23 февралалда лъик1аб х1адурлъиялъул праздник т1обит1ана
Г1орут1а росулъги. Гьеб ана рохалилаб ах1вал-х1алалда.
Киназдаго лъалеб жо буго, нилъер улкаялъул г1орхъаби ц1унулел рагъухъаби
г1емерал г1елазе бах1арчилъиялъул гвангъараб мисаллъун хут1ун рук1ин. Киналго
васал х1айранлъула гьезул бах1арчилъиялда. Гьезде хъвала ва ах1ула г1емерал
куч1дул. Гьезул х1акъалъулъ хъвала къисаби ва романал, рахъула кинофильмал.
Нижер Г1орут1а росу буго ц1акъго цересел росабазул цояб.
Гьенир г1адамазул бук1уна жидеего хасиятаб хьвада-ч1вади, г1адатал,
гьобол-гьудуласул адаб-х1урмат гьаби.
Ц1акъго рик1к1адасан рач1арал ц1ик1к1араб хъулухъ-ишалъул
г1олохъаби росулъе щвараб мехалъ, щибго ч1ух1и гьабич1ого умумузул
ахал-хурзабахъе щола, гьезул хабаде рахуна. Гьеб росулъ ц1акъго цебеялдаса нахъего,
щибго х1инкъи-къай гьеч1ого, ц1а ккараб бак1алде рекерула росдал киналго
г1олилал ва г1олохъаби. Х1атта мадугьалихъе ц1а свинабизе гьел аралги
лъугьа-бахъинал ккана.
Цо лъие бугониги, къват1ир ругел г1адамазе нагагьлъун
къварилъи ккани, гьеб г1ахьал гьабизе хехго данделъун ратула Сургут-Тюменалда
х1алт1улел г1олохъабицин. Дица гьеб рик1к1уна г1олилазул маг1арул ях1-намус
жеги билун гьеч1олъилъун. Шагьаралда бук1а, росабалъ бук1а к1иго чи вагъулев
вихьани, гьеб бак1алде гьоркьоре лъугьун гьезда гьоркьоб маслих1ат гьабич1ого
ч1езеги гьезул сабру г1оларо.
Гьадинаб г1ун бач1унеб г1елалъе рагъулабгун патриотияб
тарбия кьей заг1иплъараб заманалда, умумузул ратарал лъик1ал г1адаталги
хьвада-ч1вадиги к1очене теч1ого, Ват1аналде рокьи бижизабиялъул мероприятиял
т1орит1изе байбихьун буго Г1орут1а гьоркьохъеб школалдаги. Гьеб х1алт1улъ
лъик1аб мисал бихьизабулеб буго военрук х1ажих1усен Г1алих1ажиевас ва
Сайгидах1мад Шайдулаевас (суратазда). 23 февралалъ школалда т1обит1ана
рагъулабгун ват1ан бокьиялъул ва патриотикияб тадбир «Зарница».
Гьелда г1ахьаллъана к1иго команда:
1. Капитан Джамирзаев Магомед 11 класс.
2. Капитан Халилов Халил 11 класс. (суратал)
Дие бокьун гьеч1о гьаниб кинаб команда бергьараб, кинаб
команда къурабали баян гьабизе. Лъималазул лебаллъиялъги тирилъиялъги,
ч1аголъиялъги ва ахиралда берцинлъиялъги абизе бегьула бергьанин гьудуллъи ва
гьезул таваккалилан. Гьединабго ч1агояб ах1вал-х1ал бук1ана болельщиказулги.
Киназего бокьун бугин кколаан лебалаллъун, тирияллъун ва таваккалаллъун
рук1ине. Гьеб тадбир т1адег1анаб даражаялда анин абизе бегьула. Гьединабго ват1ан
бокьизабиялда хурхараб лъималазул церерахъин х1адурун бук1ана 7 классалъги
(руководитель Мух1амадова Заира).
«Патриотизм»- гьеб раг1уца г1емераб жо жанибе бачуна.
Ват1аналде рокьиги, умумузул тарих лъазабиги, нилъерго адабият бокьиги, бищунго
ц1акъ маг1арул ях1-намус ц1униги-гьелъг1ан маг1арулазул г1олилал берцин
гьабулеб жо щибниги хут1ун гьеч1о жакъа къоялда.
Г1емерал ресал руго жакъа г1ун бач1унеб г1елалъул
ват1аналдехун рокьи бижизабизе, вацлъи-гьудуллъи г1агар гьабизе ва умумузул
тарих лъазабизе гьел гьесизарулел. Гьединал тадбиразулъ жигараб г1ахьаллъи
гьабизе к1удияб гъира бугилан ккола г1арадерил лъималазулги.
Г1. Дибирх1ажиева, Г1орут1а школалъул учительница.
| 
