Исана  т1оцебесеб июлалъ 60 сон т1убана  республикаялдаго ц1ар т1ибит1арав «тарг1ил устар», т1абиг1аталъго волейболалъе  гьунар-махщел сайгъат гьабурав, гъорлъе лъугьаралдаса т1убараб къуватги жигар-жанги спорталъе кьурав  К1ахъа Хвалчен Мух1амадил  г1умруялъул. Араб г1асруялъул  лъабкъоялда анц1абилел соназ волейболалъе къват1ибе бахъараб гьесул хвалчен жакъаги лъалиниб лъун гьеч1о.

Т1ок1лъигун Г1арани школа-интернаталда 8 класс лъуг1арав Ах1мадов Буйнакскиялъул к1иабилеб педучилищеялде лъугьуна ц1ализе. Гьит1инго г1елму-лъаялде ц1айи бугев Мух1амадие к1удияб зах1малъиго ккеч1о хасаб гьоркьохъеб лъай босизеги. Баг1араб дипломгун лъуг1ула гьесул педучилище ва 1970 соналъ районалде т1ад вуссарав г1олохъанав специалист Г1урк1ач1и байбихьул классазул учительлъун т1амула х1алт1изе. Г1емерго кват1ич1ого гьениса Мух1амад  вачуна г1агараб К1ахъ байбихьул школалде. Математикаялъе  къуватав вук1иналъ батила,  Мух1амадие шашкаби, шахматал гьабсаг1атги рокьула, цо шахматазул турниралда районалъул чемпионлъунги вахъун вук1ана гьев. Лъик1аб махщел бук1ана мандолина - балалайкаялда бакънал рачинеги. Т1убан спорталде  вуссиналъ музыкаялде рег1уларин абула гьес.

Гьоркьохъеб лъайги босун байбихьул классазда дарсал кьун ч1езе Мух1амадил рак1алъ къабул гьабуларо. 1971 соналъ пединституталъул физикаялъулгун математикаялъул факультеталде ц1ализе лъугьарав Ах1мадов т1убанго волейболалде вуссуна. Киг1анго математика бокьулеб бук1аниги спорталъ т1алъи  босула ва т1оцебесеб курс  лъуг1ун хадуб, гьес документал физкультурияб факультеталде кьола. К1удияб адаб-х1урматгун рак1алде щвезавула педучилищеялдаго жиндир  тренерлъун вук1арав, волейболалдехун рак1 ц1азабурав тренер Г1али Г1абдусаламович. Баркала бугила гьесие.

…Мух1амад Шахшаевич Къадилмух1амадов - пединституталъул физкультурияб факультеталъул преподаватель, волейболалъул чанги «устар» куцарав, республикаялда волейбол цебет1еялъе г1емераб х1алт1и гьабурав тренер. Гьесда бихьула т1оцебе Ах1мадовасулъ спорталде бугеб рокьиги, вук1инесев волейболистги. Дол рик1к1адал 70 соназ  к1иявго Мух1амадил ккараб гьоркьоблъи жеги щулалъун, унго-унгояб гьудуллъиялде сверун буго жакъаги. Шахшаевичасул т1адч1арал, щибаб къойилал тренировкабазги, г1адатиял х1аязги, рик1к1ен г1емерал дандч1ваял-турниразги Ах1мадовасул «Хвалчен» гьавуна. Г1ахьвахъ районалда  т1обит1улеб турниралда волейболалъул фанат - К1арат1аса Г1умарица гьесул тирилъи-лебаллъиялъе къимат кьун «балагье цо, хвалчен г1адин  хьваг1улеб куц,» - ан ах1аралдаса «Хвалчен» абураб т1ок1ц1ар даимго рек1ана  Мух1амадида. Гьес кидаго абула Шахшаевич вук1инч1евани «Хвалченги» бук1унароанила, спорталда гьадинаб борхалъиялде живги вахинароанила, жиндир бергьенлъабазулъ ц1ик1к1унисеб зах1матги  гьесул бугила, кидагосеб баркалаялъе, рец-бакъалъе мустах1икъав чи  вугила Мух1амад Шахшаевичилан.

