28 февралалъ районалъул нухмалъулел, г1уц1абазул
х1алт1ухъаби, интеллигенция ва т1аде рач1арал гьалбалги г1ахьаллъун
райадминистрациялъул данделъабазул залалда т1обит1ана 4 марталъ улкаялда
т1орит1изе ругел Россиялъул президент вищиялъул рищиязда «Единая Россия»
партиялдасан президентлъиялде кандидат Владимир Путинил рахъ кквезе районцоял
ах1араб данделъи. Данделъиги рагьун цебераг1иялъул к1алъай гьабуна
райадминистрациялъул бет1ер Дарбишев Х1ажияс.
К1алъазе вахъарав Дагъистаналъул т1абиг1иял сурсатазул ва
экологиялъул министр Шамил Мух1амадовас т1адч1ей гьабуна В. В. Путинил рищиязда
цебесеб программаялда улка цебет1езабиялъе гьес чара гьеч1ого х1ажаталлъун
рик1к1унел цо-цо пунктазда, рихьизаруна Шималияб Кавказалда ч1ара-хьараб
ах1вал-х1ал ва социалиябгун экономикияб цебет1ей бук1инабиялъе х1исабалде
росарал масъалаби. Министрасул рахъ ккун к1алъана цо-цо г1уц1абазул
нухмалъулел, интеллигенциялъул вакилзаби.
Районалъул нухмалъулес ва к1алъазе рахъараз районцоял ах1ана
4 марталъ киналго рищиязда г1ахьаллъизе ва нилъерго бук1инеселъул пикруги
гьабун мустах1икъав кандидатасда ц1арч1вазе.
| 
