22 июналда Хунзахъ районалъул администрациялда тlобитlана ДРялъул Жамгlияб палатаялъул советалъул данделъи. Гьелда гlахьаллъи гьабуна республикаялъул Жамгlияб палатаялъул Председатель Гlабдулмуъмин Ибрагьимовас, палатаялъул батlиял-батlиял комиссиязул председателаз, гьезул заместителаз ва цогидалги членазгун экспертаз, микьго мугlрузул районазул Жамгlиял палатабазул председателаз, районалъул нухмалъиялъ ва цогидалги жамгlиял гlуцlабазул нухмалъулезгун вакилзабаз. Аслияб къагlидаялда данделъиялда гьоркьоб лъун букlана мугlрузул районазул социалиябгун экономикиябгун цебетlеялъул ва гьел районазда туризм цебетlеялъул суалал.
Гьедин «Мугlрузулал территориязул социалиябгун экономикияб цебетlей» абураб ДРялъул Пачалихъияб программа гlумруялде бахъинабиялда хурхараб докладгун цеве вахъана Жамгlияб палатаялъул АПКялъулгун экологиялъул комиссиялъул председатель Гlабдурахlман Чураев. Гьес гlатlидго бицана рехсараб програмаялда рекъон мугlрузулал районал церетlеялъе риччалел ругел сурсатазул ва гьел хlалтlизарулаго дандчlвалел ругел захlмалъабазул. МагIарухъ туризм цебетlеялъул ва гьелдалъун халкъалъе жеги пайда цlикlкlине ккани лъугlизаризе кколел гlунгутlабазул бицана Жамгlияб палатаялъул лъай кьеялъул, культураялъул, спорталъул ва гlолилазул политикаялъул комиссиялъул председателасул заместитель Хъайтмаз Дибировас. Райадминистрациялъул гlолилазул ишазулгун туризмалъул ва спорталъул рахъалъ отделалъул начальник Шамай Гlумаровалъ бицана муниципалитеталда туризм цебетlеялъул бугеб ахlвал-хlалалъул ва гьелда сверухъ районалъул нухмалъиялъ гьабулеб бугеб хlалтlул. Гьелъул рагlабазда рекъон 2021 соналъ районалде вачlун вуго 190 азарго турист. Гьезул къадар исана жеги цlикlкlинеги ракlалда бугилан бицана гьелъ. Гьединго жакъа къоялде районалда буго 25-30 туристал къабул гьарулел хасал гьалбадерил рукъзалги. Гьединго цогидал кlалъаял гьаруразулги пикраби руссарал рукlана Дагъистаналъул росаби чlунтичlого рукlине ккани, гьенир гlадамазе, хасго гlолилазе хlажатал шартlал ва хlалтlулал бакlал чlезариялда хурхун гьабулеб хlалтlи цlикlкlинабизе ккеялде. Районалъул бетlер Нурмухlамад Задиевасги загьир гьабуна гьеб темаялда хурхун жиндирго пикру. «Жеги цебеккун киданиги букlинчlеб гlадинаб кумек гьабулеб буго жакъа хlукуматалъ росабалъ гlумру чlаголъизабизе, росабазул гьумер берцинлъизе, гьениб хlажатаб инфраструктура гlуцlизе гlунги тlокlги программаби руго жакъа пачалихъалъ рихьизарун. Амма батlи-батlиял гlиллабаздалъун жакъа жеги киналго хlадурун гьечlо гьел программабазда гъорлъ гlахьаллъиги гьабун, пачалихъалъ гьабулеб кумек къабул гьабизе. Мисалалъе, инфраструктура гlуцlиялда хурхун гlемераб жо бан хутlун буго жеги генералиял планал хlадурун гьечlолъиялда. Гьел гьечlого, законалда рекъон цониги объект базе, нухал рахъизе ва ракьазда хурхараб кинаб букlаниги цогидаб хlалтlи гьабизе бегьулеб гьечlо. Камулел гьечlо цогидал квал-квалалги», - ян абуна гьес. Данделъиялъул ахиралда цо-цо гьелъул гlахьалчагlаз кьуна жидерго суалалги.
И. Мухlамадов.
|