 Гьоц1алъ культураялъул рукъалъул х1алт1ухъабаз кидагосеб
к1вар кьола К1удияб Ват1анияб рагъул ва цогидал рагъулал тунка-г1усиязул
г1ахьалчаг1и байрамалъулал тадбирал т1орит1ун к1одо гьариялъе. Гьедин
Афганистаналъул рагъул г1ахьалчаг1азул х1урматалда Ват1ан ц1унулезул къо-23
февралалде т1обит1араб тадбир ана рохалилаб ах1вал-х1алалда. Дандеруссин
г1уц1ун бук1ана Гъоркьагьоц1алъ росдал библиотекаялъул х1алт1ухъабиги г1ахьал
гьарун.
Дандч1вазе ах1ун рук1ана Афганистаналъул гурелги чачаназул,
Венгриялъул рагъул г1ахьалчаг1и. Рук1ана т1аде ах1арал гьезие баркиял гьаризе
мустах1икъал г1адамалги.
Гьезда гьеб рохалилаб байрамги баркулаго мажлис рагьун
к1алъазе яхъана культураялъул рукъалъул директор Баширова Х1.
Гьелъ бицана г1олеб-г1оларелъул, киг1анго к1удиял сайгъатазе
мустах1икъал рук1аниги, гьел гьеч1илан теч1ого, чаялъул столалде ах1унги жал
халкъалда к1очон тун гьеч1олъиялъул.
Гьаниб абич1ого г1оларо школалъул организатор Р.
Г1абдулкаримовалъул х1аракаталдалъун 10-абилеб классалъул ц1алдохъабаз гьаб
данделъиялда лъураб бут1аялъул. Гьел лъималаз гъираялда рик1к1ана рагъул
г1ахьалчаг1азе сайгъат гьарурал куч1дул ва гьаруна баркиял. Гьелдаса хадуб
к1алъазе рахъун Афганистаналъул рагъул г1ахьалчи Гьит1инов Мух1амадица,
Венгриялъул рагъул г1ахьалчи Г1умаров Г1умарх1ажица, чачаназул рагъул г1ахьалчи
Х1усейнов Мух1амадица бицана бихьараб къо-къварилъиялъул, х1ехьараб
зах1малъиялъул. Т1аде ах1арал Расулов Мух1амадицаги Г1умаров Муслимицаги рагъул
г1ахьалчаг1азе гьаруна байрам баркиялъул к1алъаял.
Рагъул г1ахьалчаг1и ц1акъ разиго хут1ана жодоргун гьабураб
дандч1ваялдаса, нахъе-нахъеги ах1араб мехалъ гьоркьоса чи камич1ого нижехъе
рач1ине раг1иги кьуна.
Баширова Х1. культураялъул рукъалъул директор.
| 
