Гьал къоязда Ц1адаса Х1амзатил ц1аралда бугеб Авар театралда т1обит1ана Дагъистаналъул халкъияй поэтесса, маг1арулазул машгьурай шаг1ир ва драматург Батирова Залму Мух1амадовна гьаюралдаса 80 сон т1убаялъул х1урматалда юбилеялъулаб вечер.
Гьеб х1урматияб дандеруссиналде рак1арун рук1ана Дагъистан Республикаялъул культураялъул Министерствоялъул, хъвадарухъабазул Союзалъул вакилзаби, Залму Мух1амадовнаялъул творчество бокьулел ва гьелъие къимат кьолел хъвадарухъабигун поэтал, пишацоял, гьелъул росуцоял, хъизан-лъимал.
Нилъер районалъул ц1аралдасан халкъияй поэтессаялда баркиялъулаб к1алъай гьабизе вахъун вук1ана райадминистрациялъул бет1ерасул заместитель Асадг1али Г1абдуразакъов.
Нилъер район бечедаб бугин,-ян абуна гьес машгьурал хъвадарухъабаздалъунги шаг1ирзабаздалъунги. -Гьезда гьоркьоб бихьулеб бак1 ккола Залму Батировалъ. Гьелъул Ват1аналде хъварал асараз щивав чиясул рек1елъ гъваридал лъалк1ал тола, г1акъилал насих1аталги, малъа-хъваялги киналго г1елазе г1акълулъун ч1ола.
К1алъазе рахъарал Дагъистаналъул культураялъул Министрасул заместитель Мурад Х1ажиевас, РАНалъул ДНЦялъул ИЯЛИялъул бет1ерав г1елмияв х1алт1ухъан Мух1амадов Мух1амад Ибрагьимовичас, Пачалихъияб Думаялъул депутат Сайгидпаша Г1умахановас, Сириялдаса поэт Ибрагьим Стамбульскияс ва г1емерал цогидазги к1удияб къимат кьуна Залму Батировалъул творчествалъе. Гьезул церерахъиназдасан бич1ч1улеб бук1ана залму Мух1амадовнаялъул асаразде гьезул бугеб рокьи.
«Залму Батировалъул г1умру ккола къанаг1атаб мисаллъун, хасго гьанже заманалда, нилъер ц1ияб тарихалда, ай жиндир творчествалдалъун жамг1ияталда гьоркьор моралиял къанунал т1ирит1изарулеб ва жинцагоги гьезда рекъон кколеб г1умру гьабулеб заманалъул шаг1ирзабазе. Гьей кколаро гьури пулеб рахъалде юссуней флюгер-гьей йиго заманалъул хасият хехго бич1ч1улей, рентгеналъ г1адин гьанжесеб г1елалъул жанисеб дуниял бихьулей ва гьеб загьир гьабулей шаг1ир (Мух1у Г1алиев).
Дагъистан Республикаялъул Х1укуматалъул председателасул ва ДРялъул культураялъул министрасул ц1аралдасан к1алъазе вахъарав Мурад Х1ажиевас абуна: «Дур куч1дул, тарихиял ва рокьул поэмаби-гьел ккола Ват1аналъе рит1ухълъиялъул, гьелъул т1адаб борч т1убазабиялъул, г1умруялъул накъитазул, даимаб рокьиялъул ва биххулареб гьудуллъиялъул бицунел рух1иял гара-ч1вариял.
Гьединлъидал бат1и-бат1иял миллатазул г1адамазулцин рокьи ккола дур творчествоялъухъ».
Мурад Х1ажиевас творчествалда рихьизарурал к1удиял бергьенлъабазе ва г1емерсоназулаб рахъи бугеб творческияб ишалъе г1оло поэтессаялъухъе кьуна Дагъистан Республикаялъул культураялъул министрасул баркалаялъул кагъатги.
Юбиляралъул вечер берцин гьабун бук1ана Авартеатралъул артистазул, «Лезгинка»-школа студиялъул, Ч1арадаса церерахъиназ.
Ахиралда Залму Батировалъ рак1-рак1алъул баркала загьир гьабуна жий к1одо гьаюн юбилей т1обит1араб Хунзахъ росдал администрациялъе, гьезие кумекалъе ч1арал Авар театралъул артистазе, Ч1арадисезул хоралъе ва т1олалго юбилеялда г1ахьаллъаралщинал гьей ва гьелъул творчество бокьулел гьудул-гьалмагъзабазе, т1аде рач1анщинал гьалбадерие.
Н. Г1алиева
Вечер ана ц1акъго хинаб, рек1ее к1удияб асар гьабулеб ах1вал-х1алалда. Киназулго рек1елъ гьеб бук1ина лъик1ал гьудул гьалмагъзабазда гъорлъ т1обит1араб лъик1аб х1ухьбахъилъун.
Н. Гlалиева.
|