Гьал къоязда районалъул лъималазул библиотекаялда т1обит1ана Афгъанистаналда рагъулаб хъулухъги т1убан т1ад руссарал Г1абдулкъадиров Х1ажимурад Г1абдулвах1идовичасулгун, Мух1амадов Мух1амад Г1ариповичасулгун дандч1вай. Гьеб х1адурун бук1ана библиотекаялъул х1алт1ухъабазда цадахъ хъизаназе ва лъималазе социалияб кумек гьабиялъул централъул психологиялъулгин педагогикияб отделалъул (ЦСПСД) х1алт1ухъабазул нухмалъиялда гъоркь. Данделъи бачарай ЦСПСДялъул х1алт1ухъан С. Мух1амадовалъ г1одорч1аразда рак1-рак1алъ баркана Ват1ан ц1унулезул къо-23 февраль, гьезие чорхое сахлъиги, халатал соназул рохалилаб г1умруги гьарулаго, гьелъ иргадал к1алъазе раг1и кьуна Х1. Г1абдулкъадировасе ва М. Мух1амадовасе. Гьес г1одорч1аразда бицана Афгъанистаналда бук1араб рагъулъ нилъер г1олохъабаз бихьизабураб бах1арчилъиялъул, къо х1ехьеялъул. Г1олохъабаз г1ун бач1унеб г1елги ах1ана Ват1ан бокьулеллъун рук1ине, нилъер умумузул бах1арчияб нухдасан къвак1ун гали цебехун босулеллъун рук1ине, лъик1 ц1ализе, мисалияб г1адлу-низам бук1инабизе. Балагьаразе ц1акъго бокьана Хунзахъ № 1 гьоркьохъеб школалъул 4в классалъул ц1алдохъабаз Ват1ан ц1унулезул къоялъул х1урматалда х1адур гьабураб церерахъин. Ц1акъго к1арчамго берцинго х1адурараб церерахъиналда лъималаз раг1и кьуна кире кканиги г1агараб Ват1аналъул рит1ухъал лъималлъун рук1ине мисалияб къаг1идаялда ц1ализе.

Маг1наяб, г1одор ч1аразе насих1аталъулаб к1алъай гьабуна централияб библиотекаялъул х1алт1ухъан П. Хочоевалъги. Гьелъ рак1алде щвезабуна доб кьог1аб рагъул заман, жидерго лъимерлъи. Ц1алдохъаби гъираялда г1енеккун рук1ана цересел жидерго кьерилазул г1умруялдаса лъугьа-бахъиназдаса.

Дандч1вай ана г1уц1адго ва балагьаразе интересаб къаг1идаялда.