15 октябралда официалияб сапаргун районалде вач1ун вук1ана
Дагъистан республикаялъул Х1укуматалъул
бет1ер Г1абдулаев Мух1амад
Г1имранович (Имранович). Сапаралъул аслияб мурад бук1ана Макьасда балеб
туризмалъул кластералъе хасаб
экономикияб зона г1уц1иялъе Г1ахьалч1и ва Шотот1а росабазул ракьал рат1а гьариялде
к1иябго росдал жамаг1атазул пикру лъазаби. Сапаралъул заманалда
райадминистрациялъул бет1ер Х1. Дарбишевгун, Дагъистан республикаялъул бак1ал раялъул ва рук1арахъиналъулгун коммуналияб маг1ишаталъул министрасул
т1оцевесев заместитель М. Г1абдулкеримовгун Х1укуматалъул бет1ер дандч1вана
рехсарал росабазул жамаг1атазул вакилзабигун.
К1игог1ан саг1аталъ г1ехьелдерил клубалда т1обит1араб гьеб данделъиялда Мух1амад Г1имрановичас жамаг1атазул вакилзабазе баян кьуна жидер ракьалда балеб турбазаялъул районалъеги республикаялъеги
бугеб к1варалъул, жамаг1атчаг1азги загьир
гьабуна жидерго пикру, к1алъазе рахъана анц1идасаги ц1ик1к1ун чи. К1иябго рахъ ч1ван-къот1ун цо пикруялде рач1инч1ониги, данделъи ана цоцазда
рич1иялъул ах1вал-х1алалда. Х1укуматалъул бет1ерас раг1и кьуна дандч1ваялъул х1асил республикаялъул
президентасда цебе лъезе ва рекъон кколеб х1укму къабул гьабизе.
Нижер мухбир
|