2 июналда Кочубеялда т1обит1ана г1адатлъун лъугьараб
республикаялъул росдал маг1ишаталъул
х1алт1ухъабазул байрам – «Г1и-боц1ухъанасул къо». Байрамалда
г1ахьаллъана муг1рузул улкаялъул т1олалго районалдаса г1и-боц1ухъабиги
Дагъистаналъул президентасдаса бахъараб
республикаялъул нухмалъулелги
мадугьалихъ ругел республикабаздаса т1аде ах1арал х1урматиял гьалбалги.
Рохалилаб митингги рагьун
гьениб баркиялъул к1алъай
гьабулаго Дагъистаналъул президент Мух1амадсалам Мух1амадовас бихьизабуна
г1емер халкъазулаб республикаялда гьудуллъи-вацлъи щулалъизабиялъе гьеб
байрамалъул к1удияб к1вар бук1ин. Т1адч1ей гьабуна Дагъистаналда
г1и-боц1ухъанлъи, хасго г1ияхъанлъи экономикиял бут1абазул аслияздасан цояб
кколеблъиялда, гьеб цебет1езабиялъе цо къадаралъул х1алт1и гьабулеб бук1иналда.
Жакъа нилъеца к1одо гьарулел кколила бищунго къо х1ехьолелги къуваталги
г1адамал. Вехьасул х1алт1и кколила бищунго нек1сиябги адаб-х1урматалъе
мустах1икъаблъунгиян бихьизабуна
президентас.
Мух1амадсалам Мух1амадг1алиевичасдаса хадув к1алъазе вахъарав РФялъул Федералияб Собраниялъул
Федерациялъул Советалъул председателалъул заместитель Ильяс Г1умахановас
Федерациялъул Советалъул председатель Валентина Матвиенкоца Дагъистаналъул
президентасухъе бит1араб баркиялъул адресги ц1алана г1и-боц1ухъабазда байрамги
баркана. Баркиялъулал к1алъаял
гьаруна Калмыкиялъул президент Алексей
Орловас, Ставрополь краялъул
вакиллъиялъул нухмалъулев Владимир Шаповаловас, Россиялъул г1ияхъабазул
миллияб союзалъул председатель Михаил Егоровас ва цогидазги.
Гьелдаса хадуб Дагъистаналъулги Калмыкиялъулги президентал
М. Мух1амадовас ва А. Орловас
зах1маталъул церехъабазе Дагъитан республикаялъул шапакъатал
ва къиматал сайгъатал кьуна. Сайгъатаздалъун к1одо гьаруразда гъорлъ
рук1ана Дагъистаналдаса гурелги Калмыкиялдаса ва Ставрополь краялъул г1и-боц1ухъабиги. Сайгъатал щваразда гъорлъ
руго нилъер районцоялги. Т1ануси «Машгьурал г1адамал» колхозалъул тайпадулаб
г1иял фермаялъул заведующий Мух1умаев Мух1амадие
кьуна «Дагъистаналъул росдал маг1ишаталъул мустах1икъав х1алт1ухъан»
абураб х1урматияб ц1ар.
Бекьеч1дерил Дудар Г1алиевичасул
ц1аралда бугеб колхозалъул к1удияв вехь Насух1ов Мухтар мустах1икълъана
телевизоралъе.
Зах1маталъул церехъаби к1одо гьариялдаса хадуб Дагъистан ва Калмыкия республикабазда
гьоркьоб дармилгун экономикияб, г1елмиябгун техникияб ва
социалиябгун культурияб цадахъ
рекъон х1алт1иялъе къот1и-къай хъвана
к1иявго президентас. Гьелдаса хадуб бук1ана Дагъистаналъулги Калмыкиялъулги культураялъул х1аракатчаг1азул концерт.
К1иявго президент ва х1урматиял гьалбал щвана цо-цо районазул павильоназде,
балагьана тайпадулаб г1и-боц1ул
выставкаялъухъ. Мух1амадсалам
Мух1амадг1алиевичасда заман батана нилъер районалъул павильоналдеги щун, гьениб г1и-боц1ухъабигун, районалъул
нухмалъулелгун гара-ч1варизе. Гьес лъик1аб къимат кьуна районалъул павильоналъе.
Г1и-боц1ухъабазул байрам г1ахьаллъаразе пайдагун,
рохел-аваданлъиялъул ва гьудул-гьалмагълъиялъул ах1вал-х1алалда т1обит1ана.
| 
