Вторник, 06.12.2022, 06:52 | RSS | Приветствую Вас Гость
Главная | Регистрация | Вход
Меню
Последние номера

18 ноябрь 2022 г. № 52 (10347)

11 ноябрь 2022г. № 51 (10346)

3 ноябрь 2022г. № 50 (10345)

28 октябрь 2022 г. №№ 48-49 (10343-44)

21 октябрь 2022 г. № 47 (10342)

Газета - это лицо района
Мы в социальных сетях
Instagram Facebook
Видео
З.О.Ж. ХУНЗАХСКИХ АКСАКАЛОВ. Спартакиада среди Хунзахцев Супербабушка Сакинат из Хунзаха Лотерея газеты СЕЛЬСКИЙ ТРУЖЕНИК . Открытие камня памяти Хаджи Мурату Культура и традиции Хунзахский р-он «Белые журавли»ЦАДА 2010г. Cвадебный обряд c.Сиух посмертно наградили Орденом «Мужест Участник ВОВ Мух1амад-расул. Праздник Белых журавлей Цада 2009г. Док. фильм о Хунзахском районе. Праздник в ХУНЗАХЕ 9 май 2011 год. Патахов Курбанали с.Сиух 2012г.Вече Махмуд Абдулхаликов Народный артист ВИА САРИР 1994г.Хунзахский район Хундерил музей тарихалъул нугI Юбилей Хунзаха 1989 год (2400 лет) Непавший Герой - Хаджи Мурат Документальный фильм.Хунзахский рай 70 -летие Хунзахского района. Хунзахский музей. Белые журавли.К 90-летию Расула Гам Документальный фильм Хунзахский рай Презентационный ролик курортно-тури РАСУЛ ГАМЗАТОВ-ФИЛЬМ О ПОЭТЕ. ФОРУМ МОЛОДЕЖИ ХУНЗАХСКОГО РАЙОНА 2 День молодежи в Хунзахском районе 2 УМУМУЗУЛ КУЧ1ДУЛ (Г1АЙШАТ ТАЖУДИНОВ Праздник Белые журавли (К 91 летию Закладки первого камня МАТЛАС. Фильм о Кайтмазе Аварском 100 летний юбилей Махулова в Хунзах Стихи Расула Гамзатова. День молодежи в с. Хунзах. 2015 год Вечер памяти наиба Хаджимурата в Ху Хунзахский район. Гьазул х1акъалъулъ бицуна Мала Алха Гьазул х1акъалъулъ бицуна-Магомед Ц Районалъул найихъабазул данделъи Гьазул хIакъалъулъ бицуна - Гимбато Инсан ва сахлъи Гьазул х1акъалъулъ бицуна - ХIайбул Улбузул хIурматалда... Эбелалъул къ День в музее.2017 год. Итоги 2013-2016г.г. МРХунзахский ра Тарихалъул тIанчал(Страницы истории (Открытие памятника Фазу Алиевой) г ГIажизал лъимал рохизаруна Гьазул хIакъалъулъ бицуна - Работни МагIарул гIадатал ракIалде щвей Хунзахский каньон АВАРСКИЙ КОНЦЕРТ(САРИР) с.ХУНЗАХ 19 Санал свераниги хвел гьечIеб байрам День учителя ЦIада поэзиялъул рукъ рагьана М.ХIайдарбеков кIодо гьавун гьабура ГIобода варкаут рагьи ХIабибил бергьенлъиги бекьечIдерил Мы в гостях Патахова Айшат Улбузул хIурматалда - ГьоцIалъ росу Инсан ва сахлъи Хунзах больница День матери Голубой огонек ГIадамал ва замана - ГьоцIалъ росу Афганистаналъул рагъухъабазул дандч 8 Март кIодо гьабуна Гьудуллъиялъул дандчIвай ГIухьбузул къо кIодо гьабуна КIудияб бергьенлъиялде рачIунаго
Выдающиеся личности района
Случайное фото
Водопад Тобот
Погода
Форма входа
Логин:
Пароль:
Наша кнопка
Мы будем вам признательны, если вы разместите нашу кнопку у себя на сайте.

Хунзахская Газета, Сельский труженик, Росдал захIматчи


Статистика

Онлайн всего: 1
Гостей: 1
Пользователей: 0


Главная » 2022 » Сентябрь » 28 » ВОЛЕЙБОЛАЛЪЕ БАХЪАРАБ ХВАЛЧЕН ЛЪАЛИНИБ ЛЪУНА...
16:55
ВОЛЕЙБОЛАЛЪЕ БАХЪАРАБ ХВАЛЧЕН ЛЪАЛИНИБ ЛЪУНА...

