ Россиялъул первенствоялдаса кlиабилеб бакlгун руссана Дагъистаналъул команда. Аслияб къагlидаялъ гьеб гlуцlун букlана нилъер районалъул спортивиял школазда куцарал спорстменаздасан. Гьединго 2006-2007 соназ гьарурал гlолилазда гьоркьосеб республикаялъул волейболалъул первенствоялда бергьенлъи босана районалъул тlаса бищараб командаялъ. 
Культура, гlолилазул политика ва туризм. Районалъул маданияталъул ва г1олилазул политикаялъул бут1абазда х1алт1и г1уц1ун бук1уна районалъул киналго идарабазулгун хъулухъазул щулияб цадахъаб х1аракаталдалъун, хасго лъай кьеялъул, спорталъул, ихтиярал ц1унулел, г1олилазулгун жамг1иял г1уц1абазулгун, бак1алъулаб телевидениегун ва «Росдал зах1матчи» газеталъул редакциягун цадахъ. 2021 соналъ гlолилазул политикаялда ва маданияталда хурхараб хlалтlул бищунго аслияздасан цояблъун букlана ДАССР гlуцlаралдаса 100 сонилаб юбилей кlодо гьаби. Гьелда хурхун районалда тlоритlана гlемерал тадбирал. Гьединго районалда кlодо гьаруна киналго байрамал. Коронавирус сабаблъун тlубан батlияб Дагъистан ва хасго Хунзахъ район рагьана Россиялъул халкъазе. Гьедин, 2021 соналъ районалде вачlун вуго 200 азаргогlан турист. Гьелдаго цадахъ дагь-дагьккун районалда цебетlун унеб буго туризмалъе хlажатаб инфраструктураги. Некlогоялдаса нахъе цlигьабун букlинчlо районалъул централияб библиотекалъул фонд. 2021 соналъ районалъул централияб библиотекаялде рачlана 526 азарго гъурщиде 1630 цlияб тlехь. Гьезда гъорлъ руго гlемерал лъималазул тlахьал. Руго Дагъистаналъул басмаялда рахъарал магlарул классиказул тlахьалги.  

            
И. Мухlамадов.