Исанаги тlолабго улкаялдагогlадин, нилъер районалдаги кlодо гьабуна Кlудияб Ватlанияб рагъ лъугlаралдаса 79 сон тlубай. Цебеккунго гlуцlараб комитеталъ хlадурараб программаялда рекъон, байрамкъоялде хlадурун букlана чанго тадбир. Апрелалъул ахиралдасан байбихьун, районалда тlоритlана чанго субботникал, рацlцl-ракъалъи гьабун, рукlалиде рачана росабалъ ругелщинал Кlудияб Ватlанияб рагъул гlахьалчагlазе рарал памятникал, плакаталги ран берцин гьарун рукlана къватlал ва цо-цо учреждениязул минаби. Украинаялда хасаб рагъулаб операция унеб букlиналда бан, исанаги хасаб кlвар кьолеб букlана байрамалъул гlахьалчагlазул хlинкъи гьечlолъиялде.

Байрамалъулал тадбиразде байбихьана 8 маялъго. Тlоцебе райадминистрациялъул жанахlалъуб рагьана СВОялда къадаралде щварал гlолохъабазул стенд. Хадуб, гlадатлъун лъугьахъе, райцентралда бугеб памятникалда лъуна тlугьдул. Гьенисан киназго сапар бухьана СВОялъул къурбанал ракlалде щвеялъул мурадалда росдал рагlалда, “Гъвалдакь” абулеб бакlалда балеб бугеб ахикье. Гьениб, гор сверун 400 метрадул манзилалда сверун къараб территориялда чlун буго 70 цlикlкlун пихъил ва махил гъутlби ва хlадурулеб буго хlохьбахъиялъе гlодор чlезе беседка. Муниципалитеталъул бетlер Нурмухlамад Задиевас, васал чlварал улбуздехун вуссун абуна, паркалда хурхун гьезул ругел предложениялги къабул гьаризе ругилан. Гьелдаса хадуб киналго ракlарана Ш. Шамхаловасул цlаралда бугеб маданияталъул кlалгlаялда ДДТялъул хlалтlухъабазул хlаракаталдалъун бахъараб фильмалъухъ балагьизе. Цlакъ рекlелъе бортиледухъ хlадурун бугоан гьез гьеб, гьелъухъги балагьун чангиязда кlолеб букlинчlо магlу кквезе. Муниципалитеталъул нухмалъулес рехсараб гlуцlиялъул директор Мухlамад Раджабовасе кьуна баркалаялъул кагъатги. Гьебго къоялъ, къалъудаса хадуб Тlануси тlобитlана цlигьабун къачlараб памятник рагьи. Кlалъаял гьаруна Нурмухlамад Задиевас, военком Шамил Мухlамадовас, росулъа СВОялъул гlахьалчи Мухlамад Айгубовас ва цогидазги. Росдал школалъул цlалдохъабаз рикlкlана кучlдулги.    

 9 май байбихьана радалго Цlада “Хъахlал къункъраби” мемориалияб комплексалда эбелалъегун лъимералъе гьабураб памятникалда цебе тlугьдул лъеялдасан. Тlобитlана байрамалъулаб митинг ва 100 цlикlкlун автомобилалъ гlахьаллъи гьабураб “Хвел гьечlеб автополк” абураб акция. 
Тlануси росулъ байбихьана санайил 9 маялъул хlурматалда районалъул росабазул командабазда гьоркьоб тlобитlулеб волейболалъул турниралъул финалияб хlайги. Турнир байбихьун букlана цересел къояздаго, финалияб хlай тун букlана байрамкъоялъ тlобитlизе. Гьелде рорчlун районалда тlоритlулел волейболалъул турниразул кидагосел финалистал - Хунзахъ ва Тlануси росабазул командаби. Бищун лъикlал командабазул къецалъухъ балагьизе рачlараз занкlун цlун букlана спортзал. Жибго хlаялда 2-0 хlисабгун райцентралъулазда тlад ракlчlараб бергьенлъи босана тlанусдерил волейболистаз. Лъабабилеб бакl щвана Гьацlалухъ росдал командаялъе. Призалъулал бакlал ккуразе кьуна гlарцулал сайгъатал, грамотаби ва кубок.   
Гьелда цадахъгогlадин “Гlалагlарт” майданалда байбихьана гlемерисезе бищунго интерес букlунеб чуял риччаялде. Гьедин, 7 сверуда бергьенлъи босана Гlахьалчlиса Мухlамадов Хlайбулагьил чуялъ (гlарцулаб сайгъат - 35 000 гъурущ), кlиабилеб бакl щвана районалъул бетlерасул цlаралда биччалеб букlараб Гlорутlаса Мухlамадов Мухlамадил чуялъе (25 000 гъ), лъабабилеб бакlалде бачlана Болъихъ районалъул Беледи росулъа Вагьабов Гlабасил чу (15 000 гъ). 5 сверуда тlоцебе финишалде бачlана Болъихъ районалъул Гlанди росулъа Мухlамадов Гlумарил чу (25 000 гъ.), гьелда хадуб гъуна Хунзахъа Хlайдарбегов Зубайрил чу (15 000 гъ.), лъабабилеб бакl ккуна Хунзахъа Атаев Зайирбегил чоца (10 000 гъ.). 3 сверуда бищун хехаблъун ккана Болъихъ районалъул добго Гlанди росулъа Шахмарданов Адамил чу (15 000 гъ.), кlиабилеб бакl щвана Хунзахъа Къебедов Мухlамадил чуялъе (10 000 гъ), лъабабилеб бакlалде бачlана Буцlраса Гlабдулвагьабов Гlабдулал чу (5000 гъ.). 2 сверуда риччан рукlана гlицlго Хунзахъ районалъул чуялги. Гьелда киналго призалъулал бакlал ккуна райцентралдаса гlахьалчагlазул чуяз. Бергьенлъи босана Хlажиев Малахlумил “Мираж” чуялъ (10 000гъ.), кlиабилеб бакl щвана Мухlамадов Ахlмадил “Шах” чуялъе (5000 гъ.), лъабабилеб бакlалде бачlана Сулейманов Мухlамадил “Аят” чу (3000 гъ.). Чуял риччан рахъингун, тlоритlана рекерухъабазда гьоркьор къецалги. Гьедин, 1200 метрадул манзилалда тlоцебе финишалде щвана Гlоркlачlиса Мухlамадхlажиев Мухlамад (7000 гъ.).  
Гьединго майданалда гlуцlун букlана “Солдатасул карщ” абураб акцияги. Гьелда рекъон хlадурун букlана 600 гlан чиясе гlураб карщ ва чай.

И. Мухlамадов.