ДАССРалъул Хунзахъ районалда бугеб х1алт1ухъабазул,
рекьарухъабазул ва баг1араскариял-депутатазул
исполнительныяб комитеталъул финансазул отдел г1уц1ун бук1ана 1929 соналда.
Хадусел соназ гьеб организациялъ чанго
нухалда хисана жиндирго ц1ар. 2006 соналдасан гьелда абула Дагъистан
Республикаялъул финансазул министерствалъул Хунзахъ районалда бугеб финансазул
управлениеян. Гьеб пачалихъияб структураялъул аслияб масъалалъун ккола
районалъул хаслъабиги х1исабалде росун
районалъул цогояб финансазулаб, бюджеталъулаб ва налоговияб политикаялда гъорлъ
г1ахьаллъи гьаби. Финансазул управление г1ахьаллъула Дагъистан Республикаялъул ва бак1алъулаб самоуправлениялъул бюджеталда гьоркьосел гьоркьорлъабазда. Гьелъ кумек гьабула районалъул
нухмалъулезе бак1алъулаб бюджеталда
хадуб хал кквезе ва гьеб т1убазабизе.
Финансазул управление г1уц1ун бараб 80 соналда жаниб гьелъие
нухмалъи гьабуна районалъул г1емерисел церет1урал лъай бугел г1адамаз.
1929 соналдаса 1939 соналде щвезег1ан гьенир х1алт1улел
рук1арал г1адамазул ц1арал я архивалда яги приказазул т1ехьалда дида ратич1о
1939 соналдаса 1942 соналде щвезег1ан финансазул управлениялъе нухмалъи гьабун
буго М. Мах1амаевас, 1942-1943 соназ Шарип Рах1матулаевас, 1943-1947 соназда Манап Г1алибеговас, 1947-1963 соназда
Султ1анах1мад Рашидовас, 1963-1965
соназда Х1адис Х1айдарбеговас, 1965-1976
соназда СССРалъул финансазул
хъулухъалъул отличник Х1айдарбегова
Зулх1ижатица, 1976-1998 соналде
щвезег1ан «Бах1арчияб зах1маталъе г1оло» абураб
медалалъул кавалер Г1алисултан Г1алисултанов, 1998-2010 соназда Советияб потребителазул
кооперациялъул отличник, Дагъистан Республикаялъул мустах1икъав экономист Г1умар Г1аммаевас, 2010 соналдаса
жакъа къоялде щвезег1ан Х1айдар
Х1айдарбеговас.
Гьаб жакъа г1адинаб зах1матаб заманалда учреждениязе,
организациязе нухмалъи гьабизе бигьаяб иш гуро. Руго нухмалъулел, жидецаго
мисал бихьизабун аск1ор х1алт1улелги к1вах1-свак лъач1ого х1алт1изе т1амулел. Гьединавлъун дида вихьула финансазул управлениялъул
нухмалъулев Х1айдарбегов Х1айдар Абакарович.
Х1алт1изе вач1ун г1емер заманго ун гьеч1ониги, х1алт1и рахъи бугеб
х1алалда бачиналъе гьес г1уц1ун руго киналго шарт1ал. Х1алт1улеб буго интернет,
электронияб почта, росун руго ц1иял, гьанжесеб х1алт1уе кумек-квербакъи
гьабулел компьютерал. Гьес щибаб къойилаб к1вар кьола районалъул бюджет
т1убазабиялде, гьоркьоса къот1ич1ого хъаравуллъи ккола биччараб г1арац бихьизабураб
бак1алда хвезабиялде. Управлениялъул
х1алт1ухъабазул къадар бахуна 11 чиясде. Гьел киналго къеркьолел руго бихьулеб
къоялде ва унеб заманалде
рач1инч1ого х1алт1и рак1бац1ц1адго мух1канго
т1убазабизе .
Жакъа – байрамалъулаб къоялда бицинч1ого г1оларо 37 соналъ
хисич1ого финансазул отделалда рак1бац1ц1адго х1алт1арай Мух1амадова Меседу Мух1амадовнаялъул
х1акъалъулъги. 1975 соналда Буйнакскиялъул финансазул техникумги лъуг1изабун
яч1ана Меседу Мух1амадовна Хунзахъ финанасазул отделалде бюджеталъул
инспекторлъун х1алт1изе. 1977 соналда гьей т1амуна к1удияй бухгалтерлъун,
хадубги бет1ерав бухгалтерасул заместительлъун, ахиралдаги бет1ерай бухгалтерлъун. Кинаб х1алт1уде т1амуниги,
Меседуца гьеб гьабуна мух1канго, жиндир
заманалда. К1удияб х1албихьи ва махщел
бугей Меседуца кумек гьабула х1алт1уде
рач1арал г1олохъанал специалистазе. Гьей ккола гьезул лъик1ай насих1атч1ужуги.
Меседу Мух1амадовнаялъул зах1маталъе къимат кьеч1ого теч1о
нухмалъулез. Г1емерсоназулаб рак1 бац1ц1адаб х1алт1уе г1оло гьелъие щвана
г1емерал грамотаби, баркалаби.
Пачалихъияб статистикаялъул федералияб хъулухъалъул
буюрухъалдалъун Меседуе кьуна пачалихъияб статистикаялъул т1ок1лъиялъул
г1аламат - Т1олгороссиялъул г1адамазул
перепись гьабиялъулъ бихьизабураб
т1ок1лъиялъе г1оло медальги.
Меседуца жигараб г1ахьаллъи
гьабула районалъул общественнияб г1умруялъулъ. Гьей йищун йик1ана
Хунзахъ росдал халкъиял депутатазул
Советалъул депутатлъун.
Реццалъе мустах1икъаб къаг1идаялда х1алт1и бачунеб буго финотделалъул нухмалъулесул заместитель,
бюджеталъул отделалъул начальник Г1алибегова Мадинаца, Г1алиева Раисатица,
Къебедова Марипатица, Г1абдулкаримова Пат1иматица ва гьел гурелги цогидал
х1алт1ухъабазги.
Финансазул х1алт1ухъабазул
байрамги баркулаго, бокьун буго
гьезие гьаризе чорхое сахлъи, халатал соназул г1умру, гьабулеб ишалъулъ
бит1 ккей.
Н. Г1алиева
| 
