15 февралалда, цебеккун лъазабун букlахъе, Хунзахъ Ш. Шамхаловасул цlаралда бугеб маданияталъул кlалгlаялда тlобитlана районалъул бетlерасул 2023 соналъ гьабураб хlалтlул хlисабкьей. Гьединго гьелда гlахьаллъи гьабуна районалъул прокурор Рамазан Гlумаровас, Централияб больницаялъул бетlерав врач Расул Гlабдулаевас , РЭСалъул начальник Юсуп Расулов, КЦСОНалъул нухмалъулев Зайирбег Атаевас.

Тадбир байбихьана районалъул бетlер Нурмухlамад Задиевас 2023 соналъул хlалтlул хlисабкьеялдасан. Гьес гlатlидго бицана гъоркьисала гьабун бажарараб хlалтlул ва исана церечlарал масъалабазул хlакъалъулъ. Гьелъул хlакъалъулъ нижеца газеталъул араб соналъул ахирисеб номералда кьун букlиндал, гlатlидго хlисаб кьеялъул хъвалеб гьечlо. Муницалитеталъул нухмалъулес абуна исана гьадинал хlисабкьеял щибаб росдал советалдаги тlоритlизе ракlалда бугиланги. Гьединго гьес абуна бакlалъулаб даражаялдаго тlуразе кlолел суалалгун район тун къватlирехун, республикаялде яги жегиги тlадегlан ине кколариланги. Гьебго пикру загьир гьабуна жиндирго кlалъаялда районалъул прокурорасги.  

Районалъул РЭСалъул нухмалъулес жиндирго кlалъаялда бицана араб сон районалъул энергетиказе цlакъ захlматаблъун букlанилан. Гlадамазул гlемер гlарзал рукlунин ток свинабиялъул хlужаби гlемерлъиялда хурхун. Амма жидеца авария ккедал гурони ток свинабуларин ва жидер хlалтlулъ данчlвалел захlмалъабиги ричlчlизе кколилан тlадеги жубана гьес. Исана, лъабго соналъ халат бахъине бугеб хасаб программаялда рекъон, байбихьизе бугин бищунго хlалуцараб ахlвал-хlал бугел Буцlра, Гьоцlалъ, Гlоркlачlи ва Кlахъ росабалъе ругел токалъул мухъал цlи гьаризеян абураб рохалилаб хабарги бицана гьес. Гьединго, кватlичlого, хlалтlизе биччазе бугила араб соналъул ахиралда Лъагlилухъ подстанциялда лъураб къуватаб цlияб трансформаторги. 

Райбольницаялъул бетlерав врачас бицана районалъул сахлъи цlуниялъул бутlаялда бугеб ахlвал-хlалалъул.
“Нилъер сахлъи цlуниялъул бутlаялда кинабго лъикl бугин абизе бегьиларо, гlурал гlузраби руго. Амма, гlаммаб къагlидаялъ босани, нилъер буго лъикlаб больница, гlунгутlабиги руго нилъедаго лъугlизаризе кlолел. Бищун кlудияб захlмалъи буго гlурал кадрал гьечlолъиялдалъун. Мисалалъе, районалда гьечlо онколог, уролог ва цогидалги гlадамазе чара гьечlого хlажалъулел специалистал. Гьелъие хlалтlи байбихьизе ккола бищун цебе хъизамалда жанибго, хадуб школалдаги. Лъимералъ тохтурасул махщел тlаса бищиялъе хасаб хlалтlи тlобитlизе ккола нилъ киназго. Медикияб кумек щвеялда хурхун гlемерал гlарзал рукlуна нилъер гъутабазда гlумру гьабун ругел гlадамазулги. Гьеб суалги дирго хасаб бербалгьиялде босун буго ва кватlичlого районалъул нухмалъигун цадахъ гъутабазде сапар бухьине ракlалда буго. Исана федералияб программаялда рекъон ракlалда буго районалда чанго цlияб ФАП базе, гьединго хlисабалде босун буго Харахьи ва Гьоцlалъ ругел участковиял больницабазе капиталияб ремонт гьабизеги”, - ян абуна гьес.    

Хадуб залалда гlодор чlараз кьуна ждидерго суалалги. Мисалалъе, Цlада росдал бегавулас гьарана жидер росулъе сверулеб нух цlадаздаса хадуб иххица холареб хlал гьабизе рес батеян. Гьамиштlа росдал бегавулас борхана жидер участокалда чара гьечlого АЗС рагьизе хlажалъи букlиналъул суал. Уздалросдал бетlерас абуна жидер советалда гъорлъе унел росабалъ токалъул мухъал басралъун рукlиналда бан, ток свиналъул хlужабиги гlемерлъун ругин ва гьел цlи гьаризе заман щун бугилан. Тlанусдерил бегавуласул рахlат хвезабун бугоан бан рагlалде щвараб ФАПалъул мина хlалтlизе биччан бажарулеб гьечlолъиялъ. Гьел киназего жавабал кьуна районалъул бетlерас.

Тадбиралъул ахиралда районалъул нухмалъулес баркалаялъул кагътаздалъун кlодо гьаруна араб соналъ муниципалитеталъул гlумруялда жидеца жигараб гlахьаллъи гьабурал хlалтlухъабиги.
И. Мухlамадов.