Дида г1емер раг1улаан бицунеб
Харахьи участкаялъул больницаялъул х1акъалъулъ. Раг1улаан г1емерал
рецц-бакъалъул раг1аби гьенир х1алт1улел ругел тохтурзабазул ц1аралги рехсон,
толаан гьеб батилин жидер сахлъи гьениб лъик1аб даражаялде бач1индал роххиялъ
бицунеб гьонц1ораб хабарилан.
Дагьал церег1ан къояз щвезе ккана дун гьеб
больницаялде гьенив унтун вегун вугев вацг1аласде щвезе. Больницаялъул
к1алт1уги бахун коридоралъуве лъугьиндал гьенир ч1ун ругоан хъах1ал халг1аталги
рет1арай к1иго ч1ужуг1адан. Гьезул цояй санитарка йик1ун ятизе ккола гьелъухъ
лъел ведроги тряпкаги бук1ана, цойгидай медсестра йик1ун ятизе ккола. Гьел дун
вихьигун данде рач1ана ва ц1ех-рех гьабуна щиб къвариг1ун бугебилан. Гьез,
лъазего лъаларев, дидехун гьабураб рек1елъе бортулеб каламалъ дун цодагьав
вихха-вишизецин гьавуна. Дица дирго мурад бицана ва унтарасухъе ине бокьун
бук1ин загьир гьабуна. Гьабсаг1ат унтаразул «кьижулеб саг1ат» бугин ва цо
саг1аталъ ях1 гьабейилан берцинаб к1алъай гьабуна дидехун гьез. Дир х1ал
хисараблъиги лъан т1ад русун ц1ехана гьез лъихъе дун вач1унев вук1аравилан.
Дица кинабго баян гьабидал, гьез абуна гьев гьабсаг1аталда палатаялда жанив
живго вугилан ва капельницаялда гъоркьги вугин, цойгидазе квал-квал гьабуларедухъ
айилан гьесухъе, гьединго гьаракь борхун к1алъайги гьабич1они лъик1аб бук1инин
щайгурелъул цойгидал палатабазда унтарал кьижун ратизеги бегьулилан. Гьеб
изнуялдаса воххарав дунги ц1акъго гьаракь бахъинаредухъ бигьа-гьавун щвана
палатаялъуве. Коридоралъусан унагоги, палатаялъуве лъугьиндалги
г1ажаиблъизавуна гьениб ч1езабун бугеб рац1а-ракъалъиялъ ва г1уц1а-к1ут1иялъ.
Дица вацг1аласда ц1ехана тохтурзабазул
х1акъалъулъ, гьениб кьолеб квен-т1ехалъул ва гь. ц. х1акъалъулъ. Гьевги рази
вугоан гьеб больницаялъул т1олалго х1алт1ухъабаздаса, гьезул унтараздехун бугеб
адаб-хъатиралдаса, гьениб кьолеб т1аг1амаб, бат1и-бат1ияб квеналдаса. Гьесул
хабаралдаса хадуб, рек1еде вач1индал дун рек1екълъана гъой к1ияйго
ч1ужуг1аданалда 8 март баркизе ургъич1олъиялдаса (гьеб къо бук1ана 7 март).
Рак1алде ккана къват1иве унелъул баркилилан ва баркалаги кьелин гьезиеян, амма
гьел гьенир ратич1о. Кват1ун бук1аниги дица рак1-рак1алъ баркула араб 8 марталъул
байрам гьеб больницаялда х1алт1улел ругелщинал руччабазда. Бичанте нуж кидалго
сахго рук1ине, сахлъи щула гьабизе рач1аразул унго-унгояб: вацасул, яцалъул,
цевесев г1агарав чиясул г1адинаб т1алаб-агъаз гьабизе. Гьеб гьедин бугин
гьанибиланги абуна дида.
Бит1ахъего бахиллъизе вач1ана гьедин
коллективалъе нухманлъи гьабизе бажари бугев
больницаялъул бет1ерав тохтур Хъайтмазов Мах1амадида. Гьединаб ц1убараб,
гъункараб, цок1алаб, унтараздехун киназулго х1еренаб, недегьаб бербалагьи бугеб
коллектив ц1акъго къанаг1атаб жо буго. Харахьи больницаялда вегизе ккеч1ониги
вегизе ккана дун г1емерал больницабазда: Мах1ачхъалаялъул щуго бат1ияб
больницаялда гьединго Москваялъул больницаялда ва гьел гурелги цойгидал
больницабазда. Амма гьаниб г1адинаб унтарасдехун ва т1аде рач1араздехун
санитаркаялдаса тохтурасде щвезег1ан хинаб бербалагьи бугеб больница дида
дандч1вач1о.
Ц1ар рехсеч1ониги цо больницаялда
санитаркаби къват1ул гьаби г1адин ах1долаан унтаразде, тохтурзабазул бицунго
пайда щиб, гьезда унтарал жидерго лагъзалилан ва к1иабилеб сорталъул
г1адамалилан ккола. Гьез гьабулеб даруялдаса г1емер къоларо унтарасе жиндидехун
гьабулеб гьуинаб калам, пайда щиб гьеб бич1улел г1емер гьеч1елъул.
Ахиралда дие абизе бокьун буго Харахьи
больницаялъул х1алт1ухъаби гьединал лъик1ал рук1аниги гьенире ккезе хъван
ратугеги ва унтугеги, нагагьлъун унтанани гьенир регизе х1аракат бахъе гьеб
мехалъ бихьила нужедаги цойгидаздаса гьелъул бат1алъи. Дидаги гьелъул
х1акъалъулъ бицунеб раг1ун бук1ана, уяб жоги бук1ун буго. Баркала гьеб
больницаялъул х1алт1ухъабазе гьедин унтарал рази рук1унедухъ х1алт1изе
тавпикъги кьеги, хъизамазе талих1-роххелги кьеги.
Халилбегов М-Х1
|
