20 декабралда Хунзахъ
райадминистрациялъул данделъабазул залалда т1обит1ана терроризмалде
дандеч1еялъул комиссиялъул
(антитеррористическая) заседание. Гьелда г1ахьаллъана республикаялъул
терроризмалде дандеч1еялъул
комиссиялъул вакилзаби,
киналгоязде г1унт1ун районаздаса жавабиял г1адамал, райадминистрациялъул
бат1и-бат1иял г1уц1абазул нухмалъулел, росабазул бегавулзаби, имамзаби СМИялъул
вакилзаби ва цогидалги.
Заседание бачана районалъул бет1ер Х1. Дарбишевас.
Данделъиялда гьоркьор лъурал аслияллъун рук1ана:
- 2012 соналъул терроризмалде дандеч1араб комиссиялъул
х1алт1ул х1асилал гьари;
- Ц1ияб соналъул байрамалда цересел ва байрамалъул къояз
к1вар ц1ик1к1арал г1уц1абазда х1инкъи гьеч1олъи бук1инаби;
- 2013 соналде
комиссиялъул х1алт1ул план ч1езаби г1адал суалал.
Т1оцебесеб суалалдасан к1алъазе рахъана райадминистрациялъул
бет1ерасул заместитель А. Г1абдуразакъов, РОВДялъул начальникасул ишал т1уралев М. Мух1амадов, прокурорасул ишал
т1уралев Г1. Рамазанов, Г1арани рагъулаб
часталдаса полковник А. Граненко, районалъул имам Х1асанх1ажи ва Гьоц1алъ
росдал имам Г1умарх1ажи. К1алъазе рахъараз бицана цойгидазде дандеккун нилъер районалда г1одобе
биччараб ах1вал-х1ал бугилан. Мекъаб нухдасан инч1ого, заралиял пишабазде (хъалиман бух1иялде, наркотикал
х1алт1изариялде, гьекъолдиялде) рач1ого рук1инелъун г1олилазе бат1и-бат1иял
г1адамазулгун гьарулел руго дандч1ваял, бицунеб буго лъик1аб-квешалъул.
Бук1аниги г1олилазде кьолеб к1вар ц1ик1к1инабизе ккела. Г1олилаз квешаб
гьабиялъул г1иллабазда гьоркьоб буго росабалъ х1алт1изе бак1ал гьеч1олъиги.
Бич1ч1улеб, маг1на гъваридаб к1алъай
гьабуна Ч1арадаса Г1.
Г1абдуразакъовас. Терроризм дагьлъизе ккани г1олилазе ц1ализе, х1алт1изе, лъик1аб даражаялда г1умру
гьабизе ресал ч1езаризе кколин;
г1адамазухъ бугеб ярагъ нахъе босизе ва гьеб бичулел бак1ал къазе кколин; г1арабазул улкабазда ц1алулел г1олилазул мух1канал
баянал рак1аризе кколин бихьизабуна гьес.
Районалда ругел г1уц1абазда х1инкъи гьеч1олъи ч1езабиялъул
бицана РУОялъул начальник З. Г1умаровас, райбольницаялъул бет1ерав тохтур М. Мусаевас, подстанциялъул начальник
Г1. Аслановас, пожарнияб часталъул начальник Ш. Мух1амадовас, газопроводалъул
к1удияв охраник И. Къадиевас. Г1уц1абазда х1инкъи гьеч1олъиялъул х1ал т1адег1анаб даражаялде бахине ккани,
гьенир лъезе кколел руго
видеонаблюдениялъул аппаратура,
«тревожниял» кнопкаби.
Республикаялъул
терроризмалде дандеч1еялъул комиссиялъул х1алт1ул х1акъалъулъ бицана гьелъул
вакилзаби Х1. Мух1амадовас ва Р.
Х1ажибалаевас. «Ц1ияб г1уц1и
бук1аниги комиссиялъул х1алт1ул байбихьи лъик1аб буго. Х1алт1ул лъик1аб х1асил ккезе ккани х1ажат буго, цоцазде т1амун теч1ого, киналго цолъун, цого мурадалъе г1оло
х1алт1изе. Районазул, росабазул,
г1уц1абазул нухмалъулез, полициялъулаз ва цогидазги г1олилазулгун гьабулеб х1алт1и ц1ик1к1инабизе ккола.
Гьадинал данделъаби росабалъги
т1орит1изе ккела, - ян абуна гьез.
2013 соналъ комиссиялъ районазда гьаризесел х1алт1абазул х1акъалъулъ
данделъаразе бицана районалъул
нухмалъулесул заместитель А. Г1абдуразакъовас.
К1алъазе рахъаразул докладалги х1исабалде росун районалъул терроризмалде дандеч1еялъул
комиссиялъ гьезда дандеккарал х1укмабиги къабул гьаруна.
П. Гунашева
| 
