23 июлалда Хунзахъ тlобитlана росдал авалазул командабазда гьоркьосеб иргадулаб футболалъулаб турнир. Гьеб бухьинабун букlана мунагьал чураяв, росуцояв Тlалхlатов Хlасанил цlаралда ва аслияб къагlидаялъ гlуцlун букlана гьесул вацасул ва инсул хlаракаталдалъун.

Гlаммаб къагlидаялъ, исанасеб турниралда гlахьаллъи гьабуна 8 командаялъ. Гьел рикьун рукlана кlиго къакъаялде. Щибалъусан къватlире рорчlизе рес букlана кlи-кlи командаялъул. Гьедин, хlалуцарал хlаязул хlасилалда полуфиналалде рачlана “Лъарахъ 1” - “Жаниб мегъ” ва “Гургур” - “Щулалъутlа” командаби. 2-1 ва 2-0 хlисабгун дандиязда тlад бергьенлъиги босун, финалалде рачlана “Лъарахъ” ва “Гургур” авалазул командаби. Финалияб хlай лъугьана цlакъго хlалуцараблъун ва 1-0 хlисабгун бергьенлъиги босун, “Лъарахъ 1” команда бахъана турниралъул щуцlул чемпионлъун. Лъабабилеб бакl ккуна “Щулалъутlа” авалалъул футболистаз.

Турнир къалаго кlалъаял гьаруна тадбир гlуцlаразул цояв Шамил Малачиевас, росдал цевесев ва гьанжесел бегавулзаби Хизри ва Мухlамад Тlалхlатовас ва цогидазги. 
“Киназего кlудияб баркала буго жакъа дир вацги кlодо гьавун, гьесул цlаралда тlобитlулеб турниралде рачlанщиназе. Гьадинал тадбираз цолъизарула нилъер гlолилал, щула гьабула росдал гlолохъабазул гьудуллъи-вацлъи ва лъикlаб мисал бихьизабула гlисинаб гlелалда. Нилъеца хlаракат бахъила гьоркьоб къотlизе течlого, жеги тlадегlанаб даражаялда санайил гьаб турнир тlобитlизе”, - ян абуна росдал бегавул Мухlамад Тlалхlатовас.

Бергьараб ва призалъулал бакlал ккурал командабазе кьуна хьвадулеб Кубок, грамота, медалал ва гlарцулал сайгъатал (1 бакlалъе - 25000 гъурущ, 2 бакl - 20000 гъ., 3 бакl - 15000 гъ). Хасал сайгъатаздалъун кlодо гьаруна батlи-батlиял номинациязда бищун лъикlаллъун рикlкlарал футболисталги. Бищун лъикlав игрок Гьитlинов Рамазан (Лъарахъ); бищун лъикlав нападающий - Хlажиев Махсутl (Ччотода), Бищун лъикlав вратарь Мухlамадов Карим (Жаниб мегъ); бищун лъикlав защитник - Хlасанов Мухlу (Лъарахъ). Гlарцулаб сайгъат кьуна турниралда гlахьаллъи гьабуразул бищунго цlикlкlараб ригьалъул игрок Гlалиев Гlалие (Щулалъутlа) ва турниралъул аслияв судья Хlажиев Юнусие. Гьединго гlуцlарухъабазул хlаракаталдалъун хlаязухъ балагьизе рачlаразе хlадурун букlана тlагlамаб пуловги.    
И. Мухlамадов.