 Дагьал церег1ан къоязда «Одаренный
ребенок» централъ районалъул школлъималазда
гьоркьоб т1обит1ана техникияб ва художественниябгун прикладнияб творчествоялъул выставка. Районалъул выставкаялда
лъик1ал х1асилал ккарал х1алт1аби
г1ахьаллъана гьединабго
республикаялъул выставкаялда.
Балагьаразул бер биххулеб х1ал бук1ана централде рач1ун
рук1арал лъималазул квераз гьарурал цояздаса цоял берцинал
х1алт1аби рихьидал; гьенир рук1ана самолетал, гуми, бисералъ,
кьер-кьерал куназ угьарал лентаялъ
гьарурал суратал, релъабаз рахъарал суратал, ц1улал, х1алт1ул, кагътил гьарурал
т1аг1алаби, бат1и-бат1иял расанк1аби ва цогидалги г1емерал х1алт1аби. Жюриялъе ц1акъ зах1мат бук1ун батила гьединал, г1езег1ан т1адег1анаб махщалида
гьарурал х1алт1абазда гьоркьоса бищунго лъик1ал т1аса рищизе.
Выставкаялде рач1арал х1алт1абазул т1аса рищарал рит1ун рук1ана Мах1ачхъалаялда т1обит1араб
республикаялъул выставкаялде. Гьенибги лъик1ал къиматаздалъун к1одо гьарун руго нилъер лъималазул х1алт1аби. К1иабилеб даражаялъул диплом щун
буго Хунзахъ № 1 гьоркьохъеб школалдаса Х.
Рах1матулаевалъул х1алт1уе. Г1ахьаллъаралъухъ, экспонатал
х1адурлъаралъухъ грамотабаздалъун к1одо гьарун руго нилъер г1емерисел
х1алт1аби. Бищун ц1ик1к1ун – анлъго грамота щун буго Хьиндахъ гьоркьохъеб школалъул ц1алдохъабазе: Х1.Х1усейновасе,
М.Шапиевасе, М.Мухтаровалъе,
И.Мусалаевасе, П.Къадиевалъе, «Радиоэлектроника» цолъиялъул коллективалъе. Ункъго грамота щвана Х1ариколо гьоркьохъеб школалдаса ц1алдохъабазе: (М.Г1амирханов,
С.Г1амирханов), «Работа по металлу», «Изготовление кукол» цолъиялъул коллективал, к1и-к1и грамота щун буго Шотот1а
аслияб «Ткачество» цолъиялъул коллектив( К. Х1айдаров), Хунзаахъ № 1 (М. Мах1мудова,
Ш. Г1амирг1алиева), Гьамущи
гьоркьохъел школазе (Р.Мух1амадова,
А.Ибрагьимова), цо-цо грамотаялдалъун к1одо гьаруна Лъаг1илухъ (Д.Хъайнтмазов), Гьоц1алъ (М.Мух1амадов), Бакьагьеч1и «Обработка дерева»
цолъиялъул коллектив, Моч1охъ «Декоративная
роспись» цолъиялъул коллектив, Г1арани
(Р.Г1абдурах1манова), Хунзахъ № 2 (Х. Шихалиева) гьоркьохъеб ва Заг1иб (Х1.Муртазаг1алиев), Гьац1алухъ
(М. Хъазанбиев) аслиял школазул ц1алдохъабазул х1алт1аби.
Республикаялъул выставкаялда гьелгощинал х1алт1аби
лъик1аллъун рик1к1ин ккола нилъер лъималазул к1удияб бергьенлъи.
Гьелъ бихьизабулеб буго лъимал гьит1инго
бокьараб махщалие ругьун гьаризе
бажарулеб бук1ин лъималазулъ чанги
бахчараб махщелги бажариги-лъайги бук1унеб бук1инги. Гьай-гьай, гьеб кинабго бараб буго педагогазда – баркала буго
гьезиеги лъималазулгун гьединаб творческияб х1алт1и гьабулеб бук1иналъухъ.
Т1адехун рехсарал ц1алдохъабаздагун педагогазда гьезул бергьенлъабиги баркулаго
гьарула гьезие жеги ч1ах1иял
бергьенлъаби росизе тавпикъ,
гьабулеб х1алт1и бокьи, сахлъи. Гьединго к1удияб баркала буго «Одаренный
ребенок» централъул свак лъаларел
нухмалъулей Х1.Мух1амадовалъе ва специалист Р.Дибирчуевалъе. Гьез т1орит1улел
пайда ц1ик1к1арал тадбираз лъималазе
кьолеб тарбия лъай цойги даражаялъ т1адег1анаблъун гьабулеб буго.
П.Гунашева
|
