Исана 25 сон тlубала 1999 август моцlалда мадугьалихъ бугеб Чачан республикаялъул ракьалдасанги рачlун, ихтияр гьечlого яргъид гlуцlарал халкъазда гьоркьосеб хъачагъазул къокъа Дагъистаналде тlаде кlанцlаралдаса. Гьел лъугьа-бахъиназул аслияб кьаби Цlумада ва Болъихъ районазда щваниги, цо-цо тlиралаби щвечlого хутlичlого хутlичlо нилъер районалдеги. Гьедин, нилъер районалдасаги гьел лъугьа-бахъиназда гlахьаллъи гьабуна ихтиярал цlунулел идарабазул 30 цlикlкlун хlалтlухъанас, гьезда гъорлъ вукlана вукlинесев Россиялъул Бахlарчи, Буйнакскалъул 136 аб. механизированнияб бригадаялъул командирасул заместитель Хlайдархан Хlажиевги. Гьединго гуманитарияб кумекги босун рагъулал тунка-гlусиял ругел бакlазде ун вукlана доб мехалда районалъул вукlарав нухмалъулев Ахlмаднаби Гlумаровги.  

Хlакъикъаталдаги, бигьаго щун гьечlо Дагъистаналъе гьеб бергьенлъи. Официалиял баяназда рекъон гьел лъугьа-бахъиназда къадаралде щун вуго 226 рагъулав хъулухъчи, 53 жанисел ишазул органазул хlалтlухъан, 25 ополченец ва гlадатияб халкъалъул 108 чи. 
Гьелда цадахъго данде къан кlодо гьабулеб букlана район гlуцlаралдаса 95 сон тlубайги.

Тадбир байбихьана райцентралда рагъулаб реццалъул паркалда тlугьдул лъеялдасан. Гьенисан киназго сапар бухьана Цlада “Хъахlал къункъраби” комплексалде. 

Данделъаразе саламги кьун, тадбир рагьана районалъул бетlер Нурмухlамад Задиевас.

“1999 соналъул лъугьа-бахъинал лъугьана тlолабго Россиялъул къисмат къотlулеллъун. Щайгурелъул, цебечlун букlана улкаялъул цолъи цlуниялъул суал. Нилъеда бихьана аза-азар гlадатиял дагъистаниял ополченцазул кьеразулъеги лъугьун, черхалда ярагъги борчун, жидерго Ватlан цlунизе къватlире рахъараблъи. Доб мехалда кодоб ярагъги ккун, нилъеца, дагъистанияз, Россиялъул армиялда ва ихтияр цlунулел идарабазда цадахъ хъачагъазе хlакъаб жавабги кьун, бихьизабуна патриотизмалъул ва бахlарчилъиялъул мисал. Гьеб ккана халкъазда гьоркьосел террористазда тlад бергьенлъи босиялъе аслияб гlиллалъунги. Гьелда гъорлъ жидерго бутlа лъуна Хунзахъ районалъги. Гlезегlан хираго чlана нилъее гьеб бергьенлъи. 
Цадахъго жакъа нилъеца кlодо гьабулеб буго район гlуцlаралдаса 95 сон тlубайги. Районалъул буго кутакалда бечедаб тарих. Гьедин, районалъул центрлъун кколеб Хунзахъ росу ккола респуликаялъулго рухlиялгун тарихиял цетраздасан цояблъун. Районалъ регарал тlанчал церечlезарун бажаруларо гьелъул гlадамалги гьечlого. Гьез жидерго захlматалдалъун, къохlехьеялдалъун, гlелмиялгун маданиял бергьенлъабаздалъун, Кавказалъул, граждан ва Кlудияб Ватlанияб рагъазда бихьизабураб бахlарчилъиялдалъун машгьур гьабуна гlагараб районалъул цlар. Жакъа къоялдаги районалдаса нус-нус гlолилав къеркьолев вуго Ватlаналъул хlинкъи гьечlолъи цlунун Украинаялда унеб бугеб хасаб рагъулаб операциялда. 
Ракl-ракlалъ баркула киназдаго гьаб байрам, хадубккунги гlагараб район цебетlезабиялъе хlалтlизе гьарула киназего щулияб сахлъи, халатаб гlумру ва ракълилаб зоб”, - ян абуна районалъул бетlерас.

Кlалъаялдаса хадуб гьес шапакъатал кьуна районалдаса рехсарал лъугьа-бахъиназул гlахьалчагlазе.
“25 соналъ нилъеда тlаде кlанцlарав гlаммав тушманасде рахъине къуват цолъизабуна къуваталъулал идарабазги гlадатаб халкъалъги. Гьеб рагъулъ дагъистанияз бихьизабуна унго-унгояб бахlарчилъи ва жидерго Ватlаналде бугеб рокьи. Улкаялда киданиги кlочон теларо къо ккедал, гьез бихьизабураб бахlарчилъи. Гьезие тlадегlанаб къимат кьуна Россиялъул Президентасги”, - ян абуна Хунзахъ бугеб гlорхъаби цlунулеб хъулухъалъул начальник Илья Ермолаевас. 

Гьединго кlалъаял гьаруна нилъер ракьцояв Загьид Хучбаровас, Болъихъ лъугьа-бахъиназул гlахьалчи, полициялъул хlалтlул ветеран Хlасан Гlабдулаевас, военком Шамил Мухlамадовас, СВОялъул гlахьалчи, Бихьинчилъиялъул орденалъул кавалер Мухlамад Гlалиевас ва цогидазги.

Байрам берцин гьабун букlана “Дир Ватlан - Россия” абураб фестивалалъул зоналияб этапалда рекъон тадбиралда гlахьаллъи гьабизе рачlарал мугlрузул 17 районалъул маданияталъул бутlабазул хlаркатчагlазул церерахъиназги.   

И. Мухlамадов.