30 октябралда райадминистрациялъул данделъабазул залалда тlобитlана Дагъистаналъул мугlрузулаб зонаялъул семинар-совещание. Гьеб гlуцlун букlана республикаялъул Миллияб политикаялъулгун диниял ишазул министерствоялъ. Семинаралда гlахьаллъи гьабуна районалъул бетlерасул заместитель Асадгlали Гlабдуразакъовас, жамгlиялгун диниял гlуцlабазул хlаракатчагlаз, рехсараб ведомтсвтоялъул информациялдалъун хьезариялъул отделалъул начальник Мурад Мухlамадовас, къватlисел пачалихъазул гражданазулгун ва нилъерго ватlанцоязулгун социалиябгун культурияб хlалтlи гьабиялъул отделалъул начальник Хасайбат Валиевалъ, ДРялъул хlинкъи гьечlолъиялъул Советалъул вакил Заирхан Харбиловас, мугlрузулаб зонаялда ругел муниципалитетазул АТКялъул членаз ва цогидазги. 

Семинар гlуцlун букlана халкъалда, хасго гlолилазда гьоркьоб сепаратизмалъулгун миллатчилъиялъул пикраби рижичlого ва диназдагун миллатазда гьоркьосел тунка-гlусиял ккечlого рукlиналъул мурадалда хlалтlи гlуцlи абураб темаялда. 

"Нилъер республика цlакъ загlипаб буго къватlисел пачалихъаздасан бачlунеб заралияб информациялдаса цlуниялъул рахъалъ. Нилъер гlадамазул диналдехун бугеб бухьенги, хасго гlолилазул хехлъиги, жеги цlубачlеб гlакълуги хlисабалде босун, бецlал къуватаз цlакъ хlаракат бахъулеб буго гьел къваригlел гьечlелщинал ишазде гъорлъе цlазе. Лъикlаб букlина нужеца нужерго профилактикияб хlалтlулъ гьеб рахъалде кlварги кьун, информациялъулаб дандечlей цlикlкlинабуни. Рахъи цlикlкlараблъун букlинаан профилактикияб хlалтlулъ диниялгун жамгlиял хlаркатчагlиги, спортсменалги ва цогидалги лъикlаб рахъалдасан гlолилаз мисал босизе бегьулел чагlиги гlахьал гьаруни.  Экстремизмалдегун терроризмалъул идеологиялде данде хlалтlи гlуцlизе ккола цlакъ цlодорго, гlорхъулъа рорчlарал жалги гьаричlого ва жалго питначагlазе рекламаги гьабиларедухъ. Гьединго хlисабалде босизе ккола щибаб районалъул ва росдал хаслъиги. Амма гьелъул магlна кколаро нужеда бихьараб жоги бахчун, руцlцlухlун чlун рукlине кколин абураб. Кигlанго гьитlинаб бугониги, мекъаб идеологиялда хурхараб хlужа загьирлъани, гьелъул хlакъалъулъ лъазабизе ккола ва гьелда хурхун хlалтlиги гьабизе ккола. Гурони, гьелъ жеги кlудияб балагь тlаде бачинеги рес буго", - ян абуна Мурад Мухlамадовас жиндирго кlалъаялда.   

Жакъасеб Россиялда экстремизмалде дандечlей абураб темаялда докладгун цеве вахъана Заирхан Харбилов. 

Цоги данделъиялда рехсана къватlисел пачалихъазда динияб лъайги щун, Дагъистаналде тlад руссарал диниял хlаракатчагlазул хасаб сияхl букlине кколиланги. Гьедин, жакъа республикаялъул гьеб сияхlалда рагlула 274 чи. Гьездасан жакъа хlалтlилел ругила 21 чи, хlалтlизе ракlалда рагlула жеги 41 чиясда. Нилъер районалдаги руго къватlисел пачалихъазда исламияб лъай щварал чагlи, амма гьездасан жакъа къоялде динияб хlаракатчилъиялда хlалтlилев вуго гlицlго цо чи.

Цогидазул кlалъаялги руссарал рукlана гlун бачlунеб гlел цо-цо нилъер ракьалда питна бекьизе бокьарал чагlазухъги гlенеккун, хадуб бетlер кквезе кколел ишаздаса цlуниялде ккеялде. Ахиралда гlодор чlараз кьуна жидерго суалалги.  

И. Мухlамадов.