Сонисеб къоялда хут1ана ДОСААФалъул къадруги къиматги, жакъа къоялда гьелъул ирсилаб г1уц1илъун ккола  РОСТО (Российская оборонная спортивно – техническая организация). Цо-цо бак1азда ругилан абизелъун руго гьелъул спортивиялгун техникиял клубал (СТК), автошколал. Амма республикаялда ругелщиназул лъик1азулъ рехсолеблъун ккола Кизилюрталда бугеб РОСТОялъул СТК. Гьелъие нухмалъи гьабулеб  буго нилъер районалъул К1ахъ росулъа  Х1асанов Шамилица. «Лъайгун бажари бугев, инициатива к1удияв» -  гьеле нилъер районцоясул х1акъалъулъ аск1ор х1алт1улезул ва  шагьаралъулазул пикру. Шамилица нухмалъи гьабулеб  автошколалъ х1адурулел руго «В» ва «С» категориялъул машина бачунел.

Щибаб санайилго г1адин гьеб тадбиралъулъ школалъ т1убазабураб  планалъе г1оло СТК  мустах1икълъун буго республикаялъул ва РОСТОялъул г1емерал шапакъатазе,  г1олохъанав х1акимасеги  щун буго ДОСААФалъул бищун т1адег1анаб шапакъат – «Совет Союзалъул лъабц1улго Герой  А. И. Покрышкинил» медаль. Жанир х1алт1улезе лъик1алго шарт1ал, киса-кибего гьабураб ремонт, мисал босизесеб х1алалъ ч1езарурал  гаражалгун мастерсткаял – гьеб кинабго буго Шамилил бажариялдалъун ва жидерго доходаздасан гьабураб х1алт1и. Г1емерго т1орит1улел  руго  автошколалъ лъималазда гьоркьор рагъулалгун патриотикиял тадбирал, гьенибги, шагьаралда т1орит1улел цойгидал спортивиял къецаздаги спонсорлъиялъулаб кумекги ч1езабулеб буго нилъер ракьцояс.

Шамилие хадубккунисеб х1алт1улъ цебет1ейги, рокъоб талих1гун парахалъиги гьарулаго, лъуг1изабулеб буго гьаб макъалаги.

Ф. Мух1амадова