М. Къадилмух1амадовасул х1аракаталдалъун ккола Ах1мадов  Дагъистаналъул т1аса бищараб  командаялде ва гьелда гъорлъ х1алаго Россиялъул югалда к1иго нухалъ ккуна  лъабабилеб бак1. Лъабго нухалъ  вахъана Россиялъул педвузазда гьоркьов  чемпионлъун. Лъабго нухалъ гьесие щвана «Лучщий нападающий России  среди педвузов» абураб х1урматияб ц1ар. Дол соназ Мух1амад  вачунев вук1ана Грозныялъул «Автомобилист», Ростовалъул «СКА», Саратовалъул «Кристалл» г1адал ва цогидал  ц1ар бугел  командабазда гъорлъе. Амма Ах1мадовасе гьеб къабуллъич1о ва  1977 соналъ баг1араб дипломгун пединститутги лъуг1изабун г1агараб районалде т1ад вуссана.

 Гьелдаса нахъе байбихьана Мух1амадил муг1алимлъиялъул нухги жеги цебет1уна спортивияб  г1умруги. Цебе республика улкаялдаго раг1изабураб команда районалъул бук1иналъ, х1аракат бахъизе ккана гьелъул ц1ар борхатго ц1унизе. Х1ажат рук1ана ч1ах1иязул бак1 кквезе мустах1икъал волейболистал. Нахъа тараб  зах1маталъул нухда – Хунзахъ № 2 школалда, ДЮСШялда тренерасдаса гьелъул директорасде щвезег1ан ва 1993 соналдаса жакъа къоялъги  Г1арани рагъулабгун спортивияб лицеялда вугел соназги Мух1амадица кинабго гьабуна спорталъе, районалда волейбол цебет1еялъе г1оло.

25 г1ан соналъ вук1ана гьев районалъул т1аса бищараб командаялъул капитанлъун. Гьебго заманалда х1ана республикаялъул т1аса бищараб командаялдаги. Мух1амад ккола Дагъистаналъул спартакиадаялъул ва г1емерал турниразул чемпион. 1982-84 соназ х1ана ДСО «Урожаялъул» т1аса бищараб  командаялда. 2002-03 соназ х1алт1ана ДГПУялъул к1удияв преподовательлъунги цадахъго гьабуна Дагъистаналъул т1аса бищараб командаялъе  тренерлъиги.

Муг1алимлъи – тренерлъиялда  цадахъго Ах1мадов вихьизе бегьула республикаялъул роцада  т1орит1улел турниразда. Россиялъул Бах1арзал М. Толбоевасул, М. Манаровасул ва цогидал ч1ах1иял къецаздаса   камуларо  гьев. Торг1о х1аялъул ригь бекун бук1аниги, Мух1амад цеве вахъарал къецазда бищунго лъик1ав игроклъун рик1к1уна. Араб заманалде нахъвусун балагьизе ч1ух1араб лъалк1 тана  Ах1мадовас. Мух1амадил «площадкаялда» ругьун гьарун г1умруялъул нухде т1орит1арал г1олилал республикаялъул ВУЗазда ц1алулел, ц1алун  лъуг1арал  лъик1аб х1алт1уда, ц1ар бугел  командабазда х1алел,  Дагъистаналъул спортивияб къадру ц1унун, гьелъул т1асабищараб командаялда гъорлъ ругин абуниги мекъи ккеларо. Дагъистаналъул т1асабищараб  командаялъул к1удияв тренер Гъайирбегов Мух1амад х1алт1улев вуго  Дагъистаналъул пачалихъияб университеталда преподавательлъун, цадахъго гьабула университеталъул  волейболистазе тренерлъиги. Г1араниса Мух1амадсадикъов  Мух1амад ккола  медакадемиялъул преподаватель ва гьеб вузалъул командаялъул тренер. Цоги  г1аранисев – Адиев Х1ажимурад ккола техникиял г1елмабазул кандидат, х1алт1илев вуго ДРялъул х1укуматалда цебе бугеб гьит1инаб ва гьоркьохъеб предпринимательство цебет1еялъе квербакъиялъул фондалда. Т1агьадаса Х1асанов Мух1амад  х1алт1улев вуго  Мах1ачхъалаялда миграционнияб хъулухъалда. Г1ободаса Пайзудинил Шамилги, Мах1ачги х1алел руго Дагъистаналъул т1аса бищараб командаялда, к1иявго вахъана пляжалъул волейболалъул Россиялъул чемпионаллъун. Ц1адаса Г1алибегов Г1амир,  Г1ободаса Хважаев Мух1амад, Сайгидов Шамил Хунзахъа Левша Мух1амад жиде-жидер хъулухъ- ишалда руго. Г1орут1аса Гъазиев Ислам, Г1оч1лоса Х1усейнов Шамил, Гьолокьа Г1алиев Мух1амад ц1алулел руго Дагъистаналъул  пачалихъияб университеталда, лъабавго х1алев вуго республикаялъул т1аса бищараб командаялда.

