Гьардухъан вахъинч1еб, гьирихъ чи ине ккеч1еб росуйин бицен
батана буц1улдерил х1акъалъулъ.
Буц1улдерида лъач1о, революциялда цебего г1адин гьанжеги
ц1акъ т1ибит1араб бет1ербахъиялъе г1арац балагьун, къват1ире хьвади. Буц1ул
рук1ун руго жалго жидецаго х1ебт1арал
къват1иса жоялде ккеч1ел г1адамал. Гьеб
киналъего г1иллаги бук1ана буц1улдерил г1урабго к1одолъиялъул бач1ин
ц1ик1к1араб ракь бук1ин. Ц1акъ хирияб, къимат к1удияб жо бук1ана умумузе ракь.
Ракьалде бук1араб гьеброкьи умумуз лъималазул геназулъги лъун тун буго. Гьеб баянлъана гьал къояз
буц1улдерил годек1аниб «Росдал зах1матчи» газеталъул мухбирасул
гара-ч1вариялдаги.
«Бокьилищ ракьал г1адамазул бет1ергьанлъиялде кьезе». Дуца
ричун росилаанищ ракьал?» - абурал
суалазе гьадинал жавабал щвана нижее.
Г1исаев Мух1амад (1944
с.гь. инвалид). Дихъго бугеб ракь жеги бекьула. Ракьал хасал г1адамазул бет1ергьанлъиялде кьезе
бегьуларо. Хасал г1адамазул
бет1ергьанлъиялде кьурал фабрик-заводал ч1унтана, бензиналъул, токалъул,
т1орччол, газалъул ва гь.ц. багьа зодобе бахана. Ракьул «прихватизация» гьабизе
разияв гьеч1о.
Мух1амадов
Сайгидах1мад (1936 с.гь.). Дица ракь бекьула лъималазул кумекалдалъун.
Ракьал ричани, х1асил квешаб ккела: бечедал чаг1азде гьелги руссун, гьезда цере
х1алт1изе ккела. Умумузул ракьал гьезул лъималазухъе т1адруссинаризе ккела.
Мух1амадов Мух1амад
(1937 с.гь., учитель). Дида
Сайгидах1мадил пикру г1акъилаблъун
бихьула. Бет1ергьабазухъе т1адбдуссинабизе ккола ракь. Бичизе бегьуларо.
Мух1амадов
Халатмух1амад (1924 с.гь). Ракьалдасан пайда босулеб гьеч1илан, кьуч1
гьеч1ел далилалги рачун, ракь бичизе бегьуларо. Бекьич1ого ракьудасан боц1и хьихьизе пайда босулеб буго.
Дайитбегх1ажиев Х1ажи
(1973 с.гь.). Ракьул цо кесек бичизе
разияв гьеч1о дун. Нижер умумузул ракьал лъицаялиго щай ричулел? Х1укуматалъ,
бензин, солярка хира гьабун, пайда гьеч1еб бак1алде ккезабун буго хур бекьи.
Г1и-боц1и хьихьиялъулго пайда бук1ун, г1адамаз гьеб г1емер гьабизе байбихьун буго. Ракь бичани, дица
боц1и киб хьихьилеб. Боц1иниги хьихьич1ого, дун Буц1ра щибулев. Ракьал
ричиялъул мурад буго росаби лъуг1изари.
Жанкуров Мух1амад.
Х1алухъаби рекьиялъул пайда бук1инаан
бак1аризе, лал т1амизе техника бугебани. Колхозалъул комбайн квер ч1валеб ракь
бекьулареб хъутаналда бугин абула.
Лъаларо щибулеб гьеб гьениб тун бугебали. Картошка бекьиялъулги пайда лъуг1ун,
боц1уе люцерна хьалеб буго г1адамаз. Дицагоги кваназе г1олеб гуреб картошка
бекьуларо. Боц1уе люцерна, ниха бекьула. Ракь бичиялда абуни, разилъуларо.
Давудов М. (1955
с.гь.), росдал администрациялъул землеустроитель. Ракь бичиялде дандеч1арав
вуго. Щибха гьабизе кколеб? Гьеб кьезе ккола росабазул администрациязул
бет1ергьанлъиялде. Гьез кьела г1адамазухъе ижараялъе. Гьедин бегьулеб гьеч1они,
умумузул ракьал бет1ергьабазухъе
т1адруссинаризе ккела, мухь босич1ого.
Расулов М. (1956
с.гь.) шофер-дальнобойщик. Ракьал хасал г1адамазул бет1ергьанлъиялде кьезе
бегьуларо. Гьединал ракьазда ругел х1оринир ччуг1а кквезе, чвердезе гьукъула
Россиялда, жидерго ракьалда г1урул
раг1алде чвердезе риччаларо. Г1оразул, х1оразул раг1алда ралел руго х1ухьбахъиялъул зонаби, гьенире рач1уна
бечедал г1адамал, мухьдахъ рек1елгъей гьабизе. Гьединаб къисмат ккела, хасал г1адамазухъе ракьал, рохьал руссаниги.
Гьеб суалалъулъ ц1акъ ц1одорго рук1ине ккола. Бет1ергьабазухъе ракьал
т1адруссинаригог1ан дандекколеб жо бук1инин
кколаро.
Ракь бичиялде данде ч1арав вук1аниги, бичич1ого толеб гьеч1они, дицаги босила рокъоб
гьеч1они, къват1исаги г1арацги босун.
Гьединабго пикру загьир гьабуна Х1ажиев Х1ажимух1амадицаги
ва Х1ажиев Мах1ачицаги. Мах1ачица Г1алъада г1алах, г1анк1уязул ферма базе бичун
босилаанила гьенир шарт1ал – токги лъимги бугебаниян абулеб буго.
Гара-ч1вариялда г1ахьаллъаразе бокьулеб гьеч1о гьеб
бича-хисиялда гьоркьоре х1акимзаби
риччазеги. Цониги даражаялъул х1акимасде гьезул божи гьеч1о.
Х1асил: Буц1ул ракь бичиялда данде ч1арал руго. Х1инкъулел руго цо хасал г1адамазул
бет1ергьанлъиялде ракь иналдаса. Ракьул «прихватизация» бокьулеб гьеч1о балада
нахъа.
Бокьилаан ракь
бичиялъул, гьеб хасал г1адамазул бет1ергьанлъиялде кьеялъул суалаздасан цогидал
росабазул г1адамазулги пикру лъазе.
Г1иса Г1иса
| 
