Районцоязда рак1алда батила Дагъистаналъул
президентги газпромалъул жавабиял г1адамалги рач1ун Т1ануси газ бикьулеб
станциялда турбил к1алт1а ц1аги бакун гьеб х1алт1изе кьеялъул рохалилаб
дандеруссин т1обит1улеб заман. Т1анусдерил киналгоязде г1агарун рукъзабахъ хъах1илаб
ц1атариялдаса пайда босулеб бук1аниги, газ жеги бач1ун бук1инч1о школалде.
Аслияб г1иллаги гьелъие бюджеталда г1арац гьеч1олъи бук1ана. Г1емер х1аракат
бахъана райадминистрациялъул бет1ер Дарбишев Х1ажияс гьелъие ресал ратизе ва
ахирги т1анусдерил школалде газги бачун, рукъзал хинлъизариялъул система гьелда
хурхинабиялъул х1алт1и райадминистрациялда цебе бугеб ОАО «Хунзахское СЭУ»ялъул
директор Х1амзатов Х1усенида т1адкъана. Цебеги росабалъ газил трубабазул
проводка гьабун х1албихьи щвараб г1уц1и бук1иналъ, Х1усенил х1алт1ухъабаз
жидедаго т1адкъараб иш рак1бац1ц1адго т1убазабуна. Къокъабго болжалалда
балагьана гьелъие х1ажалъулеб т1аг1ел-алат, росана котелал ва г1емерго заман
иналде школалда газица бакулеб отопительнияб система х1алт1изе биччана.
Школалда газил печь х1алт1изе кьеялъул рохалилаб
данделъиялда г1ахьаллъана райадминистрациялъул бет1ер Дарбишев Х1ажияв, ОАО
«Хунзахское СЭУ»ялъул директор Х1амзатов Х1усен, РУОялъул н6ухмалъулев Г1умаров
Залумхан, школалъул учительзабазулгун ц1алдохъабазул коллективал ва т1анусдерил
жамаг1аталъул вакилзаби. Гьеб тадбирги рагьун жидее хинлъи сайигъат гьабурал
х1алт1ухъабазе, хасго гьезул нухмалъулев Х1амзатов Х1усение рак1-рак1алъул
баркала кьураб к1алъай гьабуна школалъул директор Дибиров Хъайтмазица. Баркигун
баркалаялъул к1алъайгун цеве вахъана райадминистрациялъул бет1ер Дарбишев Х1ажияв.
-Лъимал-гьеб ккола нилъер бук1инесеб. Умумузул мустах1икъал
ирсилаллъун рахъине г1унбач1унеб г1елалъе бит1араб тарбияги гъваридаб лъайги
щвезе ккани х1ажалъула гьелъие рекъон кколел шарт1ал, гьел г1уц1иялде буссараб
бук1ине буго дир хадубккунисебги х1алт1и, х1аракат бахъила районалда лъайкьей
цебет1еялъе бажарарабщинаб гьабизе. Баркала Х1усениеги гьабураб х1алт1ухъ.
Ресукълъиялъухъ, зах1малъабазухъ балагьич1ого х1алт1ана гьев т1адкъараб иш
заманалда т1убазе,- ян абуна Х1ажияв Мух1амадовичас жиндирго к1алъаялда.
Районалъул лъайкьеялъул х1алт1ухъабазул рахъалдасан баркиялъулаб к1алъай
гьабуна РУОялъул нухмалъулев Г1умаров Залумханица. Росуцоязул, т1анусдерил
жамаг1аталъул рахъалдасан баркала кьун к1алъана Абулмуслимов Г1умарасх1аб.
Гьабураб х1алт1уе кьураб лъик1аб къиматалъухъ, жиндир коллектив
к1одогьабуралъухъ баркала кьун к1алъазе вахъана Х1амзатов Х1усен. Киназулго
хъатч1ваялда гъоркь гьесги районалъул бет1ер Х1ажияв Мух1амадовичасги газалъул
печь х1алт1изе биччана. Хинлъиги рохелги жубараб ах1вал-х1алалда рихана
тадбиралъул г1ахьалчаг1и т1анусдерил школалдаса рокъо-рокъоре.
|
