19 сентябралъ райадминистрациялъул бет1ерасул
кабинеталда т1обит1ана «Хунзахъ
район» муниципалияб г1уц1иялъул
коллегиялъул иргадулаб данделъи. Райадминистрациялъул аппараталъул х1алт1ухъабаз
гуребги, гьелда г1ахьаллъи гьабуна росабазул администрациязул бут1руз,
РОВДялъул ва цогидал жавабиял идарабазул нухмалъулезгун х1алт1ухъабаз.
«Районалда общественнияб г1адлу-низам ц1униялъе полициялъул
участковиязгун халкъиял дружинабаз гьабулеб цадахъаб х1алт1ул рахъи буголъи
борхизаби» абураб докладгун данделъаразда цеве вахъана райадминистрациялъул
бет1ерасул заместитель Х1амид Гьит1инов.
- Цогидал бак1азде данде ккун г1одосанго нилъер район
г1одобе биччараб, такъсирчилъи дагьаблъун бук1ана, амма ахираб заманалда республикаялдаго, хасго сверухъ ругел
районазда лъугьун бугеб х1алуцараб
ах1вал-х1алалъ, цо-цо районазда такъсирчилъи ц1ик1к1иналъ, районалдаги гьеб
т1ибит1изе рес бук1иналъ т1амулел руго
ихтиярал ц1унулел органал жидерго
х1аракатчилъи борхизабизе. Гьебги х1исабалде босун, араб соналъул
сентябралда ДРялъул президентасул Указалъул кьуч1алда г1уц1ана районалъул халкъиял
дружинабазул штаб ва тасдикъ
гьабуна гьел дружинабазул х1акъалъулъ положение. Районалда общественнияб
г1адлу-низам ц1уни халкъиял дружинабазул аслияб масъала бук1аниги, г1емерисел
росабалъ гьеб иш билъанхъизабулеб гьеч1о. Баяназда рекъон 321 дружиник вук1аниги, киназего щун гьеч1о хасал
удостоверениял, дежурствалде рач1унезги г1емерисез повязкаби ралел гьеч1о, гьеч1о гьединго
дружиникал жанире руссунеб бак1, руго гьеб ишалъулъ жеги г1емерал г1оларел
рахъал, - ян бицана докладчияс жиндирго к1алъаялда. Байрамкъояз халкъ
данделъулел бак1азда, хасго райцентралда гьеб х1алт1и роц1ц1инабизе ккеялда
т1адч1ей гьабуна Гьит1иновас.
Общественнияб г1адлу-низам ц1униялъулъ халкъиял дружинабазул
х1аракатчилъи ц1ик1к1инабиялъул к1варалъул бицун к1алъана РОВДялъул начальник
Гъайрбег Султ1анов, полициялъул майор Шамил Къадиев, цо-цо участковиял,
Г1обода, Гьоц1алъ, Бакьагьеч1и росабазул бегавулзаби Мух1амадов Сидикъ, Валиев
Шамил, Г1абдулбасиров Мух1амад ва цогидалги. Х1асилаб к1алъай гьабуна данделъи
бачарав райадминистрациялъул бет1ер Саг1ид Юсуповас.
Данделъиялде босараб к1иабилеб суал – ДОСААФалъул гьанжесеб РОСТО лъайкьеялъул г1уц1абазда
ц1ализе армиялде рачунел призывникал рит1иялъул х1акъалъулъ
информация кьуна райадминистрациялъул бет1ерасул заместитель Асадг1али
Г1абдуразакъовас. Гьеб ана г1ахьаллъаразе пайдаяб, цоцазда рич1ч1иялъул
ах1вал-х1алалда.
Р. Х1амзатов.
|
