18 июналда райцентралда Ш. Шамхаловасул ц1аралда бугеб культураялъул к1алг1аялда к1одо гьаруна районалъул  исанасел  медалистал. Исана короновирусалъул пандемиялда хурхун ц1алул соналъул к1иабилеб бащалъиялда г1езег1ан зах1малъаби дандч1ваниги районалда меседил медалалъе мустах1икълъана 16 выпускник.

Т1адбиралда г1ахьаллъи гьабуна районалъул т1алъиялъ, цо-цо школазул директорзабазгун учительзабаз, ц1алдохъабаз ва цогидалги лъай кьеялъул бут1аялъул х1алт1ухъабаз.

Медалистазда баркун к1алъай гьабуна районалъул нухмалъулев Нурмух1амад Задиевас.

«Жакъа буго нужер бищун к1удияб байрамкъо. Нужеца нахъа тана г1умруялъул т1оцебесеб к1вар бугеб бут1а. Школалда 11 соналъ ц1алун щвараб лъай ва х1албихьи нухде бараб т1ехг1адин батизе буго нужеда г1умруялъул нухда. Ц1акъ вохарав вуго нужеца меседил медалазда школа лъуг1изабиялдаса. Узухъда, расги бигьаго бук1ун батиларо нужее цогидал лъимал къват1ал сверулел ва цогидалги пайда гьеч1ел ишазде руссун ругеб мехалда, 11 соналъ ц1ализеги ц1алун нужерго зах1маталдалъун меседил медалал росизе. Амма гьелдаго цадахъ нужеда т1аде ккола жеги ц1ик1к1араб жавабчилъиги. Щайгурелъул, цо жо буго медалал щвей, цоги жо буго хадубккунги щварал медалазда рекъон ц1алдей, щвараб лъай г1ат1ид гьаби ва гьелдаса пайда босизе лъай. Дир хьул буго гьединго лъик1аб даражаялда т1адег1анаб лъайги щун, нуж районалде т1ад руссинин ва г1агараб ракьалъеги гьелъул халкъалъеги пайдаялъе нуж х1алт1илилан. Ниж кидаго х1адурал руго лъик1ал специалистал х1алт1уде къабул гьаризе. Амма щаялиго жал х1алт1уде росеян цох1о бухгалтералги юристалги гурого рач1унаро. Гьел специалистазе х1алт1и къанаг1ат гурони бук1унаро. Нилъее х1ажат руго лъик1ал тохтурзаби, учительзаби, ралел бак1азул специалистал ва цогидалги. Хасго х1ажат руго сахлъи ц1униялъул бут1аялда х1алт1ухъаби. Исана короновирусалъ цогинух бихьизабуна инсанияталъе тохтурзабазул бугеб к1вар. Гьеб ах1вал-х1алалда нилъее  кумекалъе рач1арал, нужедаса г1емер к1удиял гьеч1ел г1олохъанал медиказ бихьизабуна жидерго махщел, гьунар ва къох1ехьей. Гьединго к1удияб баркала кьезе бокьун буго учительзабазе ва нужеда цадахъ киналго зах1малъабиги раччун школа лъуг1арал эбел-инсуеги. Нужер меседил медалазда гьоркьоб гьезулги буго ц1айи бугеб бут1а»,- ян абуна гьес.

«Медалистазда, эбел-инсуда ва учительзабазда рак1-рак1алъ баркула жакъасеб байрам. Хасаб баркала буго лъималазда цадахъ 11 соналъ ц1аланин абуниги бегьулел эбел-инсуе. Жидерго лъай-г1акълуги г1умрудул х1албихьиги лъималазе кьурал учительзабазе. Исанасеб ц1алул сон ц1акъго зах1матаб бук1анин абизе бегьула. Щайгурелъул, ахирисеб чанго моц1алъ ц1али гьабизе ккана г1адатаб гуреб къаг1идаялда. Гьелдалъун дандч1вана чанго зах1малъабиги. Амма эбел-инсулги учительзабазулги ва жалго ц1алдохъабазулги цадахъаб х1аракаталдалъун гьел киналго къезарун бажарана»,- ян абуна районалъул лъай кьеялъул отделалъул начальник Г1абдулпатах1 Х1амзатовас.

Медалистазда баркун к1алъай гьабуна Г1арани гьоркьохъеб школалъул директор Патах1ова Салих1атица ва лъай кьеялъул отделалъул х1алт1ухъан Мух1амадова Умагьаница. Выпускниказул рахъалдасан эбел-инсуе ва учительзабазе баркала кьуна Хунзахъ гьоркьохъеб т1оцебесеб школалъул ц1алдохъан Фамираца.

Медалистазда цадахъго шапакъатал кьуна республикаялъул олимпиадабазда ва «Лъаг1алил ц1алдохъан» конкурсазда цересел бак1ал ккурал ц1алдохъабазеги. Хасго лъик1аб х1асил бихьизабуна Хунзахъ гьоркьохъеб т1оцебесеб школалъул выпускница Т1агьирова Аминатица. Меседил медаль щвей гуребги гьей яхъана республикаялъул к1иго олимпиадаялъул призерлъунги.

И. Мух1амадов