Исана риидал, республикаялдаго цIар тIибитIарав «таргIил устар», тIабигIаталъго волейболалъе гьунармахщел сайгъат гьабурав, гъорлъе лъугьаралдаса тIубараб къуватги жигар-жанги спорталъе кьурав КIахъа Хвалчен МухIамадил гIумруялъул 70 сон тIубан бугиланги рагIун, лъикIаб материал газеталъе хIадурилилан йикIана дун... Амма, кидаго гIадин, кватIун ккана. КватIун ккана мустахIикъав чиясе къимат кьезе, гьев хинал рагIабаздалъун вохизавизе. Араб гIасруялъул лъабкъоялда анцIабилел соназ волейболалъе къватIибе бахъараб «Хвалчен» МухIамадил хвалчен Аллагьасул къо лъугIиялдалъун 31 августалъул къад гIужалъ лъалиниб лъуна. Юбилеялъулаб макъалаги сверизабизе ккана некрологалде…

ТIокIлъигун ГIарани школа-интернаталда 8 класс лъугIарав АхIмадов Буйнакскиялъул кIиабилеб педучилищеялде лъугьуна цIализе. ГьитIинго гIелму-лъаялде цIайи бугев МухIамадие кIудияб захIмалъиго ккечIо хасаб гьоркьохъеб лъай босизеги. БагIараб дипломгун лъугIула гьесул педучилище ва 1970 соналъ районалде тIад вуссарав гIолохъанав специалист ГIуркIачIи байбихьул классазул учительлъун тIамула хIалтIизе. ГIемерго кватIичIого гьениса МухIамад вачуна гIагараб КIахъ байбихьул школалде. Математикаялъе къуватав вукIиналъ батила, МухIамадие шашкаби, шахматал кидаго рокьулаан, цо шахматазул турниралда районалъул чемпионлъунги вахъун вукIана гьев. ЛъикIаб махщел букIана мунагьал чурадил мандолина - балалайкаялда бакънал рачинеги. ТIубан спорталде вуссиналъ музыкаялде регIуларин абулаан гьес.

Гьоркьохъеб лъайги босун, байбихьул классазда дарсал кьун, чIезе МухIамадил ракIалъ къабул гьабуларо. 1971 соналъ пединституталъул физикаялъулгун математикаялъул факультеталде цIализе лъугьарав АхIмадов тIубанго волейболалде вуссуна. КигIанго математика бокьулеб букIаниги, спорталъ тIалъи босула ва тIоцебесеб курс лъугIун хадуб, гьес документал физкультурияб факультеталде кьола. КIудияб адаб-хIурматгун ракIалде щвезавулаан гьес педучилищеялдаго жиндир тренерлъун вукIарав, волейболалдехун ракI цIазабурав тренер ГIали ГIабдусаламович. …

МухIамад Шахшаевич КъадилмухIамадов -пединституталъул физкультурияб факультеталъул преподаватель, волейболалъул чанги «устар» куцарав, республикаялда волейбол цебетIеялъе гIемераб хIалтIи гьабурав тренер. Гьесда бихьула тIоцебе АхIмадовасулъ спорталде бугеб рокьиги, вукIинесев волейболистги. Дол рикIкIадал 70 соназ, кIиявго МухIамадил ккараб гьоркьоблъи жеги щулалъун, унгоунгояб гьудуллъиялде сверула. Шахшаевичасул тIадчIарал, щибаб къойилал тренировкабазги, гIадатиял хIаязги, рикIкIен гIемерал дандчIваялтурниразги АхIмадовасул «Хвалчен» лъугьинавула. ГIахьвахъ районалда тIобитIулеб турниралда, волейболалъул фанат - КIаратIаса ГIумарица гьесул тирилъи-лебаллъиялъе къимат кьун «Балагье цо, хвалчен гIадин хьвагIулеб куц,» - ан ахIаралдаса «Хвалчен» абураб тIокIцIарги даимго рекIуна МухIамадида. Гьес кидаго абулаан Шахшаевич вукIинчIевани «Хвалченги» букIунароанилан, спорталда гьадинаб борхалъиялде живги вахинароанилан, жиндир бергьенлъабазулъ цIикIкIунисеб захIматги гьесул бугила, кидагосеб баркалаялъе, рецц-бакъалъе мустахIикъав чи вугила МухIамад Шахшаевичилан.

М. КъадилмухIамадовасул хIаракаталдалъун ккола АхIмадов Дагъистаналъул тIаса бищараб командаялде ва гьелда гъорлъ хIалаго Россиялъул югалда кIиго нухалъ ккола лъабабилеб бакI. Лъабго нухалъ вахъуна Россиялъул педвузазда гьоркьов чемпионлъун. Лъабго нухалъ гьесие щола «Лучший нападающий России среди педвузов» абураб хIурматияб цIар. Дол соназ МухIамад вачунев вукIуна Грозныялъул «Автомобилист», Ростовалъул «СКА», Саратовалъул «Кристалл» гIадал ва цогидал цIар бугел командабазда гъорлъе. Амма АхIмадовасе гьеб къабуллъуларо ва гьев 1977 соналъ багIараб дипломгун пединститутги лъугIизабун гIагараб районалде тIад вуссуна.

