Дагъистаналъул халкъияв поэт Г1абасил Мах1амадица исана
т1убана 80 сон. Кидагоги гьалбал г1емерал Г1абасиласулги, Савдатилги, юбилейги
х1алае ккун, гьел дагьалги ц1ик1к1ана-щибаб къоялъ г1адин районалъул г1емерисел
школазул учительзабиги ц1алдохъабиги щолел руго гьезул г1адатияб хъизаналъухъе
гьоболлъухъ.
Г1арани рагъулабгун спортивияб лицеялдаса ункъго учительги:
директор М. А. Х1амзатов, вожатая П. Мутаг1илова, мац1азул учительница А.
Нурмух1амадова ва тарихалъул учительница С. Махулова; 15 ц1алдохъанги дагьал
церег1ан къояз щвана Лъаг1илухъ росулъе халкъияв шаг1ирасухъеги гьесул
лъадухъеги.
Гьурмада гьимигун х1еренал раг1абиги абулаго дандч1вай
гьабуна Савдатица гьалбадерида. Киназдаго «бабалиланги» абулаго стол ц1ун
кьер-кьерал ниг1матал кваназаруна цин гьелъ. Лицеялъул ц1алдохъаби ц1акъ
х1адурун ругоан шаг1ирасулгун дандч1ваялде-лъазарун ругоан гьесул г1умруялъул
х1акъалъулъ, гьесул ва гьесде цойгидаз гьарурал куч1дулги. Лицеялъулаз
шаг1ирасулгун гьабураб рак1 рагьараб гара-ч1вариялда Г1абасилас гьезие бицана
гьабсаг1ат живго т1ад х1алт1улел ругел т1ахьазул, жиндиего рокьулел куч1дузул
х1акъалъулъ, лъималазги учительзабазги гьесие кьуна ц1акъ г1емерал суалалги.
Гара-ч1вариялдаса хадуб Савдат-эбелалъ гьалбал рачана Г1абасилас г1уц1араб
музеялде-авар адабияталъул ва маданияталъул рокъоре. Гьеб буго унго-унголъунги
бокьарав маг1арул чи ч1ух1изеги, бокьарав гьобол х1икмалъизеги т1амулеб музей:
гьенире рак1арун руго нек1сиялги гьанжеселги нилъер мухъалъе хасиятал
т1аг1алаби, ц1араг1, хас гьабун цо рокъоре руссинарун руго бат1и-бат1иял
шаг1ирзабазул, бат1и-бат1иял мац1азда, маданияталда адабияталда хурхарал
гурелги цойгидал темабазда хъварал т1ахьалгицин, къед ц1ун ран руго поэтазул,
хъвадарухъабазул суратал. Школлъималаз рахъана музеялъул сураталги, видеоги.
Лицеялъулаз халкъияв шаг1ирасе сайгъат гьабуна т1абиг1аталъул сурат,
Г1абасиласги школалъе сайгъат гьаруна жиндирго т1ахьал-гьел ц1акъ рокьана
киназего. Музеялда бихьаралдасаги ц1акъ учительзабиги ц1алдохъабиги
г1ажаиблъизаруна халкъияв шаг1ирасулги Савдат-эбелалъулги г1данлъиялъги,
г1адатлъиялъги, хасго Савдатил свак гьеч1олъиялъги, гьит1иназдаги к1удияздаги
рекъезабизе бажариялъги. Гьедин ч1ужуг1адан къанаг1ат гурого йижуларо
дунялалда. Г1абасил Мах1амадилгунги Савдат-эбелалъулгунги къо-мех лъик1ги
гьабун, гьезие сахлъиги гьарун, рак1алде щвеялъе сураталги рахъун нахъе руссана
гьениса лицеялъулал. Лицеялъулаз к1удияб баркала кьолеб буго г1адан хириял
гьезие. Гьениса учительзабиги лъималги анна Лъаг1илухъ гьоркьохъеб школалде,
гьабуна гьенир ратарал учительзабазулгун гара-ч1вари, хадуб лицеялъулал ана
Харахьи гьоркьохъеб школалде, щвана гьезул музеялдеги, ралагьана гьениб
т1обит1улеб батараб участкаялъул школлъималазда гьоркьоб г1уц1араб
волейболалъул къецазухъги.
Гьедин сапаралдаса рак1 разиго, чанго бак1алдеги щун т1ад
руссана лицеялъул ц1алдохъабиги учительзабиги.
П. Гунашева.
|
