Районалъул гlемерисел росабалъ тlадран унел руго батlи-батlиял хlалтlаби. Мисалалъе, гlолохъанав ва бажари бугев бегавул Гlумар Гlисаевасул нухмалъиялда гъоркь къо бахъанагlан цlилъун рачlунел руго Уздалросдал советалде гъорлъе унел росаби. Гьедин, дагьаб цебегlан Хъахlикlкlалахъ росулъ хlалтlизе биччана республикаялъул Сахлъи цlуниялъул министерствоялъул хасаб программаялда рекъон, 500 азарго гъурщиде капиталияб ремонтги гьабун къачlараб фельдшерлъиялъул пункт. Гьеб программаялда рекъон медпункталда гьабуна цlияб санузел, цlияб котелги насосги лъун, хасалил согlаб цlорой тlаде щвелалде щибго квалквал букlунаредухъ хlалтlулеб хlал гьабуна отоплениялъул системаялъул. Гьединго къачlан буго минаялъул къватlисеб рахъ ва берцин гьабуна сверухълъи. Районалъул нухазул фондалдасан сурсаталги риччан, гlаммаб къагlидаялъ 2,8 километрадул манзилалда чабахги бан къачlана лъабабго росулъ нухал. Нух ччукlун бачlинчlого букlинелъун цо-цо участоказда гьаруна къадалги. Уздалросулъ байбихьун буго ракьазул цlиял участокал кьезе ругел бакlазда нухал рахъизе. Гlаммаб къагlидаялъ бахъизе руго 2,4 километрадул манзилалда нухал. Гьелдасан жакъа къоялде 1,2 км лъугlун буго.

Гьездаса нахъе ккун гьечlо муниципалитеталъул Харахьи участокалда ругел росабиги. Исана риидалил заманалда рарал кlудиял цlадазул хlасилалда гlезегlан зарал ккана херехьдерие. Гьабсагlаталда росулъ унеб буго гьел цlадал раялъул хlасилалда хвезабун букlараб росдал цо къотlнобе 1 километралъул манзилалда бетон тlеялъул хlалтlаби. ДРялъул “Агрострой” ГКУ гlуцlиялъ росулъ бан рагlалде бахъунеб буго футбол хlалеб майдан. Кватlичlого киналго хlалтlаби лъугlаралго официалияб къагlидаялъ рагьизе буго гьеб. Гьал ахирисел соназда бищунго херехьдерил рахlат хвезабулеб гlузрулъун ккола хасало росулъ лъим букlунгутlи. Гьеб гlузру лъугlизабиялъул мурадалда араб соналъго “Халкъияб лъим” абун цlарги лъун, росдал жамагlаталъ жидерго къуваталдалъун байбихьун букlана 10,4 км манзилалда Мочlохъан цlияб лъел мухъ бачине. Жакъа къоялде гьениб хутlараб хlалтlи буго 200-300 метрадул манзилалда рогlразда тlаде ракь хъвазе. Гьал гlагарал гlодоркъоязда субботникги тlобитlун, гьеб хlалтlиги рагlалде бахъинабизе буго. Цогидал хlажатал алаталги росун, кинабго битlа-бишун ккани ва гьава-бакъалъул шартlаз ресги кьуни, гьенисан кватlичlого росулъе цlияб лъим чвахизе буго. Зама-заманалдасан росдал гlолохъаби унел руго Парси магlардасан росулъе бачараб лъел мухъалъухъ халгьабизеги.

Кlудияб чlаголъи букlана гьал къоязда Гьамущи росулъги. 20 сентябралда гьениб тlобитlана районалъул нухмалъиги росдал жамагlатги гlахьаллъараб чанго тадбир. Тlоцебе рагьана “Комфортная городская среда” абураб программаялда рекъон гьабураб гьитlинабго лъималазул площадка. Байрамалъулаб ахlвал-хlалалда рагьана гьанже цlи гьабураб чвердолеб бассейн. Гьелъул гlатlилъи буго 700 кв метр, гъварилъи - 2 метр. Бассейналъул буго хас гьабун гlисинал лъимал чвердезе бихьизабураб, дагьабго гурони гъварилъи гьечlеб къотlелги. Росдал цо къватlалъе кьуна Украинаялда унеб бугеб хасаб рагъулаб операциялда къадаралде щварав Бихьинчилъиялъул орденалъул кавалер, Ахlмад Гъазимухlамадовасул цlар. Мунагьал чурадил цlар тlад хъвараб мемориалияб хъарщи рагьана гьев цlалараб росдал гьоркьохъеб школалдаги. “Жакъа нилъ чlухlарал руго гьадинал бахlарзабазул цlаралда тlоритlулел тадбиразда гlахьаллъи гьабизе щвеялдаса. Гьес рухl кьуна нилъее ва нилъер Ватlаналъул хlинкъи гьечlеб букlинеселъе гlоло. Нилъеда кlочон тезе бегьуларо гьесул бахlарчилъи, тlалаб-агъаз гьабизе ккола гьесул нахъе хутlарал хъизан-лъималазул ва наслабазухъе кьезе бачlарчияб цlар”, - ян абуна районалъул бетlер Нурмухlамад Задиевас. Гьединго кlалъаял гьаруна районалъул военком Шамил Мухlамадовас, Ахlмадил гlага-божараз ва гьесда цадахъ рагъулаб хъулухъалда рукlаразги. Гьебго къоялъ школалъул минаялда жаниб тlобитlана бегавулзабазулгун гьитlинабго данделъиги. Гьенир рорхун рукlана росабазул генпланал хlадуриялъул ва кватlичlого тlаде щолеб бугеб хаслихъе призывалде хlадурлъиялда хурхарал суалал.

Дагьаб цебегlан 2,5 километрадул манзилалда чабах бан ва лъим чвахизе рахъалги рахъун къачlана Гlорутlасан росдал магъилъе унеб нух. Гьеб росдал захlматчагlазе цlакъ кlвар бугеб нух иххаз хвезабун, хъитlал лъугьун, тlасан машинаби хьвадун бажарулеб хlалалда букlинчlилан бицана росдал бегавулас. Жаниса лъимги биччан, бацlцlадги гьабун, тlиналде бетон тlун ва къадазда штукатуркаги гьабун къачlан буго росулъ бугеб бассейн. Гьабсагlаталда хlалтlаби гьарулел руго росулъ бугеб гьобоялда сверухъги. Гьениб лъун буго кор ва бан буго цlияб рукъ. Аскlобго кватlичlого рагьизе руго кlиго жамгlияб туалетги. Гlарадерил аслияб гlузру буго росулъ лъималазул ах гьечlолъи. Росулъ буго нусгоялдасаги цlикlкlун садикалде унеб ригьалъул лъимер. Гьелъие гlарзаги, проекталъулгун сметаялъулаб документацияги цогидаб хlажатабщинаб кагъат-хъарщиги жидеца некlого хlадурун бугин ва пачалихъияб экспертизаялъ къабулги гьабунин, объекталъе сурсатал риччаялъухъ балагьун чlун, тlасияб соналъниги садик базе байбихьилин абураб хьулалда ругилан бицана бегавулас.       
И. Мухlамадов.