Ц1ияб сон – ц1ияб
школа
Буц1ра гьоркьохъеб
школалъул ц1алдохъаби 1-4 классалъул ц1алдохъабазе х1исабалде босараб
минаялда ц1алулел рук1иналъулги учительзабазда ва ц1алдохъабазда дандч1валел
ругел зах1малъабазулги «Рсдал зах1матчи» газеталъ борхун бук1ана. Районалъул
бет1ер Х1. Дарбишевасулги рах1ат
хвезабураб суал бук1ана гьеб. Гьел мухъазул бет1ерасда лъик1 лъалаан гьес араб
соналъго «долгостроялде» сверулеб бугеб
школалъул мина бан лъуг1изе ресал ралагьизе бахъараб х1аракат ва ахирги щварал
ресаздаса Х1ажиясул бук1араб рохел.
Г1арац щун хадуб школа хехал темпаздалъун бан лъуг1изабизеги х1аракат бахъана
районалъул нухмалъулес.
Киг1ан к1удиябги реццалъе мустах1икъаб буго школа бай
бет1ералде босарав «Макьас» ОООялъул нухмалъулев Гь. Адух1овасул ва гьесул киналго гьел
х1алт1ухъабазул х1аракатги. Абизе бегьула жибго школалъул минаялъуб гьабулеб
х1алт1и лъуг1анилан. Къват1исан гьарулел х1алт1абиги раг1алде рахъунел руго.
Киналго х1алт1абиги лъуг1ун, ц1ияб соналъул байбихьуда ц1ияб школалде гочине ругилан бицана школалъул
директор Ш. Х1амзатовас. Гьеб мехалде
школалъул классалгун кабинетал гьанже бач1ине байбихьараб школалъулаб мебелалдалъун ва цогидаб т1аг1елалдалъун
къач1ан лъуг1ана.
Бук1ина спортзалги
Школа баялдалъун лъуг1улеб гьеч1о исана буц1улдерил рохел.
Школа бан лъуг1илалде, базе байбихьана Буц1ра спортзалги. Талих1алъ спортзал
байги районалъул бет1ерас т1адкъана добго ООО «Макьасалъул» нухмалъулев Гь. Адух1овасда.
Гьадигатулагьица жеги
спортзал балеб площадь бит1изабилелдего, лъабабго рахъалъ кьуч1ал рахъана ва
бетон т1уна. Гьес кьурал баяназда
рекъон, спортзалалъул халалъи бук1ине буго 24 м, г1еблъи 12 м. Рук1ине ругила
рет1ел бахъулеб бак1, душевая ва цогидалги спортзалалъе х1ажалъулел квег1енлъабигун санаг1алъаби.
Гьава-бакъалъ рес кьуни, гьаб соналъго
спортзал чердакалде гъоркье буссинабизе
рак1алда бугоан Гь. Адух1овасда. Нижер рак1ч1ола школа балаго г1адинаб жигар спортзал балагоги бахъилин гьесан.
Ниж харабазул хьул буго спортзал, бан лъуг1идалниги
Буц1ра школалъул ц1алдохъабазги росдал
г1олохъабазги жигараб г1ахьаллъи гьабилин районалда т1орит1улелниги къецазулъ,
рахъинин Буц1раги чемпионалгиян. Гьелъие ресал
Буц1ра цогидаздаса къурал гьеч1оан.
Абизе ккола спортзалалъул к1вар цох1о сахлъи щула гьабиялъулъ гуребги, бугилан спорталде
ц1аялдалъун ц1алдохъаби ва школа лъуг1ун х1алт1иги гьеч1ого ругел
г1олохъаби къот1носа рат1а гьарилилан.
Годек1анибе асфальт
т1уна
Районалъул бет1ерас буц1ул
рохизаруна Нахъагодек1анибе асфальтги т1ун. Гьеб буго росдал центр –
гьенире данделъула росдал ц1ик1к1арасел къват1ал. Гьенибго буго мажгит,
мадраса, какичурулеб рукъ ва туалет.
Росдал г1адамал рази руго районалъул бет1ерас Буц1ра
гьарурал лъик1ал ишаздаса. Гьединал
лъик1ал ишалгун рач1унел руго буц1рул ц1ияб 2013 соналде.
Г1иса Г1исаев
| 
