Дагъистаналда щив ватилев «Хунзахъилан» ц1ар раг1ич1ев чи.
Хунзахъ ккола коч1охъабазул, ц1ар арал г1алимзабазул, политикиял
х1аракатчаг1азул, совет власталъе г1оло
къеркьохъабазул ват1ан. Хунзахъ районалдаса ккола К1удияв поэт ва гуманист Расул Х1амзатов.
Ц1ар арал г1адамаз машгьур гьабураб росу ккола Т1анусиги.
Т1анусиса вуго ц1ар арав академик Шамиль
Г1алиев. Т1анусиса машгьурал г1адамазда гьоркьоса ккола гьунар бугей коч1охъан
Ах1сарат Мух1амадовна Х1абибулаеваги. Гьелъул булбулалъул г1адаб къанаг1атаб
гьаракьалъ х1икмат гьарула г1адамал. Коч1охъаналъ ц1унулеб буго халкъияб коч1ол
культура, куцалеб буго гьелде рокьи.
Т1ануси гьоркьохъеб школа лъуг1арай Ах1сарат рек1еца ах1ана
Дагъистаналъул культпросветшколалде. Гьеб лъуг1аралдасаго г1олохъанай коч1охъаналъ жинцаго т1аса бищараб коч1олаб
искусствоялдалъун г1адамал рохизарулел руго.
Загьид Х1ажиевасул, Залму Батировалъул, Расул Х1амзатовасул
куч1дулгун кеч1-бакъан бокьулезда цее
бат1и-бат1иял аудиториязда куч1дул ах1ула Ах1саратица. Коч1охъаналъул
репертуаралда руго к1вар кьун т1аса бищараб 30 кеч1. Гьел куч1дузулъ
Ах1саратица рагьун буго халкъалъул
рохелги, рек1ел къварилъабиги, кеч1 ах1иялъул культураги.
Ах1саратил коч1ол
культураялде к1удияб асар гьабуна
эмен Мух1амад Х1абибулаевичасги аваразул машгьурай коч1охъан Г1айишат
Тажудиновалъги. Жийго коч1охъаналъул раг1абазда рекъон, Ах1саратие мисаллъун
руго П. Магаева, М-Т1. Синдикъов, М. Дибирова.
Жиндирго куч1дузулъ
гьунар бугей коч1охъан Ах1саратица рагьулеб буго авар мац1алъул к1одолъи ва
бечелъи. Гьезулъ буго жиндирго
ракьалъулгун, халкъалъулгун, гьелъул бах1арчияб цебесебгун ва гьанжесебгун т1ей
гьеч1еб бухьен.
Ах1саратица г1агараб школалда кьолел руго коч1ол ва музыкаялъул
дарсал. Концерталгун уна мадугьалихъ ругел районазде ва росабалъе,
куч1дулгун цее яхъуна Мах1ачхъалаялда. Дагьаб цебег1ан цогидал коч1ол ц1вабигун гьей цее яхъана Ц1.
Х1амзатил ц1аралда бугеб Авар театралъул
сценаялда. Цогидал г1енеккаралго г1адин гьал мухъазул автор х1икмат гьавуна
маг1арулазул машгьурай коч1охъаналъул гьаркьица.
Дирго куч1дуздалъун дица бизнес гьабуларо. Дие г1ола дир куч1дуз
дихъ г1енеккарал рохизаруна. Гьаб бигъараб заманаялъ г1адамал рази гьаризе
к1веялъулъ буго дир талих1,- ан абуна Ах1саратица.
Дие рохел буго мухь босуларел дир концертаз росуцоял
рази гьарулел рук1ин.
Биччанте Ах1саратил бац1ц1адаб, роц1ц1араб, булбулалъулаб
гьаркьица хадурккунги г1адамал
рохизаризе.
«Дагестанская жизнь»
газеталдасан «Росдал зах1матчи» газеталъе маг1арул мац1алда хъвана Г1. Г1исаевас.
|