Гьелдаса нахъе байбихьула МухIамадил мугIалимлъиялъул нухги, жеги цебетIола спортивияб гIумруги. Цебе республика улкаялдаго рагIизабураб команда Хунзахъ районалъул букIиналъ, хIаракат бахъула гьелъул цIар борхатго цIунизе. ХIажат рукIана чIахIиязул бакI кквезе мустахIикъал волейболистал. Нахъа тараб захIматалъул нухда – Хунзахъ № 2 школалда, ДЮСШялда тренерасдаса гьелъул директорасде щвезегIан ва 1993 соналдаса гIумрудул ахирисел къоязде щвезегIан ГIарани рагъулабгун спортивияб лицеялда вугел соназги МухIамадица кинабго гьабуна спорталъе, районалда волейбол цебетIеялъе гIоло.

25 гIан соналъ вукIана гьев районалъул тIаса бищараб командаялъул капитанлъун. Гьебго заманалда хIана республикаялъул тIаса бищараб командаялдаги. МухIамад кколаан Дагъистаналъул спартакиадаялъул ва гIемерал турниразул чемпион. 1982-84 соназ хIана ДСО «Урожаялъул» тIаса бищараб командаялда. 2002-2003 соназ хIалтIана ДГПУялъул кIудияв преподовательлъунги цадахъго гьабуна Дагъистаналъул тIаса бищараб командаялъе тренерлъиги.

МугIалимлъи – тренерлъиялда цадахъго АхIмадов вихьизе бегьулаан республикаялъул роцада тIоритIулел турнираздаги. Россиялъул БахIарзал М. Толбоевасул, М. Манаровасул ва цогидал чIахIиял къецаздаса камулароан гьев. ТоргIо хIаялъул ригь бекун букIаниги, МухIамад цеве вахъарал къецазда бищунго лъикIав игроклъун рикIкIунаан кидаго. Араб заманалде нахъвуссун балагьизе чIухIараб лъалкI тана АхIмадовас. МухIамадил «площадкаялда» ругьун гьарун гIумруялъул нухде тIоритIарал гIолилал, республикаялъул ВУЗазда цIалулел, цIалун лъугIарал лъикIаб хIалтIуда, цIар бугел командабазда хIалел, Дагъистаналъул спортивияб къадру цIунун, гьелъул тIасабищараб командаялда гъорлъ ругин абуниги мекъи ккеларо.

АхIмадов МухIамадил спортивияб цебетIейги кIодо гьабун, гьесул 45 сонилаб юбилеялъул хIурматалда Республикаялъул роцада волейболалъул турнир тIобитIана 1997 соналъ. БатIи-батIиял районаздаса командаби, доб мехалъ Пачалихъияб Думаялъул депутат Рамазан ГIабдулатIипов, Россиялъул БахIарчи МухIамад Толбоев, республикаялъул спорталъул министр ва гIемерал цогидалги хIурматиял гьалбадерил гIахьаллъигун, гIуцIадго ана гьеб тадбир МухIамадил гIагараб КIахъ росулъ. М. АхIмадовасул 50 сонилаб юбилеялде 2002 соналъ букIараб турниралда райадминистрациялъ Хвалчение «Жигули» машина сайгъат гьабуна, 2007 соналъ букIараб турнир тIобитIана волейболалъул ветераназда гьоркьоб.

АхIмадовасул захIмат кIодо гьабуна хIурматиял цIараздалъунги къиматал сайгъатаздалъунги. Гьев кколаан тIадегIанаб категориялъул учительги, тренерги, СССРалъул ва РСФСРалъул лъайкьеялъул отличникги, ДРялъул физическияб культураялъул ва спорталъул мустахIикъав хIалтIухъанги, МухIамадие щвана лъайкьеялъул бутIаялда Россиялъул президентасул грантги.

Хъизан Сулайсатгун МухIамадица тарбия – лъай кьун гIезаюна кIиго яс.

Жиндирго васал гьечIониги, яс Анжеликае вас гьавидал рохалие гIорхъи букIинчIила цоги волейболист – хвалчен тухумалда гIезавизе бугеб анищалъилан бицунаан МухIамадица. Щибаб къойил гьава-бакъалъухъ балагьичIого хIалтIуде иналдеги хIалтIудаса вуссун хадубги гьев векерулев вукIун вуго чанго километралъ, гьабулеб букIун буго щибаб къойилаб зарядка, заман батулаан спортплощадкаялда росдал лъималгун хIазеги, гьезие малъа-хъваял гьаризеги. Черх кидаго «формаялда» букIине кколилан абулаан мунагьал чурадица. Волейболалъе гIоло лъалиниса къватIибе цIараб МухIамадил хвалчен гвангъун паркъана 70 соналъ. ХIал Алжаналъуб батаги гьев сахав, унголъунги спорталъе маян кьун вукIарав гьунар тIокIав инсанасул. Амин.

Ф. МУХIАМАДОВА.

Просмотров: 34 | Добавил: zaxrosdal | Рейтинг: 0.0/0

by NiGMaT © 2022 ВНИМАНИЕ!!! ПРИ КОПИРОВАНИИ МАТЕРИАЛОВ САЙТА, ОБЯЗАТЕЛЬНА АКТИВНАЯ ССЫЛКА НА ИСТОЧНИК!!!
Хостинг от uCoz