Дун кутакалда йохула  районалъул г1олилаз творчествалъулаб х1алт1улъ жалго  рихьизаридал. Щай? Щайгурелъул гьеб буго кутакалда къоги бихьулеб, т1адч1ун х1алт1изеги кколеб заман т1ами. Г1ажаибаб ч1ух1игун ва х1урматгун кодобе босулеб буго дица «Дагъистаналъул машгьурал росаби» проекталда гъоркь къват1ибе бач1араб Гьоц1алъ росдал бицараб беричаб журнал. К1удияб махщалида, ишги бич1ч1ун г1уц1араб мажмуг1 буго гьаб. Щивха гьалъул автор, кинав машгьурав тарихчиясул гьунар ва кинав ц1ар арав журналистасул тату бахчун бугеб гьалда жаниб?

Гуро, журнал г1уц1улелъул данде гьабун гьеч1о редколлегия, тарихчаг1и -  профессионал. Жиндирго  муг1алимзабазда, росуцоязда лъаларебги гьикъун, мух1канал баяналги данде гьарун, Дагъистаналъул Президентасул т1адрекъеялдалъун ва районалъул нухмалъулесулгун «МАГ» фирмаялъул г1арцулаб  кумекалдалъун журнал къват1ибе биччан буго, г1иц1го 21 сон г1умрудул бугев Саг1идов Мух1амадица. Гьоц1алъ гьоркьохъеб школаги лъуг1ун г1олилав ц1алулев вуго Москваялъул рагъулаб университеталъул рагъулабгун гуманитарияб факультеталда. Щуабилеб курсалде щвезег1ан г1иц1го щуйилаб къиматазда ц1аларав гьев мустах1икълъун вуго Дагъистаналъул Президентасул, Х1ажи Мах1ачевасул фондалъул стипендиязе,  Мух1амад ккола Россиялъул журналистазул союзалъул членги.

Телефоналъ к1алъалелъул, дица г1олиласе махсаро гьабуна редакторги «херлъун» йигин, ц1ияб  чвахигун, ц1ияб пикругун цодагьаб мехалъ районалъул газеталъул  редакторлъун х1алт1изе вач1аян. Г1айиб гурищха Саг1идовасда  рак1алда гьеч1о цох1о районалъул роцада х1алт1улев ч1езе. Мух1амадил ц1ар жеги раг1ила районцоязда, раг1ила пайдаял ишаздалъун, творческиял бергьенлъабаздалъун.

Аллагьас  кумек гьабеги дуе, Мух1амад, рак1алда ругелщинал рорхалъаби мук1ур гьаризе! Амин.

Ф. Мух1амадова