26 сентябралда районалда тlобитlана Хъизамалъул соналъул хlурматалда “Дир хъизан” абураб кlудияб тадбир. Гьелда гlахьаллъи гьабизе рачlун рукlана республикаялъул Хlукуматалъул Председатель Гlабдулмуслим Гlабдулмуслимов, гьесул заместитель Гlабдурахlман Махlмудов, цо-цо министрал, мугlрузул территориалияб округалъул районазул ва респуликаялъул СМИязул вакилзаби ва цогидалги.
Тадбир байбихьана Украинаялда унеб бугеб хасаб рагъулаб операциялъул къурбанал ракlалде щвезариялъул мурадалда райцентралда бараб парк рагьиялдасан. Кьерхараб гьава-бакъ букlаниги, гlезегlан гlадамал рачlун рукlана гьенире. Данделъаразда гъорлъ рукlана районалъул актив, СВОялда къадаралде щваразул улбулгун лъудби, жамагlатчагlи ва цогидалги.
“Бищун цебе баркала кьезе ккола тlоцебе гьадинаб акция тlобитlизе ракlалда ккаразе. Цинги республикаялъул Бетlер Сергей Алимовичасул тlадкъаялдалъун кlиго сон буго гьаб тlобитlулебги. Гьелъул мурадги буго нилъер улкаялъулги ва тlолабго инсанияталъулги интересал цlунулаго жидеца рухl кьурал бахlарзал ракlалде щвезари. Гьединлъидал, гьаб ахалъул бетlергьабилъунги руго Ватlаналъул хlинкъи гьечlолъи цlунулаго, къадаралде щварал нилъер гlолохъабазул эбел-эмен, лъимал ва лъудби. Нилъер щивасул букlуна жиде-жидер къисмат, инсан дунялалде вачlиналдего Аллагьас хъван букlуна гьесие къадар. Амма кигlан захlматаб къисмат бугониги, кинал захlмалъаби дандчlваниги, инсанас гlаданлъи чорхолъа билизе биччазе бегьуларо. Гьединлъидал нилъеца Тlадегlанасда гьаризе ккола чорхолъа гьеб гlаданлъи ва яхl-намус тlагlине тогеян. Щайгурелъул, рекlелъ иман гьечlев чи гьаб гlумруялда цеве тlоларо”, - ян абуна Гlабдулмуслим Мухlидиновичас.
“Жакъасеб тадбиралъул кlудияб кlвар буго гlун бачlунеб гlелалъе патриотикияб тарбия кьеялъе. Цо-цоязда ракlалде ккезе бегьула нижеца гьаб паркги бан, гьанжеялдаса нахъе гьаб рехун тезе бугилан. Жакъа нилъеца гьаниб районалдаса Ватlаналъе гlоло рухl кьурав щивав чиясул цlаралда чlезе руго гъутlби ва гьезда тlад чlвазе руго бахlарчиясул хlакъалъулъ информация цlализе рес кьолел QR-кодалги. Жакъа нилъер муниципалитеталдаса 500 цlикlкlун чияс гlахьаллъи гьабулеб буго СВОялда. Аллагьас гьел киналго рукъалде лъикl рачаги”, - ян кlалъана районалъул нухмалъулев Нурмухlамад Задиевги.
Цlакъ рекlелъе рортулел рагlаби абуна тlоцебе “Ракlалде щвелъул ах” гlуцlизе пикру ккарай, СВОялда къадаралде щварав васасул эбел, Буйнакск районалдаса Хадижат Сайкумовалъ. Хадуб киназго цадахъ чlана гъутlбиги.
Гьенисан киназго сапар бухьана Цlада “Хъахlал къункъраби” мемориалияб комплексалда. Гьелда нахъа жидерго миллияб квен-тlех ва тlагlел-алатги жаниб лъун чадрал хlадурун рукlана 19 районалъул вакилзабаз. Киназго рихьизаруна жидерго кечl-бакъаналъе бугеб гьунарги. Щибаб районалъул чадиралде аскlоре щвана Гlабдулмуслим Гlабдулмуслимовги цадахъ рукlарал гьалбалги. Гьениб аскlобго гlуцlун букlана спортивияб, гlолилазул ва арт-площадкабиги.
“Жакъа ракlалде щвезабизе бокьун буго нилъер гlумруялда хъизамалъул бугеб кlваралъул. Нилъ дунялалде рачlуна хъизамалдасан. Хъизамалда жанисан гlелалъ хадусеб гlелалъухъе кьола лъикlал гlадатал. Дагъистан кидаго машгьураб букlана гlемерал гlадатал гъорлъе рачараб жиндирго бечедаб маданияб ирсалдалъун. Нилъер хъизамазда кидаго рукlана ва руго гlемерал лъимал ва къварилъи-гlатlилъи ккедал, букъараб зар гlадин цолъула гьел. Хасаб баркала буго чияр лъимал хьихьизе рачарал хъизамазеги. Хъизаналъул бугеб кlваралъул бицуна нилъер республикаялда бертаде хlадурулеб куцалъги. Гlадаталда рекъон берталъ данделъула бахlаразул эбел-инсул гlага-божарал ва гьудул-гьалмагълъи. Узухъда, щибаб хъизамалъе кlудияб рохеллъун букlуна лъимер гьаби. Нилъер гlадаталда рекъон лъимаде йигей чlужугlадан цlунула захlмалъи-къварилъиялдаса. Лъимер гьабидал, хlадурула куракул карщги. Нилъер гьаниб цlунун хутlун ругел гьоболлъиялъги, кlудиязул адаб-хlурмат ва тlалаб-агъаз гьабиялъги ва диниял байрамал кlодо гьариязги квербакъула нилъер жамгlияталъул рухlиябгун моралияб аслу цlунизе ва щула гьабизе. Дагъистаниязул гlумруялда кlудияб бакl кколаан захlматалъги. Магlарухъ гlурал лъимал гьитlинаб къоялдаса нахъе ругьун гьарула захlматалде ва гьелдалъун куцала гьезулъ къо хlехьей, бахlарчилъи ва къартl. Нилъер улкаялъулго тарихалда гъваридал лъалкlал тарал машгьурал дагъистаниязул гlемериселги гьаруна ва гlуна рорхатал мугlрузда, куцана гьединабго тарбиялда. Хунзахъ районги ккола машгьурал шагlирзабазул къебелъи. Гьанир рижана Цlадаса Хlамзатги, Расул Хlамзатовги, Фазу Гlалиеваги”, - ян абуна регионалъул Хlукуматалъул Председателас жиндирго кlалъаялда.
Премьерас шапакъатал кьуна республикаялъул мугlрузул районаздаса цадахъ 45 цlикlкlун санал рарал, бесдал лъимал хьихьарал, гlемерал лъимал гlезарурал, СВОялъул гlахьалчагlазул ва династиялъулаб 19 хъизамалъе. Гьезда гъорлъ рукlана нилъер районалдаса Гьамущи росулъа СВОялъул къурбан Ахlмад Мухlумаевасул хъизан, 5 лъимадул эбел Чакар Мухlумаева ва Накlкlикьа Ахlмад Мухlамадовасул эбел Меседу Мухlамадоваги. Гьелъие кьуна васасул Бихьинчилъиялъул орден.
Тадбиралъул официалияб бутlаялдаса хадуб гьелда гlахьаллъизе рачlарал районазул творческиял коллективаз рихьизаруна театралиял сценкабаздасан ва кучlдул ахlиялдасан гlуцlарал церерахъиналги.
И. Мухlамадов.
| 
