 Кидаго г1адин исанаги байбихьана районалъул бет1ер росабалъеги
ун, гьоркьов чи гьеч1ого, бит1ахъего, бадиса бадиве г1адатал г1адамалгун
дандч1вай, гьезул х1ажатал лъазари. Ц1ияб 2012 соналъул февралалъул байбихьуда
Х1. Дарбишевас росабалъе сапар бухьана. Моц1рол т1оцебесеб соналъго гьев щвана
Сивухъе, Харахьиве, Моч1охъе, Г1оч1лове. Гьеб бук1ана районалъул бет1ерлъуде
вач1аралдаса Х1. Дарбишевас росабалъе гьабулеб к1иабилеб свери (круг). Гьесда цадахъ
рук1ана районалъул жавабиял х1алт1ухъаби, ва цо-цо г1уц1абазул нухмалъулел.
Дандч1ваялда рорхулел рук1ана районалъул росабалъе газ
бачиналъул, ц1атариялъул (т1орччол) бугеб къварилъи, ц1ехолеб бук1ана харжал,
пенсиял кват1изариялъе г1илла, ва цогидабги. Гьел г1аммал суалазда цадахъго
рук1ана хасал, жиб-жиб росдал г1адамазул къварилъабазда хурхун рорхарал
суалалги. Районалъул бет1ерас ва цадахъ рук1арал гьалмагъзабаз рорхарал суалазе
кьуна жавабал, бицана ругел г1узраби лъуг1изаризе ругел нухазул, гьаризе кколел
тадбиразул. Газ бачиналда хурхун районалъул бет1ерас лъазабуна гьаб соналъ
Гиничукье, Бакьагьеч1ибе, Г1аранибе, Ц1адабе, Хунзахъе газ бачун лъуг1изабизе
бугилан. Хут1арал т1алъиялъул росабалъ газил трубаби лъезе байбихьизе
бугиланги. Т1олабго районалда газ бачун лъуг1изе буго 2016 соналъ. Гьел баянал
«Росдал зах1матчиялъ» цереги кьун рук1ана. Харжал кват1иялъе гьадинаб баян
кьуна районалъул бет1ерас. 2010 соналъул 8 маялда къабул гьабураб федералияб
законалда рекъон, киналго районалъул идарабазда гьаруна хиса-басиял. Гьел
рикьана бюджетниязде, казениязде ва автономниязде. Цох1о гьел хиса-басияздалъун
лъуг1улеб бук1инч1о х1алт1и. Ц1иял г1уц1абазе гьаризе кколел рук1ана уставал,
рагьизе кколел рук1ана расчетазулал счетал хисизе кколел рук1ана печатал ва
ц1идасан хъвай-хъваг1ай гьабизе кколеб бук1ана налогазул инспекциялда. Гьеб
г1урабго к1одолъиялъул х1алт1и бук1инги х1исабалде босун, районалъул киналго
идарабазул нухмалъулезда цебеккунго бицун бук1ана гьабизе бугеб х1алт1ул
к1варалъул, бич1ч1изабун бук1ана гьезда т1аде кколеб бугеб жавабчилъиялъул.
Рехсараб х1алт1и лъуг1изе кколаан лъаг1алил ахиралде. Амма цо-цо г1уц1абазул
нухмалъулезул жавабчилъи гьеч1олъиялъ ва тасамах1лъиялъ рехсараб х1алт1и хадуб
бехъерхъизабуна, бихьизабураб болжалалда лъуг1изабич1о. Гьезул г1айибалдалъун
кват1ана харжал кьей. Гьанже рехсараб х1алт1и раг1алде бахъинабун буго,
счетазда г1арац буго, харжал кьезе байбихьун буго.
2011-2012 соназул хасалоялде т1урччи х1адуриялда районалъул
г1адамазда, школазда, ясли-ахазда ва районалъул идарабазда г1езег1ан
зах1малъаби дандч1вана, районалъул нухмалъиялъ гьеб суалалда сверухъ г1ураб
х1алт1и гьабуниги. Араб 2011 соналъ халкъалъе «Дагтоппромалъ» Хунзахъ
районалъул т1урччи кьезе кколел г1адамазе бичизе бач1ине кколеб бук1араб 18000
тоннаялъул бак1алда бач1ана г1иц1го 3718 тонна т1орччол. Районалъул нухмалъулез
гьеб суал борхана республикаялъул президентасде щвезег1ан, амма х1асил ккеч1о.
Гьаб соналдаса т1урччи-ц1ул г1адамаз жидецаго х1адуризе
буго. Т1орччоде т1аде кумекалъе льготниказе кьолеб г1арац г1адамазухъе
жидехъего кодобе кьезе буго. Районалъул г1адамазе баяналъе бицун тела 2012
соналдаса байбихьун, т1урччи бичизе буго базар багьаялде, ай багьаби жалго
т1орччол бет1ергьабаз ч1езабизе буго.
Дандч1ваязда борхараб ясли-садазе, школазе ремонтал
гьариялъул суалазе жаваб кьолаго, районалъул бет1ерас лъазабуна, ракьалда
бук1ахъе, гьел идарабазе капиталияб ремонт гьабун бажаризехъин гьеч1илан.
Х1ажатал школазе, садиказе гордал, нуц1би хисизе г1арац кьеч1ого телариланги.
Харахьиб унтараблъун батана нухазулги лъелги суал. Нухал
къач1аялъе кумек щолеб буго республикаялъул Халкъияб Собраниялда нилъер цеве
вук1арав депутат, гьанже росдал маг1ишаталъул министерасул 1-сев заместитель
Г1абдуразакъов Сайгидг1алихъан. Проект гьабулеб буго Харахьи-Гьамущи-Мущули,
Харахьи-Г1орут1а-Колохьиндахъ нухазе ремонт гьабизе, х1ажатаб бак1алда нухал
г1ат1ид гьаризеги. Харахьи-Г1орут1а росабазда гьоркьосеб нухазде асфальт т1езе
буго.
Харахьибе лъим бачине буго Гьамущи-Мущули лъел мухъалдаса
бат1аги гьабун «Бац1ц1адаб лъим» программаялъул х1исабалда.
Г1оч1лоб араб соналъ базе байбихьараб спортзал исана бан
лъуг1изабизе х1аракат бахъизе буго. Гьебго росдал школалъе ремонталъеги ресал
ратизе руго. Моч1охъ ГРС рагьун лъуг1идал, гьеб росдал г1адамазул рукъзабахъе
газги бачине буго.
Г1иса Г1исаев.
|
