15 августалда райадминистрациялда тlобитlана районалъул терроризмалда данде къеркьеялъул комиссиялъул (АТК) иргадулаб данделъи. Гьелда гlахьаллъи гьабуна районалъул нухмалъиялъ ва муниципалитетада ругел ихтиярал цlуниялъулгун къуваталъулал ва рухlиял идарабазул вакилзабаз. 

Данделъиялда гьоркьор лъун рукlана районалда ругел лъай кьеялъул гlуцlабазда терроризмалъул хlинкъи гьечlолъи цlуниялъул ва кватlичlого тlаде щолеб бугеб Лъай кьеялъул къоялде ва цlияб цlалул соналде учреждениял хlадуриялда хурхун лъай кьеялъул отделалъ гьабураб хlалтlул; гlолилал ихтиярги гьечlого тlоритlулел акциязда гlахьаллъичlого рукlинелъун гьарулел профилактикиял тадбиразул; районалъул территориялда ругел диниял объектазе документал гьариялда хурхун тlобитlулеб хlалтlул хlасилазул хlакъалъулъ суалал.

Тадбир рагьана районалъул нухмалъулев Нурмухlамад Задиевас. Гьес бицана жакъа нилъер улкаялда бугеб хlалуцараб ахlвал-хlалалъул ва гьениб, хасго Дагъистаналда питна бекьизе хlаракат бахъулел чагlи гlемерлъулел рукlиналъул хlакъалъулъ. Ракlалде щвезабуна дагьаб цебегlан республикаялда ккараб терракталъул хlакъалъулъги ва абуна гьединал лъугьа-бахъинал такрарлъичlого рукlине ккани, профилактикиял тадбиразде кlвар цlикlкlинабизе кколиланги. Гьес тlадчlей гьабуна сверухъ гьединал лъугьа-бахъиналги рукlаго, рехсараб бутlаялда гьабулеб хlалтlи чучлъизе тезе бегьунгутlиялдаги.     

Тlоцебесеб суалалда хурхун хlисаб кьуна лъай кьеялъул отделалъул начальник Патlимат Хlамзатовалъ. Гьелъ абуна районалда ругелщинал лъай кьеялъул учреждениязда лъун ругин экстренниял телефонал, тревогаялъулал кнопкаби, металлодетекторал, видеокамераби, къаси мехалъ азбар-къоноялда рекlунел руго чирахъал ва киналго минаби ругин сверун къан. 6 школалда буго хасаб охрана (ЧОП), гьеб букlине бугила жеги 5 кlудияб школалдаги. Киналго гlуцlаби 99% хlадурун ругила цlияб цlалул соналде. 

Кlиабилеб ва лъабабилеб суалалъул бицун кlалъана районалъул бетlерасул заместитель, АТКялъул секретарь Хlамид Гьитlинов. Гьес баян кьуна, июнь моцlалда республикаялда ккараб терракталдаса хадуб, регионалъул Бетlер Сергей Меликовасул тlадкъаялдалъун тlобитlулеб бугеб профилактикияб хlалтlул хlакъалъулъ. Гьедин, нухмалъиялъул вакилзабазги спортсменазги районалъул СМИяздасан гьарун руго кlалъаял. Хасаб хlалтlи тlобитlулеб буго рухlиял церехъабазги. 

Жакъа къоялде районалда бугеб 76 (гьездасан 45 жаниб рузман балел, 31 авалалъул мажгит) мажгитаздасан 14 гьарун руго “зеленкаби”. Гьезие “хlинкъи гьечlолъиялъул паспортал” гьаризе рукlинелъун, сияхl кьун буго республикаялъул Миллияб политикаялъулгун диниял ишазул министерствоялде. Октябрь моцlалъ, гьел республикаялъул рухlиял гlуцlабазул реестралде росаралго, гьезие паспортизация гьабун бахъине буго. Гlаммаб къагlидаялъ, гьеб иш исана лъагlел лъугlилалде рагlалде бахъине кколиланги абуна Хlамид Гьитlиновас. 

Данделъиялда рорхарал суалазда тlасан жидерго пикраби загьир гьаруна районалъул прокурор Рамазан Гlумаровас, полициялъул начальникасул заместитель Шамил Маликовас, ФСБялъул Хунзахъ бугеб районазда гьоркьосеб отделалъул нухмалъулев Шамил Гlумаровас ва цогидазги.

Гьоркьор лъун рукlарал суалазда хурхун данделъиялъул ахиралда комиссиялъ къабул гьаруна дандрекъон кколел хlукмабиги. 

И. Мухlамадов.