Цойги лъик1ав инсан, газеталъул божарав мухбир Аллагьасул
къадаралде щвана гьаб хирияб Рамазан моц1алъул ахиралда.
Ахъбердиев Т1алх1ат Иманшапиг1ович гьавуна 1938 соналъул 24
августалда Хунзахъ росулъ рагъулав хъулухъчиясул хъизамалда. Инсуца рагъулаб
хъулухъ гьабулеб Украинаялъул Львов областалда бук1уна Ахъбердиевазул хъизам
рагъ байбихьараб заманалда. Кодов ккун Т1алх1атгун, ургьиб цойги лъимергун,
г1емераб зах1малъи-г1акъубаги бихьун т1адюссуна гьезул эбел 1941 соналъ
Хунзахъе. Цин Хунзахъ анкьгосонилаб, 1952-1955 соназ Г1арани гьоркьохъеб
школаги лъуг1ун Т1алх1атица т1убазабуна гьит1инаб къоялдаса нахъе жиндирго
бук1араб анищ-гьев ц1ализе лъугьуна Мах1ачхъалаялъул Дагъистаналъул
медицинаялъул училищеялъул фельдшерзабазул отделениялде.
Училищеги лъуг1изабун, г1олохъанав фельдшер 3 соналъ
х1алт1ула Хунзахъ районалъул сахлъи ц1униялъул цолъиялъул фельдшерлъун. Хадув
х1алт1ула Хунзахъ росдал участкаялъул больницаялъул заведующийлъун.
Рак1бац1ц1адаб хъулухъалъе г1оло Т1алх1ат мустах1икълъула СССРалъул Баг1араб
Хъанчалъул Х1урматалъул грамотаялъе.
Доб мехалъ райбольницаялъул бет1ерав тохтурлъун х1алт1улев
вук1арав Дибирчуев Сахуца кьураб лъик1аб характеристикагун 1961 соналъ
Ахъбердиев ц1ализе лъугьуна Дагъистаналъул пачалихъияб медицинаялъул
институталде.
1967 соналъ гьебги лъуг1изабун, х1алт1изе вит1ула Гъизилюрт
районалъул больницаялде гьоркьобе унеб бук1араб Гъулгъутаналъул участкаялъулаб
больницаялъул бет1ерав тохтурлъун. Гьенив х1алт1улаго, ц1алун лъуг1изарула
тохтур-терапевтасул лъай борхизабиялъул курсалги.
1969 соналда Ахъбердиев х1алт1изе вит1ула хъутабазда ругезе
хъулухъ гьабулеб амбулаториялъул заведующийлъун. Гьелдаса хадуб х1алт1изе
вачуна Гъизилюрталъул ЦРБялъул терапиялъул отделениялъул тохтур-ординаторлъун,
рехсараб отделениялъул нухмалъулевлъун.
1970 соналдаса нахъе г1умруялъул ахирисел къоязде щвезег1ан
х1алт1ана Гъизилюрталъул ЦРБялъул участкаялъулав терапевтлъун.
Бат1и-бат1иял соназ ц1алана лъай борхизабиялъул курсазда: 2
нухалъ Ростовалда, Москваялда, Тбилисиялда ва чанц1улго Мах1ачхъалаялда.
Г1емерсоназулаб лъик1аб хъулухъалъухъ Ахъбердиев Т1алх1ат
Иманшапиг1ович мустах1икълъана «СССРалъул сахлъи ц1униялъул отличник»,
«Дагъистаналъул мустах1икъав тохтур» абураб т1адег1анал ц1аразе, рик1к1ен
г1емерал Х1урматалъул грамотабазегун дипломазе. 2008 соналдаса нахъе кколаан
т1адег1анаб категориялъул тохтурлъунги.
2012 соналда мунагьал чурадие кьуна «Дагъистаналъул
г1олилазул насих1атчи» абураб цойги х1урматияб ц1ар, кколаан Россиялъул
журналистазул ва хъвадарухъабазул союзазул членлъун.
Гьит1инго рагъалъ эменги вахъун хут1арав бесдалав вук1аниги,
Т1алх1ат гъираялда г1ахьаллъулаан киналго жамг1иял тадбиразулъ, дандч1валаан
г1олилалгун, г1емерго хъвадарулаан г1агараб районалъул газеталде, рак1 унтулаан
обществалда лъугьунеб квешабщиналда.
2016 соналъ къват1ибе бач1ана Т1алх1атил шиг1риял асаразул
«Бах1арчилъиялъул лъалк1» абураб т1ехьги.
Пагьму-гьунар бугев хъвадарухъан, журналист, ц1ик1к1арав
насих1атчи, лъик1ав тохтур, рак1 разияв, аваданав инсан Т1алх1ат Иманшапиг1ович
киданиги рак1алдаса инаро гьев лъалев вук1анщиназул.
Ккараб ками г1ахьал гьабун, нижеца гъваридаб пашманлъиялъул
зигара балеб буго мунагьал чурадил яц Умужатида, хъизамалъул чаг1азда, т1олабго
г1агарлъиялда, гьудул-гьалмагъзабазда. Аллагьасда цевеги
лъик1авлъун, Алжан насибавлъун ватаги гьев сахав инсан. Амин.
| 