Ах1мадов Мух1амадил спортивияб цебет1ейги к1одо гьабун, гьесул 45 сонилаб юбилеялъул  х1урматалда  Республикаялъул роцада волейболалъул турнир  т1обит1ана 1997 соналъ. Бат1и-бат1иял районаздаса командабиги  Пачалихъияб Думаялъул депутат Рамазан Г1абдулат1ипов, Россиялъул Бах1арчи Мух1амад Толбоев, доб мехалъ республикаялъул спорталъул министр Шагьг1абас Шагьов ва г1емерал  цогидалги х1урматиял гьалбадерил г1ахьаллъигун г1уц1адго ана гьеб тадбир Мух1амадил г1агараб К1ахъ росулъ. М. Ах1мадовасул 50 сонилаб  юбилеялде 2002 соналъ бук1араб турниралда райадминистрациялъ Хвалчение «Жигули» машина сайгъат гьабуна, 2007 соналъ бук1араб турнир т1обит1ана волейболалъул ветераназда гьоркьоб. Гьале кват1ич1ого (14-15 июль) т1обит1изе буго Мух1амад Ах1мадовасул 60 сонил юбилеялъул турнир, гьебги бук1ине буго волейболалъул ветераназда гьоркьоб Хъунзахъ спорткомплексалда. Турниралде ах1ун руго Мах1ачхъалаялъул, Гъизилюрталъул «Каскад» ва мадугьалихъ ругел районазул командаби.

Ах1мадовасул зах1мат к1одо гьабун буго х1урматиял ц1араздалъунги къиматал сайгъатаздалъунги. Гьев ккола т1адег1анаб категориялъул учительги, тренерги, СССРалъул ва РСФСРалъул лъайкьеялъул отличник, ДРялъул физическияб культураялъул ва спорталъул мустах1икъав  х1алт1ухъан, Мух1амадие щвана лъайкьеялъул бут1аялда Россиялъул президентасул грантги.

Хъизан Сулайсатгун Мух1амадица тарбия – лъай кьун г1езаюна к1иго яс . К1удияй – Анжелика  х1алт1улей йиго районалъул Федералияб судалда, Пат1имат ккола филолог, х1алт1улей йиго Х1ариколо гьоркьохъеб школалда. Ясазулги руго лъабго  лъимал. Жиндирго васал гьеч1ониги 18 июналъ Анжеликае вас гьавидал рохалие г1орхъи бук1инч1ила цоги волейболист – хвалчен тухумалда г1езавизе бугеб  анищалъилан бицана Мух1амадица. Щибаб къойил гьава-бакъалъухъ балагьич1ого х1алт1уде иналдеги  х1алт1удаса вуссун хадубги гьев векерула чанго километралъ, гьабула зарядка, заман батула спортплощадкаялда росдал лъималгун х1азеги, гьезие малъа-хъваял гьаризеги. Черх кидаго «формаялда» бук1ине кколилан абула  гьес.

Волейболалъе г1оло лъалиниса къват1ибе ц1араб Мух1амадил хвалчен жеги гвангъун паркъулеб буго.