15 сентябралъ Калмыкиялъул
тахшагьаралда т1обит1ана Элистаялъ 147 сон т1убаялъул байрам. Россиялъул
Югалдаса гьенире ах1арал гьалбадерида
гъорлъ Дагъистаналъул вакиллъун бук1ана нилъер районалдаса «Г1акаро» ансамбль. К1удияб адаб-х1урматгун дандач1вай гьабуна гьеб делегациялда
Элистаялъул МЭРасгун Калмыкиялда бугеб
Дагъистаналъул вакиллъиялъул
нухмалъулев Мирзамух1амад Г1умаровас ва Дагъистаналда Калмыкиялъул вакиллъиялъул нухмалъулев Мух1амадрасул
Мух1амадовасги. Тахшагьаралъул къо т1обит1улелъул байрамалъулал тадбиразда
г1ахьаллъараб «Г1акаро» ансамблялъ балагьаразе кьуна к1иго концерт. Г1айшат
Тажудиновалъул цеяхъинал ц1акъго рек1ее г1уна киназего. Гьелдаса хадуб «Г1акароялъулал»
дандч1вана шагьаралъул г1адамалгун, г1олилазул къокъабигун. Ансамблялъул
нухмалъулев, Дагъистаналъул культураялъул
мустах1икъав х1алт1ухъан Мах1ач Х1асановас районалъул ц1аралдасан
Элистаялъул МЭРасеги цогидазеги кьурал сайгъатал - гьоц1дерил хунжруз киназего к1удияб асар
гьабуна. Байрамалъулал тадбиразулъ Г1ахьаллъиялъухъ «Г1акароялъеги» щвана
грамотаби, дипломал, рак1алдещвеялъул
сайгъатал. Гьеб сордоялъ «Г1акаро» лъабабилеб нухалъги цебебахъана
Элистаялъулазда, сардилъ нахъалъизег1анги лъуг1ич1о ихтилат-кеп.
Нахъисеб къоялъ «Г1акаро» къабул гьабуна Калмыкиялда
бугеб дагъистаниязул диаспораялъ.
Республикаялъул жанисел ишазул министерствалдаги цогидал жавабиял хъулухъаздаги
ругоан г1емерал дагъистаниял мадугьалихъ бугеб
Калмыкиялда.
Рак1алдаса унареб
г1емераб лъик1абгун русана «Г1акароялъулал» Элистаялдаса.
Нижер мухбир.
| 
