Дагъистаналъул ХIукуматалъул бетIерлъуда нилъер ракьцояв ГIабдулпатахI ХIажиевич ГIамирхановас лъагIелалдаса цодагьаб цIикIкIараб гурого заман бачIониги, гьесда кIвана доб хундерие хасиятаблъун рикIкIунеб гIакъиллъиги, къадруги, лъай буголъиги (грамотность), гIадамазда гъорлъ хьвадизе лъайги тIолгоязда бихьизабизе. МухIу Гьиматович ГIалиев хъулухъалдаса ун таманал сонал ун рукIаниги, жеги лъугIуларо гьесул хIакъалъулъ ракIлъикIавин, ришват босичIев вацIцIадавилан, гIадатавилан абулел гIадамал. ГIадатаб халкъалъ нагIана кьоледухъ тIасан бох бегьун, гъоркьан ратIа бегьун ругьунаб нухмалъуда рукIине кIвейгьеб гурищ гьунар?! Дицаги хал ккун букIана лъикIаб тухумалдаса росуцояв, хундерил киназего хирияблъун рикIкIунеб цIалакъалиялъул инсан ГIабдулпатахI ГIамирхановасул сабураб, цевехъахъдун живго вихьизавичIеб хIалтIуда хадуб, гIенеккана гьесул гIодове виччан гьарулел кIалъаязухъ. Йохулей йикIана жиндирго культурияб хьвадачIвадиялъ ГIамирханов Англиялъул лордасда данде кколев вукIиналдаса, халкъалъ социалиял гьиназдасан гьесдехун ургъел бикьулеб букIиналдаса. Гьелеха, доб хундерил цIар рагIараб… чIухIи гуро, къадру! ЦерегIанго соназ нилъер районалъул цебетIеялъулъ (гьелдаго гьоркьоб газеталде тIалъиялъ кьолеб кIваралъулъ) хIал хъублъарав пишацояв-редакторас абун букIана дида: «Нижер, нужер гIадин, Арбулиевалги, Сулеймановалги, Маххуловалги гьечIелъулха» ян. Гьанже гьеб сияхIалде тIаде хIинкъичIого журазе бегьула ГIалиевалги, ГIамирхановалги. Хъулухъалдаса нахъе ун хадубги, ДРялъул ХIукуматалъул Инстаграмалда къотIичIо ГIабдулпатахIие гьабураб кумекалъухъ, тIамураб гIиналъухъ, тIубараб мурадалъухъ кьолел баркалаялъул рагIаби: «Шамилхъала поселокалда ва ансадерида дур лъикIлъи кIоченаро!», «Баркала нижер росулъ спортзал баралъухъ!», «ТIалъиялдаса нижер росулъе цого цо нух «батарав», чIухIи гьечIев хIаким!»… Гьеб гурищ хъулухъалдаса борхун бетIергун нахъе ине гIилла?! ГIамирхановасул кверчIваялдалъун гIемер кумек щвана нилъерго районалъеги:чанго лъай кьеялъул учреждениялда капиталияб ремонталъе, цIиял объектал раялъе ресал ратана, районалъул сахлъи цIуни оборудованиялдалъун хьезабиялъе 68 млн. гъурущ гIарцул биччазабуна ва гь.ц. Гьаб чорокаб заманалда гIемерисез хIаракат бахъула хъулухъ цIунизе. ГIамирхановасин абуни цIунана тахбакI гуреб, жиндирго гьумер. Бокьараб хъулухъалда рукIине рекъараб, лъайги-бажариги, интеллигентностьги, культураги жиндилъ бугеб Хунзахъа Чиясул гьумер. Баркала дуе гьелъухъ! Цо республикаялъул хъулухъчияс дида абуна ХIукуматалъул Председателасул хъулухъалдаса казначействалде ГIамирханов вачиналъул магIна кколин Меликовасе гIарцул хазинаялда нахъа ракIбацIцIадав чи хIажат вукIин. БатизегIаги батагиха гьедин…
Ф. Мухlамадова.
|