Х1урматияб Хунзахъ районалъул газеталъул редакция, гьелъул х1алт1ухъаби ва бет1ерав редактор, рорч1ами!

Хъвалеб буго нужехъе рик1к1адаб Казбек районалъул Дилим росулъан Марижат Г1абдулг1азизовалъ. Аслияб дирго мурад рагьилалде бокьун буго нужер творческияб коллективалъе ракьалда т1ад бугеб щинаб лъик1лъи, чорхое щулияб сахлъи, халатаб, талих1аб г1умру ва т1олалго нужер рек1ел мурадал т1урагиян гьаризе.

Дагьаб цебе, ай май моц1алъ нижер гьалмагъзабазул къокъаялъ сапар бухьун бук1ана маг1арул ц1ар арав шаг1ир,  халкъияв поэт Мах1амад Г1абасовасухъе Лъаг1илухъ росулъе. Рак1алдаса унареб унго-унгояб асар ккана рак1азе ва Бичас хъван батани жеги нахъеги сапар бухьине ниятги буго. Дица бицинаро Г1абасиласул х1акъалъулъ, гьеб нужее ва маг1арулазе жакъасеб къоялъ Америка рагьи г1адаб жо буго. Дидаса лъик1 лъани гурони гьев нужеда ва маг1арулазда бат1ияб рахъалъ лъазе рес гьеч1о. Гьесул музеялъ гьабураб асар хасгьабун хъвани гурони т1убаларо.

Жакъа дие хъвазе бокьун буго гьесул х1икматай талих1лъун кколей г1умрудул гьудул,  гьайбатай Савдатил. Бит1ахъе рек1ел т1иналде йортулей, г1ажаибай х1еренай, г1адан кутакалда хирияй, амма г1емер чиясулъ рук1унарел т1ок1лъаби жиндир г1амалалъулъ ругей, чорхолъ рессарай, цеего лъалей гьеч1олъиялдаса чи рек1екълъулей, унго-унгояй маг1арулай ятана гьей. Дида рак1алде ккана, вугодай ракьалда бихьинчи г1умрудул гьудул гьедин дурусай щварав ва гьеб рахъалъ бит1 ккарав, Г1абасиласде вахаравилан. Бук1арабани х1укуматалъ ч1езабун «Унго-унгояй мустах1икъай г1умрудул гьудул» абураб ц1ар, гьеб ц1ар чара гьеч1ого Савдатие кьезе мустах1икъаб бук1ана.

Баргъичалда лъураб багьа хирияб гамач1алъул г1емер бок1нал, миц1рал ругонаг1ан гьезда рекъараб бук1уна гамач1алъул багьаялъул хиралъи. Жиндир чорхолъ ругел рик1к1ен г1емерал лъик1лъабаз ва т1ок1лъабаз, кколеб даражаялда жиндие къимат кьезе бажари г1оларей г1адан ятана нижеда гьей.

Кинав росасул лъадиха йигей гьев кинабго рахъалъ вич1ч1улей, лъил йигей ч1ужу росасе щибго гьукъич1ей, гьелъул г1аксалда гьесие рек1ей бокьанщинаб жиндир рак1алъ къабул гьабурай. Рижаги нилъер маг1арулазул щибаб хъизамалда Савдат г1адал ясал, релъаги гьелда щияй росасул лъади, т1абиг1ат - г1амалги Аллагьас гьелъул г1адаб кьун. Гьеб мехалъ бук1инаан ракьалдаго Алжан умумузе, вацазе, росабазе. Дун гьелда кутакалда х1айранлъана, дун гьелдаса ч1ух1ана ва бихьана ч1аго ракьалдаги х1урулг1инзаби рук1унеллъи, дида гьей киданиги к1оченаро унго-унгояй талих1ай маг1арулай.

Савдатилъ ратанщинал т1ок1лъаби хъвани халалъилин ц1акъго ян, халалъани нужееги ч1амуч1лъилин х1инкъун, гьунар гьеч1ониги гьаб кеч1 гьабуна дирго рек1ел пикру загьир гьабун.

Х1урматияб редакция, цебеккунго рак1-рак1алъул баркалаги загьир гьабун, баракатаб рикъзиги, ракълилаб г1умруги, г1адамал разияб пишаги, гьарараб къабулаб аминсаг1атги, нужее гьарулаго жеги гьари буго къокъ гьабич1о гьаб дир хъвараб рек1ел асар т1убан газеталда бахъеян.

Г1абасиласул гьудул гьайбатай Савдатие

р. Марижат Г1абдулг1азизовалъул.

Г1абасилав ц1унарай

Ц1ар т1ок1ай нижер солдат,

Дуй щвараб к1удияб ц1ар

Щванадай марщаласе?

Маг1арул иях1алъул

Т1ину лъалареб ралъад,

Дулъ бугеб гъварилъуде

Лъида к1велеб раккизе?

Рек1ел лъик1лъи гьарзаяй,

Гьайбатай маг1арулай,

Дур намус ц1азе к1олел

Ц1адираби ругодай?

Рукъги къват1ги дурусго

Бачине бажарулей,

Алжаналъул т1абиг1ат

Т1олго чорхолъ бессарай.

Бокьарав чи вач1индал

Гьесий хабар гьуинай,

Нахъе-нахъе йихьизе,

Хьул жегиги бергьуней.

Бицунеб хабаралда

Хасаб къаг1ида бугей,

Беричлъигун чалухлъи,

Ч1урканлъи чорхолъ бугей.

Бахиллъула дун, Савдат

Ссилияб дур ассалда,

Асираллъун лъугьуна

Мун лъани г1умруялъго.

Г1абасилас мугъ ч1валеб

Ч1имиг1лъулареб буцур,

Гьесул талих1 бикъараб,

Къо биччач1ей х1урулг1ин.

Х1асратав шаг1ирасул

Шиг1ру йиго мун Савдат,

Г1умруялъ хъвананиги

Жеги лъуг1ел батич1ей.

Г1абасиласул зодоб

Сунареб ц1ва йиго мун,

Сардал гвангъизарулеб

Къалъараб моц1 йиго мун.

Г1емерал рокьаниги

Рокьи духъ жеги т1еч1ей,

Жавгьар якъут бекьараб

Гьесул тажги йиго мун.

Талих1 гьесий чвахулеб

Къунареб ицц йиго мун,

Къисмат бит1ун ккеялъе

Сабаблъунги йиго мун.

Г1умруялъ дандч1ванщинал

Сог1лъаби къинарурай,

Къуват дур г1адаб босе –

Щолеб бак1 лъалебани.

Къваридабгин г1ат1идаб

Г1орлъун къулч1изе к1варай,

Дурр рек1ел дунялалъул

Г1ат1илъи бокьилаан.

Г1адамал хиралъиялъ

Мунго к1очоней, дарман,

Дуда лъалебани,

Дур ссиялъул борхалъи.

Иман рек1елъ щулияй

Г1абасиласул Бика,

Дунялгун Ахират кьун

Бичас к1одо гьаеги.

Рак1-рак1алъул адаб ва х1урматгун нужер районалъул Г1обода росулъа кьибил бугей МАРИЖАТ Г1АБДУЛГ1АЗИЗОВА.