5 февралалда 60 сонилаб юбилей к1одо гьабуна нилъер районцояв, Шотода росулъа Дагъистаналъул культураги тарихги жинда лъик1 лъалев, гьеб цебет1езабиялъе жинца к1удияб бут1аги лъолев, махщел камилав график, живописец Мух1амадов Г1амирхан Нурмух1амадовичас.
Абула искусствоялде бугеб рокьиялъги релъаби х1алт1изаризе лъаялъги художниклъун вахъунарилан, художниклъун вахъине ккани, рек1елъ жанисеб рух1ияб канлъи (гвангъи) бук1ине кколилан. Гьеле гьеб канлъи жиндир суратазулъ лъурав махщел камилав художник вуго Г1амирхан Нурмух1амадович Мух1амадов.
Цох1о Дагъистаналда гуро Г1амирхан Нурмух1амадович машгьурав вугев. Гьев ккола АИ АП «Юнеско»-Халкъазда гьоркьосеб изобразительниял искусствабазул Ассоциациялъул членлъунги.
А. Н. Мух1амадовасул творческияб биографиялда хурхараб буго 2005 соналдаса байбихьун, жакъа къоялде щвезег1анги гьев директорлъун х1алт1улеб, Дагъистаналъул художниказул Союзалъул Церелъеязул залалъул тарихги.
2007 соналда художник к1одо гьавун вук1ана Россиялъул художниказул Союзалъул дипломалдалъун.
2008 соналъ изобразительнияб искусство цебет1езабиялъе жинца лъураб к1удияб бут1аялъухъ гьев мустах1икълъана Россиялъул Федерациялъул культураялъул ва массовыял коммуникациязул Министерствоялъ кьураб баркалаялъул кагъаталъе, гьебго соналъ Сочиялда т1обит1араб «Юг-России-Х» регионалияб цебелъеялъул дипломалъул лауреатлъун, гьединго «пленер» номинациялда бьенале «Шунудаг-2008» дипломалъул лауреатлъун.
2009 соналъ Мух1амадовасе кьуна «Заслуженный работник Республики Дагестан» абураб х1урматияб ц1ар.
Художникасул г1емерисел х1алт1аби руго нилъер Дагъистаналъул муг1рул росабазулги, халкъалъулги арабги бук1инесебги жидеда гъорлъ бихьизабурал, муг1рузул улкаялъул тарихалъул х1акъалъулъ бицунел.
2010 соналъ баркалаялъул кагъат кьуна Г1амирхан Нурмух1амадовичасе Россиялъул Художествалъул Академиялъ, гьебго соналъ «За развитие традиционного искусства России»-номинациялда «Русская галерея-ХХI век» абураб миллияб премиялъул лауреатлъун вахъана ва г1арцул медалалдалъун к1одо гьавуна.
Художникасул свак-зах1маталъухъ балагьич1ого гьабулеб х1алт1ул х1асилазул бицуна гьесул Москваялда т1орит1арал Т1олгороссиялъулал церелъеязда щварал дипломаз ва шапакъатаз.
Жиндирго аслияб творческияб х1алт1и гуребги Г1амирханица к1вар бугеб х1алт1и гьабула спорталдаги. 2014 соналъ Мах1ачхъала шагьаралда физкультура ва спорт цебет1еялъе жинца лъураб бут1аялъухъ гьесие кьуна дипломги ц1арулаб саг1атги.
2014 соналъ Х1ажи Мах1ачевасул ц1аралда т1обит1араб «Патриотизм основа единства, могущества и процветания Дагестана» абураб конкурсалда «Лучшая творческая работа» номинациялда бергьенлъи босаралъухъ г1елмабазул ва маданияталъул Фондалъ Г1амирхание кьуна диплом.
Цойгидал художниказдаса ват1а вахъулеб хаслъилъун буго Г1амирхан Мух1амадовасул республикаялда гуреб х1укуматалдаги ва т1олабго дунялалдаги лъугьа-бахъунебщинаб гьес рик1к1ада бугеб чияр къварилъиян тунгут1и, киназдаго гьесул бук1унеб гурх1ел-ц1обги, жиндасан бажарараб кумек гьабизе бук1унеб х1аракатги, г1адамасдехун адаб-х1урматги, т1абиг1аталдехун бугеб х1асратаб рокьиги. Г1адада гуро гьесие 2016 соналъ Сербиялъул Шид шагьаралда т1обит1араб халкъазда гьоркьосеб пленернияб цебелъеялдаги баркалаялъул кагъат кьураб.
