Цебеккун лъазабун букlахъе, 12 декабралда райцентралда Ш. Шамхаловасул цlаралда бугеб маданияталъул кlалгlаялда тlобитlана районалъул бетlерасул жамагlаталъулгун дандчlвай. Гьелда гlахьаллъи гьабуна муниципалитеталъул активалъ ва жамагlаталъул вакилзабаз. Данделъи байбихьулаго Нурмухlамад Задиевас абуна жакъасеб тадбиралда гlицlго рачlарал суалазе жавабал кьун гурони, хlалтlул хlисаб кьезе гьечlилан. Хlисаб кьезе бугила тlасияб соналъул январь моцlалдаян.
Суалазул гlемерисел хурхарал рукlана социалияб бутlаялда. Гlаммаб къагlидаялъ районалъул бетlерас жаваб кьуна 20 ялдасаги цlикlкlун суалалъе.
Тlоцебе гьес цlалараб суалалда хъвалеб бугоан школазда рахьдал мацlалъул дарсазул сагlтал дагьлъизариялъул, нилъерго мацl цlунизе ккеялъул хlакъалъулъ ва гьелда хурхун районалъул тlалъиялъ щибго хlалтlи гьабулеб гьечlилан гlайиб-гъвелги бугоан гьениб. Нурмухlамад Задиевас гьелъие жаваб кьуна рахьдал мацl цlунизе бищун цебе рокъосан байбихьизе кколин. Ай, хъизамалда жаниб эбел-эмен лъимергун магlарул мацlалда кlалъалел гьечlони, школалда анкьида жаниб цо-кlиго нухалъ кьураб дарсалъ мацl цlунуларилан.
Гъонохъан ва Гьоцlалъан рачlарал суалазда цlехолеб букlана рехсарал росабалъе тlабигlияб газ бачиналъул хlакъалъулъ. Гъонохъеги тlалъиялда бугеб жеги щуго росулъеги гlагараб заманалда хъахlилаб цlатари щвезе бугилан абуна Нурмухlамад Махсутlхlажиевичас. Гьединго цогидал участоказдаги гьеб рахъалда хурхун хlалтlаби унел ругила. Мисалалъе, киналго росабалъ унел руго изыскательниял хlалтlаби. Гlемерисел бакlазда, гьезда гъорлъ Гьоцlалъги байбихьун буго проектирование гьабизе. Иш тlаде кколел гlуцlабигун данд бараб планалда рекъон, хиса-баси ккечlого хутlани, 2025 сон рагlалде щвелалде тlолабго район тlабигlияб газалдалъун хьезабун букlине кколин, амма минаялъул бетlергьан чlезарулел документал гьечlони, законалда рекъон гьенибе газ бачун бажаруларин тlадеги жубана гьес.
Добго Гъонохъан хъвалеб бугоан жидер росулъ садик рагьизе ва аслияб къотlнобниги хъил тlезе ресал ратиларищанги. Цадахъ кинабго гьабун бажаруларин, цин росулъе газги бачун, хадуб гьел суалалги хlисабалде росилин жаваб кьуна гьелъиеги.
Кlахъ - Буцlра - Гlоркlачlи нух цlакъ квешаб хlалалда бугин, гьеб къачlазе рес гьечlищилан хъвалеб бугоан цоги суалалда. Гьелъие нижеца киналго документал хlадурун ругин ва хадусеб соналъниги гьеб нух къачlазе хlаракат бахъилилан абуна бетlерас.
Чанго суалал рукlана Украинаялда унеб бугеб хасаб рагъулаб операциялъул гlахьалчагlазул ва гьезул эбел-инсул рахъалдасан рачlаралги. Гьезда хурхун ищ тlаде кколел хlалтlухъабазе хасал тlадкъаялги кьун, СВОялъул гlахьалчагlазул ва гьезул хъизамазул гlузраби жиндир кидагосеб бербалагьиялда гъоркь рукlунилан абуна муниципалитеталъул бетlерас.
“Нижеда ракlалда буго лъагlалида жаниб 1-2 нухалъниги гьадинал тадбирал тlоритlизе. Гьадин, халкъалъулгун бугеб ракl рагьараб гара-чlвариялъ, нужер суалаз дие рес кьола гlадамалги гьезул гlузрабиги лъикl ричlчlизе. Баркала буго жакъасеб данчlваялда гlахьаллъи гьабуразе ва жидерго суалал ритlаразе. Гьезул цо-цоязда хурхун метерго хlалтlи гьабизе байбихьизе буго, цогидал суалал тlуразе заман къваригlуна, амма гьелги дирго хасаб бербалагьиялда гъоркь рукlине руго”, - ян абуна ахиралда районалъул нухмалъулес.
И. Мухlамадов.
|