24 марталда райадминистрациялда тlобитlана оперативияб штабалъул данделъи. Гьелда гlахьаллъи гьабуна районалъул нухмалъиялъ, администрациялъул хlалтlухъабаз, ихтиярал цlунулел, къуваталъулал, социалияб рахъалъ цlуниялъул, сахлъи цlуниялъул ва цогидалги идарабазул вакилзабаз.

Данделъиялда гьоркьор лъун рукlана районалъул жакъасеб гlумруялда хурхарал гlемерал суалал. Амма аслияб бакl ккун букlана моцlгlан заманаялъ Украинаялда унеб бугеб хасаб операциялъул бициналъ. Гьелдасан байбихьана оперштабалъул иргадулаб данделъиги. “Районалда тlобитlулеб щибаб данделъиялда бицине ккола жакъа нилъер улкаялъул хlинкъи гьечlолъи цlунун Украинаялда тlобитlулеб бугеб хасаб операциялъул. Гlадамазда бичlчlизабизе ккола гьелъул хlакъикъияб магlна. Бажарараб кумек гьабизе ккола гьенир ругел нилъер гlолохъабазе ва рокъор хутlарал гьезул эбел-инсуе, хъизанлъималазе ва цогидабги гlагарлъиялъе. Гьаниб рехсечlого рес гьечlо къойил хиралъулел ругел багьабазулги. Цlатари учузлъун буго, амма таксиялъул, тукабазда ва цогидалги халкъалъе хlажатал жалазул багьаби рахунел руго. Гьелъул магlна щиб? Предпринимателаз абулеб рагlула жидецаги къайи-къоно хираго босизе кколеб бугилан. Хираго босараб къайи бичеха цlиял багьабазда рекъон, учузго босун букlараб продукция хираго щай бичизе кколеб? Районалда ругел даранбазаралъул точкабазда кьучl гьечlого багьаби рахинарулел бугищали халгьабизелъун гlуцlун букlараб комиссия щай хlалтlулеб гьечlеб? Гlажаибал предпринимателал руго нилъер. Кlалбиччанкъоялде, Цlияб соналде ва цогидал байрамазда цебеги багьаби рахинарула гьез. Узухъда, киналго предпринимателазул мурад букlуна жидеего щолеб хайир цlикlкlин. Амма цадахъго гlаданлъиялъул рахъги кlочон тезе биччазе бегьуларо”, - ян абуна районалъул бетlер Нурмухlамад Задиевас. Багьаби хиралъиялда хурхун бицунаго, районалъул прокурор Рамазан Гlумаровас абуна гьабсагlаталда улкаялъул экономикаялда лъугьун бугеб хlалуцараб ахlвал-хlалги хlисабалде босун, бизнесалде гьарулел халгьабиял кIванагlан дагьлъизаризе тlадкъай кьун бугилан. Амма 60 къоялъул болжалалда жаниб 40% къайидул багьа бахинабуни, законалда рекъон халгьаби тlобитlизе кьучl букlунилан тlадеги жубана гьес. Палхlасил, хlукму ккана хадусеб анкьалда предпринимателазулгун цоги данделъи тlобитlизе.Районалъул полициялъул начальник Мухlамадхlажи Сайбулаевас бицана бугеб ахlвалхlалалда рекъон жидер хlалтlулъги тlалабал цlикlкlинарун ругилан. Мисалалъе, гьезул хlалтlухъабаз районалъул школазда тlоритlулел руго Украинаялда бугеб хасаб операциялда хурхун цlалдохъабазда гьоркьоб бичlчlикьеялъулаб хlалтlи. Районалъул бетlерасул заместитель Шамил Гlисаевас бицана гьал къоязда районалдасан Ураинаялда хасаб операциялда гlахьаллъи гьабулел ругел нилъер гlолохъабазе битlизе гуманитарияб кумекалъул тlоцебесеб машина хlадурулеб бугилан. Жакъа къоялде босун буго 800 хъап ханжудал ва кванил нигlматазул 500 набор. Гьелда цадахъ Махlачхъалаялде щвезегlан гlуцlизе буго нилъер солдатазул рахъ ккураб автопробег. Данделъиялда бицен ккун букlана сахлъи цlуниялда хурхун бугеб ахlвал-хlалалъулги. Районалъул централияб больницаялъул бетlерав врачасул заместитель Мухlамад Мусаевас бицана гьабсагlаталда коронавирусалъ унтун больницаялда регун ругин 6 чи, 13 унтарав вуго рокъорго дару-сабаб гьабулелги. Ахирисеб анкьалъ тlаде цониги цlияв унтарав загьирлъун гьечlо. Гьединго гьабсагlаталда дару-сабаялъул рахъалъги щибго къварилъи рагlуларо больницаялда. Росдал магlишаталъул отделалъул начальникасул заместитель Хlусен Гlумаровас бицана гьабсагlаталда районалъул магlишатазда гlи къинлъул кампания унеб бугилан. Гьединго байбихьун буго ихдал рекьи гьабизе хlадурлъи. Киналго магlишатазда руго гьелъие гlурал хьонал, гьечlел бакlазда росизеги руго. Амма цохlо гъутабазда ругел ракьал рекьун течlого, исана магlарухъ ругел ракьалги рекьизе кколин абуна гьес. Гьеб суал бегавулзабиги гlахьал гьарун рагlалде бахъинабизе кколин тlадеги жубана. Районалъул щибаб магlишаталъ кьолеб буго 100-150 кг гьанал. Гьелъул Гьоцlалъ консервазулаб заводалда банкабиги хlадурун, хадубккун гьел ритlизе руго Украинаялда ругел нилъер гlолохъабазе. Гьан кьолеб буго росабазул жамагlатаз бакlарунги. Жеги гlемер рагlула кьезе бокьаралги. Районалъул социалиял хъулухъазул вакилзабаз бицана жакъа пачалихъалъ гражданазе кьезе рихьизарун ругел социалиял выплатабазул, льготабазул ва цогидабги кумекалъул хlакъалъулъ. Районалъул рагъулав комиссар Шамил Мухlамадовас баян кьуна жакъа Украинаялъул ракьалда унеб бугеб хасаб операциялъул ва гьелда гlахьаллъи гьабулел ругел нилъер районалъул гlолохъабазул хlакъалъулъ. “Жакъа лъиего балъголъи гуро нилъер районалъул гlолохъабиги Украинаялда унеб бугеб хасаб операциялъулъ гlахьаллъулел рукlин. Кигlан нилъее бокьичlониги руго тlоцересел къурбаналги. Гьезул хъизамазе гьабизе буго пачалихъалъ бихьизабураб кумекги кьезе руго шапакъаталги. Районалъул военкоматалде гlемерал чагlи рачlунел руго хасаб операциялда ругел жидерго гlагарал гlолохъабазул хабарги цlехон. Амма чlаго вугев чи гьадинаб бакlалда вугин абураб мухlканаб информация нижехъа кьун бажаруларо. Чи чlван яги захlматго лъукъун вугони, гьеб мехалъ нижеца гlагарлъиялъухъе нижехъ ругел баянал кьола. Узухъда, нижер бухьен букlуна цогидал военкоматазулгун. Амма кинабго информация рагьун бицун бажаруларо. Сипатсурат лъаларедухъ бугеб жаназа батlа бахъизе лъазе яги ДНК гьабизе унел гlагарлъиялъул нухда хварал харжал Оборонаялъул министерствоялъ тlаде росула, гьединго психологиялъулаб ва цогидабги хlажатаб кумекги гьабула”, - ян абуна районалъул военкомас.

И. МУХIАМАДОВ