Салам нужеде, хирияб «Росдал Зах1матчи» газеталъул редакция!
Гьале т1аде г1унт1улеб буго ихги, ихдалил байрамги. Гьебги х1исабалде босун,
дие бокьун буго т1олалго руччабазда баркизе иргадулаб марталъул къо. Хасго
баркизе бокьун буго дир г1агараб школалъул руччабазул коллективалда дир
эбелалда, ва якьад-эбелалда.
Цодагьал раг1аби абизе ихтияр гьарула дир эбелалъул
рахъалдасан. Жиндирго халатаб ва зах1матаб г1умруялъ рак1 къвак1изаюрай, г1адан
хирияй, г1амал берцинай инсан йиго гьей. Санал ункъойилъа аниги къвак1ун ч1езе
х1аракат бахъулей, г1адамасул къварилъи-г1ат1илъи ц1ехолей, лъималазулги,
лъималазул лъималазулги ургъалида йик1уней, г1аданлъи к1удияй гьелъие гьаризе
бокьун буго кинабго лъик1абщинаб. Гьале дунго эбеллъунги, к1одоэбеллъунги яхъун
хадуб ц1акъго бич1ч1улеб буго г1азизай эбелалъул г1умру. Г1емераб къварилъи баччарай
г1адан йиго гьей, амма Бет1ергьанас гьелъие кутакаб сабурги диналъе къуватги
кьун буго. Дагьалниги къояз Аллагьас мун нижеда аск1ой гьедин таги, эбел. 48
соналъ эбелалъ кьуна тарбия г1олеб г1елалъе. Гьелъул гьеч1о кутакал шапакъатал,
гьеч1о гьелъул къиматал ц1арал. Бищун к1удияб шапакъат гьелъие буго гьелъул
ц1алдохъабаз гьаб жакъаги гьелъие кьолеб къимат. Дир эбел ккола Г1обода росулъа
Х1ажимух1амадова Загьраъ. Дунги гьелъул ирс босарай Г1обода школалъул
учительница Х1айбулаева Умагьани.
Эбел гьеч1ев инсанги вук1унаревлъидал бокьилаан эбелалъе
сайгъат гьабураб гьаб кеч1ги, 8-леб март баркун, газеталда бахъизе.
Эбел
Эбелалъул къоял, къваридал сардал-
Къойилаб х1инкъигун ва пашманлъигун
Хьихьун г1езарурал г1агарал лъимал
Лъач1ого цо къоялъ къват1ире инин.
Цинги кинабг1аги галул тириялъ
Туризе гьабула эбелалъул рак1,
Бет1ер унтаниги, сири баниги
Судула дур ругънал лъимал сабаблъун.
Хирияй, киналго дур лъимаздасан
Гьаб рохалил къоялъ дуда баркизе
Дица мустах1икъал гьоркьоса рищун
Дуе коч1ол мухъал сок1к1унел руго.
Лъимал гьеч1ей г1адан эбел кколаро,
Эбел, дида лъала дуе бокьулеб-
Рух1 кьун г1езарурал г1исинал лъимал
Г1умрудул нух бит1ун церехун ине.
Дур лъимазул сахлъи-дур сахлъи буго,
Дур лъимазул рохел-дур рохел буго,
Г1адамазда гьоркьоб дур лъимазул бак1
Дур тахил бак1 буго, хирияй эбел.
Улбул, дица нужей даим гьарула
Эбел, бищун цебе дуеги гьабун,
Гьарурал лъималги ч1агого рихьун
Ч1алг1ен буссинег1ан гьелгун тагиян.
Талих1ал умумул аск1ор ругони,
Талих1ал рук1уна гьезул лъималги,
Лъималазул г1умру роц1ине г1оло
Г1умру кьола улбуз заман к1очон тун.
Ракъи, къечей, квачай кинаб жояли
Гьит1инал т1анч1азда бич1ч1изе теч1ей,
Унтараб лъимадул бусадул раг1ал
Къан ккун сардал рарай х1алимай эбел.
Дица дуе сахлъи гьарулеб буго,
Дица дуе рохел гьарулеб буго,
Халатаб г1умруги цебе тун бугин
Лъималаз юкъаги эбел ургъел тун.
Саламгун дур яс Умагьани.
| 
