Январалъул гlодоркъояз районцоял рохизаруна Украинаялда унеб бугеб хасаб рагъулаб операциялда гlахьаллъи гьабулел ругел нилъер ракьцоял гlолохъабаз бихьизабулеб бугеб бахlарчилъиялъухъ гьезие щварал шапакъатаз.
Гьедин, спецоперациялда гlахьаллъи гьабулев вугев Тlагьадаса Хlакимов Султанмурад Абакаровичасе щвана Жуковасул орден. Мочlохъа Шамил Гlабдурахlманов ва Тlагьадаса Хlажимурад Гунащев мустахlикълъана Суворовасул медалазе.
Гьелго къоязда хабар бачlана Мочlохъ росулъа Изатула Хlажимухlамадов Россиялъул Оборонаялъул министерствоялъул “За боевые отличия” абураб шапакъаталдалъун кlодо гьавун вугилан.
Спецоперация байбихьун гlемер заман иналдего, 2022 соналъул 15 марталда Херсон областалда ругел нилъер солдатал материалиябгун техникияб рахъалъ хьезариялда тlад хlалтlилел рукlарал Изатулал бригада ккола беспилотниказ тlаде ралел бомбабазда гъоркье. Амма гlолохъанал рагъухъаби гьединаб захlматаб ахlвал-хlалалде кканиги рихха-хочуларо, цогидал подразделениязда рукlарал лъукъарал гьалмагъзабазецин кумек гьабула ва армиялъе бачlун букlараб цlатари ва цогидалги боеприпасал цlунула.
Ракl-ракlалъ баркула нилъер киналго бахlарчиял рагъухъабазда щварал шапакъатал, кlванагlан хехго бергьенлъиги босун, чlаго-гlатlго ва сах-саламатго рукъалде руссаги киналго!
И, Мухlамадов.
| 