Г1емерал х1алт1аби руго художникасул 19 абилеб г1асруялъул Кавказалъул рагъазул х1акъалъулъ бицунел. Гьел ккола имам Шамилил, 4-лев наиб Х1ажимурадил, Л.Н. Толстоясул портретал.
2017 соналъ Грозный шагьаралда А. Х. Къадыровасул ц1аралда бугеб мемориалияб комплексалда т1обит1араб жиндирго х1алт1абазул цебелъеялда Г1амирхан Мух1амадовасе кьуна баркалаялъул кагъат, гьебго соналъ Москваялда т1орит1ал «Левитановские сезоны» ва «АРТ – Балкан 2017» художественниял проектазул церелъеязда гьесие кьуна х1урматалъулал грамотаби.
Художникасе ц1акъго г1агарал руго К1удияб Ват1анияб рагъул темаялда х1адурарал х1алт1абиги. 1941 соналъ аза-азар дагъистаниялго г1адин Г1амирханилги эменги имг1алги ана гьеб рагъде.
Ват1анияб рагъул темаялда г1емерал руго Г1амирханица рахъарал портретал ва исталляциял. Г1амирхан Мух1амадовасул творческияб х1алт1улъ ц1акъго рахъи кьураблъун бук1анин 2018 сонилан абуни мекъи ккеларо.
Москваялда Россиялъул президентасул рищиязде х1адурулаго Т1олгороссиялъул халкъияб фронталъ Регионазда гьабураб х1алт1ухъ Г1амирхание кьуна Баркалаялъул кагъат, гьединго Москваялда «Дом Озерова» маданияталъул к1алг1аялда т1обит1араб «АРТ-Вояж» цебелъеялда г1ахьаллъи гьабиялъул свидетельство, Англиялъул Шрусбери шагьаралда т1обит1араб халкъазда гьоркьосеб «АРТ-ВОЯЖ» проекталда г1ахьаллъи гьабуралъухъ диплом.
2019 соналъул байбихьуда 55 сонилаб юбилеялъул х1урматалда Г1амирхан Мух1амадовасе «Союз художников России» Дагъистаналъул ВТООялъул Дипломги РДялъул маданияталъул Министерствоялъул баркалаялъул кагъатги кьуна.
Г1амирхан Нурмух1амадович ккола 24 живго бет1ергьанал церелъеязул автор, 160 республикаялъулал, регионалиял ва халкъазда гьоркьосел церелъеязул г1ахьалчи.
Гьесул х1алт1аби ц1унун руго Мах1ачхъалаялда П. Х1амзатовалъул ц1аралда бугеб ДМИИялда, Мах1ачхъалаялъул музеялда, Майкопалда бугеб Северияб- Кавказалъул пачалихъияб музеялъул филиалалда, Москваялда «Московский дом национальностей» Пачалихъияб учреждениялда, Грозныялда Ах1мад-Х1ажи Къадировасул ц1аралда бугеб музеялда, Москваялда «Русская галерея- XXI век» музеялда, Россиялъул маданияталъул фондалда, Москваялда «Ясная поляна» Л.Н. Толстоясул ц1аралда бугеб музеялда, гьединго Тулаялъул, Волгоградалъул, Ростовалъул музеязда ва къват1исел пачалихъазул бат1и-бат1иял коллекциязда.
2020 соналда В. В. Путиница «За бескорыстный вклад в организацию Общественной акции взаимопомощи «Мы вместе» абураб рак1алдещвеялъулаб медалалъул грамотаби кьуна нилъер ракьцоясе. Гьел гурелги жеги г1емерал шапакъатал руго Г1амирхан Мух1амадовасе щварал.
Гьанже Г1амирхан Мух1амадов х1адурулев вуго 5 марталда Мах1ачхъалаялда бук1ине бугеб жиндирго х1алт1абазул цебелъеялде. Рак1алде ккола гьеб цебелъейги балагьаразе лъик1аб асар кколедухъ т1адег1анаб даражаялда инилан.
Бокьун буго юбилейги баркулаго, гьаризе махщел камилав художникасе творческияб цебет1ейги, чорхое щулияб сахлъиги, халатаб рохалилаб г1умруги. Мун г1адинал махщелчаг1и г1емерлъаги нилъер районалда!
Х. Гlаммаева
| 
