Г1емерал г1адамал данделъараб бак1алда, дида г1емерал раг1улел руго цо-цо г1адамаз гьадинал раг1аби рехулел. Камулел гьеч1о нак1к1игъут1би ч1еч1ого пихъил гъут1би щай ч1оларелан абулелги.

Вах1, пайда гьеч1ел жалищха гьал гъут1би кколел, хасго нак1к1игъут1би? Гьел суалазда хурхун дир гара-ч1вари ккола цо-цо лъай бугел г1адамазулгун. Гьале нижер гара-ч1вари:

Ах1мад

Нилъер муг1рузул росабалъе унел нухазда нак1к1игъут1би ч1ун рихьи къанаг1атаб жо бук1ана. Гьанже ч1олел руго. Нилъ гьездаса рохизе ккола, щайин абуни, гьез кумек гьабула инсанасул чорхол х1ал лъик1лъизабизе, ай нак1к1игъут1буз къват1ире кьолел  фитонцидаз кумек гьабула бат1и-бат1иял унтабазде дандеч1ей гьабизе.

Нак1к1игъут1буз кумек гьабула х1ухьел боси лъик1лъизабизе. Х1албихье нак1к1игъут1бузул рохьоре ине, кинаб ц1илъи нилъер черхалъе бач1унебали лъазелъун, хасго туберкулез бугел г1адамазе гьеб ц1акъго лъик1аблъун ккола. Гьел гъут1буз къват1ире кьолел веществабаз хвезарула туберкулезалъул палочкаби, гьединлъидал туберкулезалъул санаториял рала нак1к1игъут1бузул рохь бугеб бак1алда.

Г1алимзабаз ч1езабун буго, общественныяб транспорталда, цогидабги г1емерал г1адамал данделъараб бак1алда г1адамаз ц1алеб гьаваялда данде ккуни, нак1к1ирохьоб бук1унеб гьава унти ккезабулел  бактериял гъорлъ гьеч1еб, г1емерго бац1ц1адаб х1ухьел ц1азе бигьаяб бук1унеблъи. Нак1к1ирохьоб тира-свериялъ г1адамазул нерваби г1одоре риччазарула, свак чучизабула, гьуърузул х1ухьел боси лъик1лъизабула, узухъда лъик1аб х1ухьбахъилъунги лъугьуна.

Г1умар

Дица ц1алана хвоялъулъ витамин С г1емерго ц1ик1к1араб бук1унин цогидаб пихъ-мич1алде данде ккун. Мисалалъе босани, витамин С гьелда гъорлъ 200 мг. Проценталъ буго. Гьеб ккола ч1ег1ераб смородинаялда, гъарц1иялда гъорлъ бугелда бащадаб къадар, амма лимоналда гъорлъалдаса ц1ик1к1ун. Гьеб гуребги, хвоялда гъорлъ рук1уна противовитамин А (каротин), витаминал Е, К, Р, В_1, В₂, В₆, РР, Н. Г1уц1иялъул рахъалъ босани, хвоялда гъорлъ аптекалда рук1унел мультивитаминазде данде ккун, г1емерго къиматаб буго, щайгурелъул гьелда гъорлъ ругел витаминал т1абиг1иял кколелъул.

Написат

Дидаги, дидаго х1албихьун лъала, грипп щвараб мехалда гьелъ кумек гьабулеблъи. Нак1к1игъот1ол рук1к1бузде т1аде гьалараб лъимги т1ун, гьумерги бахчун т1аде къулун ч1ани мег1ералъул ч1вахи бигьаго уна, бот1рол унтиялъе бигьалъи бач1уна. Гьеб гуребги, дида лъик1аблъун бихьизабулеб бихьана, грипп багъарараб заманалда, нак1к1игъот1ол эфиралъул нахулъги ччун катнил маскаби ран ругони, заралиял вирусазда г1адамазул чорхолъе к1оларин ккезе.

Хадижат

Г1ег1учал инсульт сах гьабиялъе

Нак1к1игъот1ол г1ег1учазда гъорлъ рук1унел «танинал» абулел веществабаз кумек гьабула инсульт ккарав чиясул г1адалзул нахул клеткаби хвезе риччач1ого ч1езариялъе.

Х1алимат

Дун унтараб мехалда дие врачаз хъван рук1ана хвоялъул ваннаби. Гьез кумек гьабула неврозал сах гьаризе, заг1иплъараб черхалъул ч1аголъи бач1инабизе, макьу щвезабизе, веге-сосудистияб дистония инабизе.

Мух1удада

Нак1к1игъут1буз кумек гьабула черхалъул хварал тканал ч1аголъизаризе, сахал клеткабазул г1умру халат гьабизе, аллергия бугезул чорхол х1ал лъик1лъизабизе, стерессалдаса рорч1изе, чорхолъе ккарал канцерогенал дагьлъизаризе.

Рук1ана жеги ц1ик1к1ун гьезул х1акъалъулъ бицунел г1адамалги. Г1ей гьабулеб буго гьазда гъорлъа т1аса рищарал цо-цоязда. Бихьулеб буго нилъее нак1к1игъут1бузул г1емераб пайда гуреб, рак1 т1аде ц1алеб берцинлъиги бук1ин. Балагье, Хунзахъ К1удияб Ват1анияб рагъул г1ахьалчаг1азе бараб памятникалда аск1ор ч1арал нак1к1игъут1бузул берцинлъиялъухъ. Лъик1аблъун бихьула г1адамазул гьабулеб х1алт1удаса рак1 буссинабулел рук1инч1ого, гьабулелъе кумек-квербакъи гьабулел рук1ани.

Н. Г1алиева.