Г1адат буго заман анаг1ан кинабго жо басралъулеб, унеб,
холеб, к1очон толеб. Чан сон, г1асру свераниги холаро цох1о г1адамаз нахъе
тарал лъик1ал ишал, гьез бихьизабураб бах1арчилъи. Гьедин нилъеца щибаб соналъ
к1удияб адаб-х1урматгун к1одо гьарула К1удияб Ват1анияб рагъул, Афганистаналда,
Венгриялда ва гьаб заманалда ккарал рагъулал тунка-г1усиязул бах1арзал. Исанаги
15 февралалда районалъул халкъияб творчествалъул рокъоб к1одо гьаруна
Афганистаналъул рагъул г1ахьалчаг1и-интернационалистал.
Афганцазул х1урматалда г1уц1араб дандеруссиналде гьел к1одо
гьаризе рач1ун рук1ана районалъул нухмалъулел жавабиял х1алт1ухъаби, СМИязул
вакилзаби. Афганистаналда бук1араб рагъда нилъер ракьцояз, бихьизабураб
бах1арчилъиялъухъги, къох1ехьеялъухъги рак1-рак1алъулаб баркалаги кьун, гьезда
байрамги баркун, гьезие хъизан-рукъалда талих1-рохелги, сахлъиги, кинабго
лъик1абщинабги гьарун к1алъазе рахъана районалъул бет1ер Х1. Дарбишев,
районалъул военком Б. Шапиев, райсобраниялъул председатель Х. Хваджаев,
районалъул бет1ерасул заместитель Х1. Г1аммаев, ветераназул советалъул
председатель Г1. Г1алих1ажиев. Гьединго, тадбиралда щибаб соналъ г1ахьаллъулев
вук1арав исана вач1ине бажарич1ев Хунзахъ администрациялъул бет1ер Х. Т1алх1атовасул
гьариялдалъун гьесул рахъалдасан афганистаналъулазда байрам баркана Г1.
Г1алих1ажиевас. Рагъулал гьудул-гьалмагъзабазда г1ахьалаб байрам баркун
жидедаго бихьараб рак1алде щвезабуна лъай кьеялъул х1алт1ухъабазул профкомалъул
председатель Мах1мудов мух1амадица.
Байрамалъул «г1айибиязе» кеч1-бакъанги, кеп-ихтилатги,
бечедаб кванил столги г1уц1ун бук1ана культураялъул х1алт1ухъабаз.
Байрамалъулаб тадбир берцинал раг1абаздалъун нухда бачана культураялъул
мустах1икъай х1алт1ухъан Г1. Тажудиновалъ, куч1дул ах1ун аваданлъи гьабуна
Парихан Мусаевалъ, Хадижат Г1абдулкъадировалъ, Чаран ва Г1алиасх1аб
Султ1анбеговаз.
Байрамалъул х1урматалда г1уц1араб тадбиралда
афганистаналъулазе баркалаги кьолаго г1арцулал конвертал кьуна районалъул
бет1ер Х1. Дарбишевасги ветераназул советалъул председатель Г1.
Г1алих1ажиевасги. Г1абдулат1ипица бицана гьединго конвертал гьезие Хунзахъ
администрациялъул бет1ер Х. Т1алх1атовасги х1адурун ругилан.
Гьедин, лъик1абго кеп-ихтилатги гьабун, рази-ракиго, жал
рак1алде щун байрам г1уц1аразе, хасго культураялъул ясазе к1удияб баркалаги
кьун рокъо-рокъоре ана афганалъулал. Гьединал бах1арзал цо къоялъ гуреб чанги
нухалъ рак1алде щвезаризеги, к1одо гьаризеги мустах1икъал руго.
П. Гунашева.
|
