1 марталда райадминистрациялда тlобитlана лъай кьеялъул бутlаялда хурхун данделъи. Гьелда гlахьаллъи гьабуна райадминистрация-лъул лъай кьеялъул отделалъул начальник Патlимат Хlамзатовалъ ва лъай кьеялъул гlуцlабазул нухмалъулез.

Гlемерал суалал рорхун рукlана данделъиялда. Гьездасан аслияблъун букlана исана ЕГЭ ва ОГЭ кьеялде хlадурлъиялъул суал. ЕГЭ ва ОГЭ кьезе бугеб къагlидаялъул ва ругел цlиял тlалабазда хурхун гlатlидго бицана Тlануси гьоркьохъеб школалъул директор Мурад Гlабдулкъадировас. Исана экзаменал кьей жеги кьваризабизе бугилан бицана гьес. Мисалалъе, гьанжелъагlан букlинчlеб, исана цlияб ургъараб жо кколеб буго ОГЭ видеокамерабазда гъоркь кьезе кколеб букlин. Амма гlемерисел цlалдохъаби ва гьезул эбел-эмен, хlатта, цо-цо учительзабигицин божулел гьечlила исана ОГЭ гьедин кьваризабизе букlиналда. Гьезул хьул бугила 9 классалда экзаменал кьей цебегогlадин бичча-бихъан тезе бугилан. Гlаммаб къагlидаялъ исана районалда ЕГЭ кьезе буго 11 класс лъугlулел 132 выпускниказ, жеги гъоркьисала экзамен кьезе кlвечlел 5 цlалдохъабазги. ОГЭ кьезе буго 9 класс лъугlулел 238 выпускниказ, жеги тlаде 5 гъоркьисала экзамен кьун бажаричlезги. Цохlо Хунзахъ гьоркьохъеб тlоцебесеб школалда гурони, районалда ЕГЭ ва ОГЭ тlоритlизе тlокlаб санагlалъи бугеб школа гьечlелъул, данделъиялда хасаб кlвар кьун букlана гьеб школа экзаменазде хlадурлъиялъул бициналде. Рехсараб школалъул директор Раисат Хlаштlиховалъ бицана экзаменазде школа хlадурулеб букlиналъул. Гьединго хlукму ккана 9 классазда ОГЭязул апробация тlобитlизеги. «Кватlичlого дица байбихьизе буго ЕГЭ ва ОГЭялде хlадуриялда хурхун щибав директоргун хасаб хlалтlи гьабизе. Цониги директорасда ракlалде ккоге жидер школалда 10 цlалдохъанасдагицин ЕГЭ кьезе кlоларин абизе. Гьелъул бакlалда нужеца дида бице экзаменал кьезе кlоледухъ цlалдохъаби хlадуризе нужеца щиб хlалтlи гьабулеб бугебали. Ичlабилеб классалда ОГЭ кьезе кlоларев цlалдохъан, хlалалъ вехъерхъун 11 классалдеги вачун, гьениб ЕГЭги кьезабиялъул магlна щиб?», - ян абуна Патlимат Хlамзатовалъ. Тlобитlизе буго бищун лъикlай тарбиячlужу абураб конкурсги. Гьелда гlахьаллъи гьабизе щибаб садикалъ жидерго тарбиячlужу йихьизайизе кколиланги лъазабуна Патlимат Хlамзатовалъ. Кватlичlого ракlалда рагlула тlолабго районалъул цlалдохъабазул эбел-эменги данде гьарун кlудияб собрание тlобитlизеги. Гьединго данделъиялда хасаб кlвар кьун букlана лъай кьеялъул бутlаялда гьаб заманалъул технологиял хlалтlизариялде. «Жакъа республикаялъул лъай кьеялъулгун гlемлуялъул министрас цере лъун руго цlиял масъалаби, руго цере рукlинчlел тlалабал. Жакъа бачlун буго цифрофизациялъул заман. Гьединлъидал кинабго гьабулеб хlалтlи ва цогидалги хlажатал баянал рихьизаризе ккола Интернеталдасан. Щибаб школалъул ва садикалъул букlине ккола хlалтlулеб сайт ва социалиял гьиназда аккаунтал. Гьединго лъай кьеялда цадахъго, рехун тезе бегьуларо лъималазе тарбия кьеялъул хlалтlиги. Жакъасел тlалабазда рекъон щибав мугlалим вукlине ккола цадахъго психологлъунги. Гьединлъидал киналго педагогал щибаб къоялъ хlалтlизе ккола жидерго махщел ка-мил гьабиялда тlад. Цойги хlажат буго спортивиял школазул расписание хисизабизеги. Свакан холаго, къаси сагlат 8-9 тренировкабаздаса рокъобе щвараб лъимер, дарсал гьарулаго, кодоб тlехьги ккун кьижун кколеб буго. Гьедин гьарурал дарсаз кинаб пайда кьезе бугеб лъимералъе? Спортивиял школазул нухмалъулелгун дандги бан, гьеб суалалда сверухъги хlалтlи гьабизе буго», - ян тlадеги жубана Патlимат Хlадисовнаялъ. Информациялъулгун методикияб централъул директор Умагьани Мухlамадовалъ бицана районалда 15 марталда тlолгороссиялъул халгьабиялъул хlалтlаби (ВПР) байбихьизе ругилан. Исана гьезда аслияб къагlидаялъ кlвар кьезе рагlула 5-8 классазде. Гьединго данделъиялда рорхана школазда «Футбол в школе», «Театр в школе», «Создание школьных спортивных клубов» абурал проек-тал гlумруялде рахъинариялъул, лъимал кваназариялъул, «Учитель будущего» абураб проекталда рекъон мугlалимзабазул махщел камил гьабизе гьел цlализе ритlиялъул ва цогидалги лъай кьеялъул бутlаялда цере чlарал суалал. Ахиралда цо-цо лъай кьеялъул учреждениязул нухмалъулъез кьуна жидерго суалалги.

И. Мухlамадов.