11 февралалда Хунзахъ № 1 гьоркьохъеб школалда т1обит1ана районалъул лъай кьеялъул отделалъул жигарчилъиялдалъун районалъул школазул 11 классазул ц1алдохъабазда гьоркьоб авар мац1алда куч1дул рик1к1иналъул конкурс. Гьелъул мурадлъун бук1ана ц1алдохъабазул авар мац1алде рокьи бижизаби, гьелъул берцинлъи, гъварилъи ва бечелъи гьезда бич1ч1изаби, гьединго ц1алдохъабазда гьоркьор куч1дул рик1к1унел, махщел камилал загьир гьариги.

Конкурсалда г1ахьаллъи гьабуна Хунзахъ, Харахьи, Гьоц1алъ, Т1агьада, Г1ахьалч1и, Бакьагьеч1и, Гьамущи, Г1обода, Моч1охъ гьоркьохъел школазул ц1алдохъабаз.

Абизе ккола киналго конкурсалда г1ахьаллъарал ц1алдохъабазул церерахъин бук1анин цоялдаса цояб лъик1аб. Маг1наялъул рахъалъ гуребги, рак1-рак1алъ, бит1ахъе, кодо-кодобе кьун рик1к1унел рук1иналъ, куч1дул рук1ана рек1ее к1удияб асар гьабулел.

Жюриялъ х1асил гьабун хадуб т1оцебесеб бак1алде рач1ана Гьоц1алъ гьоркьохъеб школалъул ц1алдохъан Х1амзатов Мух1амад ва Хунзахъ № 1 гьоркьохъеб школалъул ц1алдохъан Цахаева Г1аишат.

К1иабилеб бак1 босана Харахьи гьоркьохъеб школалъул ц1алдохъан Мух1амадова Альбинаца, Т1агьада гьоркьохъеб школалъул ц1алдохъан Мух1амадов Ах1мадханица ва Моч1охъ гьоркьохъеб школалъул ц1алдохъан Сайпулаева Каринаца.

Лъабабилеб бак1алде рач1ана Г1ахьалч1и росдал гьоркьохъеб школалъул ц1алдохъан Мух1амадова Саният, Гьамущи гьоркьохъеб школалдаса Дибирова Мильфизат ва Г1обода гьоркьохъеб школалъул ц1алдохъан Г1абидова Хадижат.

Т1оцебесеб бак1 ккурал ц1алдохъаби кват1ич1ого ине руго республикаялъулаб конкурсалда г1ахьаллъизе, гьезулги жидерго куч1дул ц1ализе бугеб махщелалъги, артистазулаб г1адаб гьунаралъги рак1ал асир гьаризе.

Баркала буго киналго конкурсалда г1ахьаллъаразе, ц1алдохъаби гьениб г1ахьаллъизе х1адур гьаруразе.

Гьединал конкурсал т1орит1иялъ рес кьезе буго нилъер Ц1адаса Х1амзатил, Расул Х1амзатовасул, Фазу Г1алиевалъул, Г1абасил Мах1амадил, Тажудин (Ч1анк1ал) мац1 ц1алдохъабазда жеги лъик1 бич1ч1изе, лъазе ва ахираб заманалда авар мац1алдехун лъугьун бач1унеб бугеб мекъаб балагьи дагь-дагь ккун г1одобцун ине.

Мурад буго нилъер ц1алдохъаби республикаялъулаб конкурсалдаги бергьенлъигун т1ад руссин.